Yesʉ ɨngɨra mo muyi w’ɨYerʉsalemʉ n’olʉkengerwa
28 Mo ndambi Yesʉ abere amamala ɨnegena ebɨnwa ebyo, mwalola ebʉshondotsɨ mo lʉgendo lʉwe lw’erɨrʉkɨra ɨYerʉsalemʉ nɨalɨ embere s’omuhindano. 29 Mwahika hofɨ n’omuyi w’ɨBetefake na w’ɨBetanɨa, ko mʉnda w’ekɨthwa ky’eMiseituni. Mwathʉma babɨrɨ b’oko bɨga bʉwe n’ɨbwɨrabo athɨ: 30 «Mʉgende mo muyi owalɨ embere senyu. Mwabya mwahika mʉwo, mweyamo kyana kya pʉnda kihangire ekyo kɨthahera kyathikalwako na mʉndʉ. Mʉhangʉlekyo na mʉlethekyo. 31 Na mʉndʉ amababʉtsya athɨ bʉshana na ki omʉhangʉlakyo, nɨmwamʉshʉbɨtsya mʉthɨ Nyinya-kowenyu alayire kʉkyo.»
32 Abɨga bobathʉmawa mobagenda. Mobeya emyatsɨ nɨyɨnalɨ ng’oko Yesʉ athabwɨrabo. 33 Babere banemʉhangʉla ekyana ky’epʉnda ekyo, abenyekyo mobabʉtsyabo bathɨ: «Imwe! Bʉshana na ki omʉhangʉla ekyana ky’epʉnda ekyo?» 34 Mobashʉbɨtsyabo bathɨ: «Nyinya-kowethʉ alayire kʉkyo.»
35 Honyuma kw’aho mobalethera Yesʉ y’ekyana ky’epʉnda ekyo. Mobashesha kʉkyo kw’esongɨmba sabo, aho mobashambya Yesʉ yo kʉkyo. 36 Babere banemʉgenda, abandʉ mobagenda abashesha esongɨmba sabo mo nzɨra.19:36 aBayuta bagenda abakokya abakʉlʉ mw’ɨshesha esongɨmba sabo mo nzɨra. Bagendaga abakola bathyo bʉshana n’imukangania ko bamamukokya n’olushikyo. 37 Yesʉ abere ahika hofɨ n’ɨYerʉsalemʉ, mo bwandagala bw’ekɨthwa ky’eMiseituni, omuhindano woshi w'abɨga bʉwe mwamoga kʉtsɨbʉ. Mobahalamba Gongo nɨabahambala kʉtsɨbʉ bʉshana n’ebɨthɨko-thɨko byoshi bathashʉngako. 38 Mobagenda nɨabanegena bathɨ:
«Agashanɨrwe oMwamɨ yo uhika kw’ɨtsɨna lya Nyinya-kowethʉ!
Obʉholo bubye elʉgʉlʉ kʉtsɨbʉ,
na Gongo asingibwe!19:38 Soma Saburi 118:26.»
39 Bafarisayo bagʉma bo babyaga mo muhindano w’abandʉ mobabwɨra Yesʉ bathɨ: «Mʉkangɨrɨtsya, kemera abɨga bawe batsɨre.» 40 Yesʉ mwabwɨrabo athɨ: «Enyɨbabwɨra aba bamahʉlɨkɨrɨra, nɨ amabwe nɨ ɨwo ahambala!»
/images/a/Tcg2NiV7ce24OT6kCIQGR)
/images/a/a0208299-6f37-40a0-66e1-2576b9435f00)