Mateus 18

Kuma musalili wu abisi usa kolo-kolo

21 Buuna Peetelo ayasusaha huli Yisu na afuuli nde: «Pfumu, kolo-kolo tsa kwe me utsa mwana a ngu a me mu livupu, ŋa nde husiila me ma mabi? Natee, tsa tsambu?» 22 Yisu afutili: « Naana, me a handi mu undeele ve ti natee tsa tsambu. Ka we afwana mu usa nde kolo-kolo tsa maku tsambu li bikuku tsambu. 23 Ni mu buuna, Ipfumu hi mayulu hyafwanina na mutumi mumosi wu tondi ukamba mbongo huli basalili ba nde. 24 Bu nde abandihi usa litangu, baabehili nde musalili mumosi wu aba asombo mbongo yi ndahi-ndahi. 25 Musalili a haaba na tsalu yi utwala ufuta mukanu mo wuuna ve. Buuna pfumu a nde atumi ti basumbasa nde we muviha. Nde na mukadi a nde na baana ba nde, na bisiha bya nde byosi, mana bafuta mukanu mo wuuna. 26 Musalili akongimini ŋa busu bu a pfumu na aleeli: "Pfumu, suusala me puumi, me tsa pfuta bya we byosi!" 27 Pfumu akwili musalili a nde lingebe, anyahuli nde na ayehuli mukanu a nde. 28 Bu musalili mo wuuna hapali, nde abwani na mbaahi a nde mumosi wu isalu, wu aba asombo nde mbongo yi keehe. Nde akaangi nde, aviki nde ŋa mivodi na aleeli: "Futa bya me bi we asombo!" 29 Mbaahi a nde abwili nde ŋa miilu, ayayiini nde na aleeli: Suusala me puumi, na me tsa pfuta we. 30 Ka nde a hatondi ve; nde ayabwaha nde napa mu kondaayi, tee mu pfutili a mukanu a nde. 31 Bu basalili bakima baamoni mambu ma maabwidi, baamoni lingebe li lilahi, na baayabisi musamu huli pfumu a bo. 32 Ni buuna, pfumu hatsihi musalili mo wuuna, na aleeli nde: "We musalili nga mavaanga ma mabi! Me anzyehuli mukanu a we woosi mu tooni ti we ayayiini me. 33 We a haakikwila mbaahi a we lingebe, we bu me akwila we lingebe ve?" 34 Pfumu abahi kesi na nde a tsindihi musalili hu kondaayi, hu bisalu bya pasi, natee bu nde hafuti byosi bi nde haba hasombo.»

35 Na Yisu abweleele: «Ni buuna Taata a me wu li hu yulu husa mu benu, tso pasi nde mu benu velisa mwana a ngu a nde mu livupu kolo-kolo mu mutima a nde woosi.»