LUKA 2

4 Josefa wakazwa mutaindi lya Nazaleta mu Galileya okwiinka mutaindi lya Bbetelehemu mu Judiya ooko Mwami Deveti kwakazyalilwa kaambo wali wolunyungu lwa Deveti. 5 Wakainka kuyoolilembya o Maliya wakatangidwe kukwatwa kulinguwe.*2:5 Zikonke zyokukwata zyalikupangwa aciindi cokubulikwa, calikucitwa antangalala ape taakwe nizyalikuyandika kucita sikukwata anobweza sikukwatwa wakwe kuyookala awe mbuli mwanakazaakwe. Mateyo 1:24 itondezya kuteeti Josefa wakali mubwezede kale Maliya kungʼanda yakwe mbuli mwanakazaakwe kabatana kwiinka ku Bbetelehemu. Nekuba namu tibalina kuswaangana antoomwi mbuli mwaalumi o mwanakazi (Mateyo 1:25). Cecico eeco Luka caamba kuteeti Maliya ngonguwe "wakatangidwe kukwatwa." Maliya walimisi. 6 Kabacili ooko buzuba bwa Maliya bokutumbuka bwakasika. 7 Mpoonyina wakatumbuka mwana musyimani wokusaanguna. Wakamuvungaila mumasila. Mpoonyina wakamulazika mucilido cebanyama, kaambo tikwalikwe cibaka mungʼanda yabeenzu.*2:7 Mikwasyi yeci Juda iipengede yalikubambila banyama bayo mumaanda nako yamasiku. Iino cilido cabanyama ciyeeyelwa kuteeti cali mungʼanda mwakatambwidwe Maliya o Josefa kukala kutali mumulaka kule engʼanda. Kuyeeyelwa kuteeti bamwi basinyendo bakali kale mumaanda abeenzu. Maliya o Josefa bakakala mucibaka cengʼanda mwali banyama ape ezilido zyabanyama zyali afwiifwi.