João 5

Yesʉ alamya mukoni wa makonongola

1 Honyuma kw’aho, Yesʉ mwaya ɨYerʉsalemʉ mu linye ly’aBayuta. 2 Mo muyi w’ɨYerʉsalemʉ oyo, hofɨ n’olukyo lw’omuyi lo lʉnahʉlwamo Lukyo lwa Mbuli, halɨ kisima kyo kɨrɨ na bɨngɨrɨro bɨthano bitsimbirirwe na nduyi. Mo Kɨebʉranɨa, ekisima ekyo ekɨnahʉlwamo Betesaita.*5:2 Betesaita, nɨ negena mbʉ nyʉmba ya shashi. 3 Bakoni bangɨ babyaga nɨbagonzere mo bɨngɨrɨro ebyo. Babyagamo mbumi, bɨrema n’abamakongonola. [Abandʉ abo bagenda abalɨndɨrɨra ametsi athenganibwe. 4 Kʉshangwa malaɨka wa Nyinya-kowethʉ agenda akimira mo kisima ekyo n’ithengania ametsi. N’omukoni mʉmbere-mbere yo wagenda ɨngɨra mo metsi amamala ithenganibwa agenda alama obukoni abyagako.]*5:4 Omʉlondo ono athalɨ mʉ mashako magʉma wa kera. 5 Aho, habyaga mʉndʉ mʉgʉma yo wabyaga mukoni ɨthoka kʉ mɨaka makumi ashathʉ na mʉnanɨ. 6 Yesʉ abere ashʉnga ko mukoni oyo anagonzere, mwamɨnyerera ko nɨ mukoni wa bɨro bɨngɨ. Mwamʉbʉtsya athɨ: «Ushondya ʉlame?» 7 Omukoni oyo mwamʉshʉbɨtsya athɨ: «Nyinya-kowethʉ, nyithawithe mʉndʉ w’erɨnyɨngɨtsya mo kisima ametsi amamala ithenganibwa. Nangye enyinabya nyashondya ɨngɨra mo metsi, ʉndɨ mʉndʉ nɨanyɨthanga.» 8 Yesʉ mwamʉbwɨra athɨ: «Wimana, heka ekipoyi kyawe na ʉgende.» 9 Aho n’aho omʉndʉ oyo mwalama, mwaheka ekipoyi kɨwe na mwathanga ɨbashʉla. Ekɨro ekyo kyabyaga kɨro kya Sabato.