16 Yesʉ mwaya mo muyi w’iNasareti owɨshʉkɨragamo. Ekɨro ky’eSabato kyabere kyahika, mwɨngɨra mo sinakoki ng’oko abyaga abegere. Mwimana bʉshana asomere abandʉ bw’eKɨnwa kya Gongo. 17 Mwahabwa mʉbʉngo w’ekɨtabo ky'omʉmɨnyeretsɨ Isaya, naye mwabʉngʉlawo. Mwahikira ahashakirwe hathɨ:
18 «oMʉthɨma wa Nyinya-kowethʉ alɨ kw’ingye.
Kʉshangwa amanyɨhaka mafʉtha nyɨgende nyɨyakangɨrɨtsye eNgʉlʉ Mbʉya ko batsene.
Amanyɨthʉma nyɨfʉlɨre bo balɨ mo muliki bw’omwatsɨ ko bamɨnʉlwa.
N’esombumi natho ko salola.
Na bo banubibwa babye n’ɨyɨbwara.
19 N’ɨfʉlɨra abandʉ b’omwatsɨ k’omwaka amahika wo Nyinya-kowethʉ w’akanganiamo obʉbʉya bʉwe ko bandʉ.4:19 Soma Isaya 61:1-2.»
20 Honyuma kw’aho, Yesʉ mwabʉngabʉnga ekɨtabo mwahakyo omukoli w’omo sinakoki mwayikala. N’abandʉ boshi babyaga bikere mo sinakoki eyo, mobamʉhandako amesho.
21 Aho Yesʉ mwathanga ɨbwɨrabo athɨ: «aMashako Abuyirire mwamonvwa wo nyɨthoka ɨbasomera amabererera munobwire.»
22 Abandʉ boshi bagenda abamogera Yesʉ n’ɨshweka bʉshana n’ebɨnwa bɨbʉya ebyo agenda anegena. Mobathanga ɨnegena bathɨ: «Oyu ndɨ nɨ mʉgala wa Yosefʉ!»
23 Yesʉ mwabwɨrabo athɨ: «Nyetsi kundu mwandanyɨthega mo mushinga ono, owanegenire athɨ: "Mʉshake, yilamye wowene!" Kandɨ mwanyɨbwɨra mʉthɨ: "Mothwonvwa ebyoshi wakolaga ɨKaperenaʉmʉ, kolabyo n’omo muyi enyu ono."» 24 Mwashʉba bwɨrabo kandɨ athɨ: «Kwenene hathalɨ mʉmɨnyeretsɨ yo unakokibwa kʉbʉya ko wabo. 25 Kwenene enyɨbabwɨra nyɨthɨ mo kɨhʉgo ky’iIsiraeli mwabyaga bashʉmbakatsɨ bangɨ mo mʉgʉlʉ w’omʉmɨnyeretsɨ Elia. Mo mʉgʉlʉ oyo envʉla moyamala mɨaka ishathu na myetsɨ ndathʉ bʉthawa. Mokwabya nzala nzɨbʉ mo kɨhʉgo kyoshi.4:25 Soma 1Bamɨ 17:1-7. 26 Mo bashʉmbakatsɨ boshi abo, Gongo mwathathʉma Elia awathikye mʉgʉma wa kʉbo. Hewethuwe mwamʉthʉma kʉ mʉgʉma w’oko muyi w’ɨSarepata mo kɨhʉgo ky’eSitona.4:26 Soma 1Bamɨ 17:8-16.
27 «Kandɨ mo kɨhʉgo ky’iIsiraeli mwabyaga babenzɨ bangɨ mo mʉgʉlʉ w’omʉmɨnyeretsɨ Elisha. Hewethuwe mohathabya n’omʉgʉma wa kʉbo w’etsɨbwaga, he Namani mʉsha w’omo kɨhʉgo ky’eSuria.4:27 Soma 2Bamɨ 5:1-14.»
28 Abandʉ boshi bo babyaga mo sinakoki eyo babere bonvwa ebyo mobakapɨkɨra. 29 Mobimana, mobaligitha Yesʉ mo muyi, mobamʉkʉrɨra ko kathwa k’omuyi oyo abyaga ahimbireko. Niabashondya bamukunire mo muthiri. 30 Hewethuwe Yesʉ mwasheshera mo kathi-kathi kabo, n’ɨyɨgendera.