LUKA 8

Mwanaa Jailosi o Mwanakazi Wakakuma Jansi Lya Jesu

40 Iino Jesu abaskwiiya bakwe nibakapiluka kubbazu limwi lyo lwizi, bantu banji bakamutambula kabotu kaambo boonse balikumulindila. 41 Mpoonyinaawo umwi wabeendelezi be cikombelo walikwiitwa kuteeti Jailosi wakeza okufugama anembo lya Jesu, okumukombelezya kuteeti ainke kungʼanda yakwe, 42 kaambo kokuteeti mwana wakwe musimbi waleemyaka ili kumi ayobile walikuciswa cokuyanda kufwa. Ngomwana ngwaalikujesi alike.

Jesu wakazumina kwiinka awe. Mpoonyina naalikuyobweenda bantu balikuyoobumusyaanikizya. 43 Iino kwali mwanakazi walikuciswa bulwazi bwakalobola kwemyaka iili kumi eyobile, wakabbadela zyoonse zyaajesi kubasilisi*8:43 Amwi malembo taalembedwe kuteeti, "Wakabbadela zyoonse zyaajesi kubasilisi." , kono taakwe wakakonzya kumusilika.

44 Wakanjila mubantu kusule lya Jesu, okukuma kumamanino ejansi lya Jesu, mpoonyinaawo gazi lyakaleka kuzwa. 45 Jesu wakabuzya kuteeti, "Ngwani wandikuma?"

Kono boonse bakakaka. Mpoonyina Pita wakateeti, "Simalelaangu, bantu banji balikuzungulukide okukusyaanikizya."

46 Kono Jesu wakateeti, "Kuluumwi wandikuma ecaali, kaambo ndamvwa nguzu ziponya zyazwa mulindime." 47 Ooyu Mwanakazi naakabona kuteeti wasyungulwa, wakeza kuli Jesu katuntuma*8:47 Kweendelana omulawo weci Juda, kuciswa ko mwanakazooyu kwakamusofwaazya. Nakuteeti wakuma muntu ooyo muntu awe ulasofwaala. Mwendi walikuyoowa kuteeti Jesu abamwi bantu baziba kuteeti wakuma Jesu balanyema. okufugama anembo lyakwe. Mpoonyina wakalungulwida Jesu akati kabantu boonse caakamukumina ombwaakaponesegwa mpoonyinaawo. 48 Mpoonyina Jesu wakamwaambila kuteeti, "Omwanaangu, lusyomo lwako lwakuponya. Koya muluumuno."

49 Jesu naacilikwaamboola omwanakazi, kwakeza mutumwa kuzwa kungʼanda ya Jailosi okwaambila Jailosi kuteeti, "Mwanaako wafwa, lekakusyupa mwiiyi."

50 Kono Jesu naakamvwa zyakacitika, wakaambila Jailosi kuteeti, "Utayoowi, syoma feela, mpoonyina mwana wako ulapona."

51 Jesu naakasika kungʼanda ya Jailosi taakwe ngwakazumizya kumucilila kunjila anguwe mu ngʼanda kunze lya Pita, Joni, Jemusi, baisi abanyina mufu. 52 Boonse bantu balikubede kwateni balikulila, kono Jesu wakabaambila kuteeti, "Amuleke kulila, kaambo ooyu mwana tafwide ulede feela."

53 Kono bo bakatalika kumufubaazika, kaambo balizi kuteeti mwana wafwa. 54 Kono Jesu wakajata janza lyomwana ooyo okwaambisya kateeti, "Mwanaangu, buka!" 55 Muuya womwana wakapiluka, mpoonyinaawo mwana wakabuka. Kuzwaawo Jesu wakabalailila kuteeti, "Amumupe cokulya." 56 Bazyali bo mwana bakakomokwa, kono Jesu wakabakasya kwaambila muntu naanga omwi kuli zyakacitika.