39 Aho, Nyinya-kowethʉ mwamʉbwɨra athɨ: «Imwe Bafarisayo, omʉnagenda omʉshʉga enyuma y’olwatha na y’embale. Hewethuwe mo mɨthɨma enyu mwotswire ngʉmbʉ y’obwɨtsɨ n’ebɨndɨ bɨbɨ. 40 Imwe mʉlɨ thʉhʉmo! Muthetsi kw’oyo wakomaya enyuma y’olwatha na y’embale n’ɨye yo wanakomaya n’emwishi watho? 41 Aho, mʉgende omʉwathɨkya abatsene mo bɨndʉ byo muwitheko. Aho n’ebɨndɨ byoshi nɨbyetsɨbwa bʉshana nemwe.
42 «Mʉlɨ balɨgo, imwe Bafarisayo! Omʉnahana ekɨgʉma ky’ikumi ky’akandambʉka, n’esoshogo, n’esɨndɨ nyinyi, he omʉnagenda omʉsʉnzʉgʉra ɨkola ebɨthʉnganene n’olwanzo lwa Gongo. Naho nɨ ebyo byo mwangagendire omʉkola, buthalika ɨhana kɨgʉma ky’ikumi ky’ebɨndɨ bɨndʉ byoshi ebyo.
43 «Mʉlɨ balɨgo, imwe Bafarisayo! Mutsiire ikala ko bifumbi by’embere mo sosinakoki. Na kandɨ mutsiire abandʉ bagende ababaketsya n’olushikyo mo mihindano. 44 Mʉlɨ balɨgo! Omunabya ng’amasɨnda w’athalɨko kɨmɨnyɨkalo, w’abandʉ abanalyathanga kʉwo bʉthamɨnya.11:44 aBayuta babyaga na mɨbere y’ihira bɨmɨnyɨkalo ko masɨnda wabo bʉshana mʉndʉ athalyathaga kʉwo bʉthamɨnya. Ɨkwamana n’oMʉgomba wa Mʉsa obʉlɨ wakolaga kʉ kinda kʉtse ilyatha kw’ɨsɨnda nɨ amahatsya. Athangashubire hindana n’abandɨ Bayuta mo bʉhere. Soma Balawi 5:3; Mɨganzo 19:11-22.»
45 Mʉkangɨrɨtsya mʉgʉma w’oMʉgomba mwabwɨra Yesʉ athɨ: «Mʉkangɨrɨtsya, ʉlɨ oʉnegena uthyo nɨoʉthʉkamba nethwe.»
46 Na Yesʉ mwashubya athɨ: «Bʉlɨgo kw’imwe bakangɨrɨtsya b’oMʉgomba! Kʉshangwa omuhekya abandʉ bw’emɨtsɨgo itsithohire, kandɨ nɨmʉthangathakola na kʉro ko mo minwe enyu.
47 «Bʉlɨgo kw’imwe! Kʉshangwa omuhimba amasɨnda w’abamɨnyeretsɨ bo bithawa na bo sho. 48 Aho omwɨmɨrana n’abo sho ko byo bakolaga, kʉshangwa mobitha abamɨnyeretsɨ, nemwe omuhimba amasɨnda wabo! 49 Bʉshana n’ekyo, Gongo mwithegekania lɨwe mwanegena athɨ: "Nyandathʉmɨrabo abamɨnyeretsɨ n’abathʉmwa. He bandagenda abitha bagʉma ba mʉbo, n’inubya abandɨ." 50 Nɨ bʉshana n’ekyo, omʉsasɨ w’abamɨnyeretsɨ boshi bithawa ɨthoka kw’ɨbʉmbwa ly’ekɨhʉgo, andabya ko muthwe w’abandʉ ba munobwire. 51 Obwithi obo bwathangaga kʉ Abeli ihika kʉ Sakarɨa11:51 Mo Ndagane ya Kera, aBayuta ɨbo babyaga nibetsi k’omʉndʉ mʉmbere withawa abyaga Abeli, n’omʉndʉ munyuma-nyuma withawa abyaga mʉmɨnyeretsɨ Sakarɨa. Soma Ndangɨro 4:8; 2Myatsɨ y’eMɨgʉlʉ 24:20-22. yo bithiraga mo Nyʉmba ya Gongo mo kathi-kathi k’obʉtara bw’erɨhererako n’ahandʉ habuyirire. Ega, enyɨbabwɨra nyɨthɨ omʉsasɨ w’abandʉ boshi aba andabya ko mithwe enyu imwe bandʉ ba munobwire.
52 «Mʉlɨ balɨgo bakangɨrɨtsya b’oMʉgomba! Omunabisha abandɨ bandʉ b’olʉfʉngʉro bʉshana bathɨngɨraga aho bangɨyɨra ɨmɨnya Gongo. Imwe bene mʉthalɨ omushondya ɨngɨraho, na bo bashondya ɨngɨraho omʉnakɨkɨrabo.»