20 Buuna, Yesu abaandihi usyembe misyenge mi nde hafulili usa bipadi. Mu tooni ati, baatu ba misyenge mo miina a baasobi mbiili ve. 21 «Ki pila lingebe huli we musi Korazini! Ki pila lingebe huli we Betesayida! Mu tooni ati, tso bipadi byosi bi baasiidi ŋa hati la benu, baayasa byo huli bisu Tiilo na bisu Sidoni, kini umata beleve, baatu ba misyenge mo miina baamiikoto mu lingebe, baamiiyobo mufutu mu mitswe na usobo mbiili. 22 Ni mu buuna, me ndi mu undeele benu: mu ilumbu hya tsundusu, tsyembili yi benu luuyaka yiuvyohelele ya baatu ba misyenge mya Tiilo na Sidoni. 23 Na we Kapernahumi, we li mu utsima ti Nzambi sa asyenolo we natee hu yulu? Naana! A buuna ve. Sa bakulamasa we natee hu tsi a babaakwa. Mu tooni ati, tso bipadi bi baasiidi huli we, baasiidi byo kaka mu musyenge a Sodoomo, kini musyenge mo wuuna kiiba natee lolo yiniiyi.✝ 24 Ni mu buuna, me ndi mu undeele benu, mu ilumbu hya tsundusu, tsyembili yi benu luuyaka yiuvyohelele ya baatu ba musyenge a Sodoomo.»