1 «Eye, Ipfumu hi mayulu hili bunuubu: Mukuutu a nzo mumosi apali ŋa ngwali mu uvolo basali mu ngundu a nde ya vinye. 2 Nde ayuhisini na basali mu pfuta a bo yi likuta limosi la mbongo mu ilumbu, na nde a tsindihi bo hutso a ngundu a nde ya vinye. 3 Bebele na ngunga yi ipfwa ya ŋa ngwali, nde abwepala, na nde amoni baatu bakima ba baaba ŋaana, hwavele isalu. 4 Nde aleeli bo: "Yenaani benu kaka hu ngundu a me ya vinye, na me tsa pa benu pfuta yi yafwana." 5 Na bo baayeni huuna. Mukuutu a ngundu abwepala mu mwangulu, titswene bebele a ngunga yi matatu hu mbisa a mwangulu, nde asiidi bumosi. 6 Titswene, hu pedu a ngunga yi mataanu ya tsitsaha, nde apali, na abiisi baatu bakima baaba ŋaana. Nde afuuli bo: "Mu hima benu lili ŋaniiŋa ilumbu hyoosi hwavele usa isiha?" 7 Bo baafutili: "Mu tooni ati pasi muutu a havolo bisu mu isalu ve." Nde aleeli bo: "benu kaka yenaani hu ngundu a me ya vinye."

8 Tsitsaha bu yaatoodi, mukuutu a ngundu aleeli mutumi bisalu: "Teele basali na futa bo muutu muutu. We baandiha mu ba baavoli ba tsyelele, na we mana mu ba baavoli batsomi." 9 Ba Baabandihi usala mu taangu yi mataanu ya tsitsaha, baayidi na baayaki pasi muutu likuta limosi la mbongo. 10 Bu taangu a ba baavoli tsomi yaatoodi, bo baakatsima ti bo buuyaka pfuta yi yaalutahala. Ka baaviidi bo kaka pasi muutu, likuta limosi la mbongo. 11 Ŋa bo baakayaka lo, bo baakakusa nga ngundu, 12 na bo baakaleele: "Basali mo ba bavoli tsyelele basali ndulu ngunga mosi, na we miifuta bo we bisu ba limiikunda isalu hya ngolo muyilala woosi na ibabudu hya nyangu!" 13 Ka mukuutu a ngundu afutili huli mumosi mu bo: "Mbaahi a me, me a handi mu utsa we bubi ve. Bisu a we laayuhisini ti, me tsa pfuta we talu likuta limosi la mbongo mu isalu hi ilumbu; a ni buuna ve? 14 Bunuubu, ni volo pfuta la we na yene. Me toondi uva huli musalili wu misala tsyelele, pfuta mosi we yi me piidi we. 15 Me a handi na muswa mu usa bu me toondi mu mbongo a me ve? Buuve we nyengi bu me ndi mu upaanga ma mabwe?"» 16 Yisu abweleele: «Babali ba tsyelele sa baba batsomi, na babali batsomi sa baba ba tsyelele.»

17 Yisu akayene hu Yeruselemi, nde avoli bayihi ba nde bakuumi na boole ŋa muvanga, na mu nzila nde aleeli bo: 18 «Yuhaani, bisu a benu lika mu ukumasa hu Yeruselemi, hu buuyeholo Mwana a Muutu huli bakuutu ba bangaanga ba Nzambi na huli milongisi mi Mikele. Bo sa bakotese nde kondaayi yi lipfu. 19 Na sa bayeholo nde huli bangoyi, mana bo bakwede nde, bafwinza nde bikooti, na ukomene nde ŋa muti a kurwa. Na nde sa asuuha mu babaakwa mu ilumbu hi bitatu.»

20 Hu mbisa, mukadi a Zebedayi hayasusaha ŋa pedu a Yisu na baana ba nde boole ba babahala, nde ni ukogemene ŋa busu bwa nde mu uvondo nde isiha imosi. 21 Yisu ni ufuula nde: «We hima toondi?» Mukadi a Zebedayi afutili: «Sa me lahi ti baana ba me baboole ba babahala baniiba batsahala, mumosi ŋa mbahala a we, wuna ŋa kaasu a we, ŋa we uba mutumi.» 22 Yisu ni ufutala: «Benu a liyaabi hima benu lili mu uvondo me ve. Benu utwala unywa mbuungu mapasi yi me unywa?» Bo kaka ni ufutala nde ti: «Bisu utwala.» 23 Yisu aleeli bo ti: «Eye, benu sa linywa mbuungu a me. Ka mu li utsahala ŋa mbahala na ŋa kaasu a me, a me undeele ve. Mambuha mo maana mali ma baatu ba Taata a me hamiivangila mo.»

24 Ŋa bayihi kuumi bakima baayuhi buuna, bo baadasuhili baana ba ngu baboole bana. 25 Buuna, Yisu ateeli bo boosi na aleeli: «Benu liyaabi lo. Batumi ba matsi, bubaatuma baatu ba bo na matwala. Na bapfumu bubaanangimana baatu. 26 Ka a huba bumosi ŋa hati la benu ve. Woosi wu toondi uba mukuutu ŋa hati la benu sa aba musalili a benu. 27 Na woosi wu toondi uba watsomi ŋa hati la benu sa aba muviha a benu: 28 Ni mu buuna, Mwana a Muutu a haaya mana basalila nde ve, ka mana nde asalila na uva muvumu a nde we kodi mu uyobolo ba balahi.»

29 Bu bo baapali mu musyenge a Yeriko, koonge yinene ya baatu yaduukili Yisu. 30 Binzimana byole byaaba byatsahala ŋa muvanga a nzila. Bo baayuhi ti Yisu aba mu uvyoho, binzimana byakafulaha: «Pfumu, Mwana a Davidi, Kwila bisu lingebe!» 31 Baatu ba balahi baakapfubasa bo mana bo baba swii. Ka bo baabwefulaha: «Pfumu, Mwana a Davidi, kwila bisu lingebe!» 32 Yisu atsikimi, ateeli bo na afuuli bo: «Hima benu litoondi ti me tsiila benu?» 33 Bo baafutili nde: «Pfumu, miisu mya bisu midibuma!» 34 Yisu akwili bo lingebe, na nde abeembi miisu mya bo. Masulubete, bo baabaandihi umono, na baaduukili nde.