22 Aho Yesʉ mwabwɨra abɨga bʉwe athɨ: «Ekyo kyo kyamaleka nɨnyababwɨra nyɨthɨ: mʉthagenda omuganga-gangya emɨthɨma enyu bʉshana n’obʉyɨngo bwenyu, mw’ɨnegena nga mwalya ki. Kʉtse iganga-gangya emɨthɨma enyu bʉshana n’emɨbɨrɨ enyu nga mwandambala ki. 23 Ega! Kʉshangwa obʉyɨngo bwenyu bo buwithe kɨtsɨro kʉlenga akalyo. N’emɨbɨrɨ enyu yo yiwithe kɨtsɨro kʉlenga esongɨmba. 24 Mʉlolere ko bɨkororo, bɨthahera na kandɨ bɨthahʉlʉla, bɨthayɨra handʉ h’ɨbɨkamo kalyo kʉtse mbʉpʉ. Hewethuwe Gongo anagenda alɨsabyo. Aho ni imwe mo muwithe kɨtsɨro kɨnene kʉlenga ebɨronge. 25 Ɨndɨ mo kathi kenyu mw’iganga-gangya omʉthɨma ʉwe angayongerera kathambi kake ko bʉyɨngo bʉwe? Hathalɨ! 26 Mʉlɨ muthangakotsya ɨkola kandʉ kake ng’ako, bʉshana na ki omugangya-gangya emɨthɨma enyu bʉshana n’ebɨndɨ bɨndʉ?
27 «Mʉshʉnge omʉshanga nga kw’anagenda alasha. Athakola, na kandɨ athayɨlandɨra ngɨmba. Hewethuwe enyɨbabwɨra nyɨthɨ n’omwamɨ Solomona mo bushoki bʉwe boshi, mwathambala lʉkɨmba lukwirire nga mʉgʉma w’oko mʉshanga oyo. 28 Ebɨthɨ by’omwɨshwa ebɨnashʉngɨka munobwire na mungya nɨ byagʉshwa mo mʉtsanwa. Namo bɨnalɨ bithyo Gongo anagenda ambikyabyo ngɨmba sikwirire. Nemwe athindabambikye kʉbʉyahanga imwe bandʉ b’olwɨkɨrɨtsyo lʉke? 29 Mʉthagenda omuyigangya-gangya bʉshana n’ishondya ebyo mwandalya n’ebyo mwandashoma. 30 Kʉshangwa nɨ abandʉ b’omo kɨhʉgo, bobathetsi Gongo, bobanashondya ebɨndʉ byoshi ebyo bʉthalʉha. H’imwe ye Sho etsi ko mulayire ko bɨndʉ ebyo. 31 Aho imwe mwathagenda omushondya oBwamɨ bwa Gongo, naye andabongerera ebɨndɨ bɨndʉ byoshi.