Mateus 23

Mahano bʉshana n’aBafarisayo

1 Honyuma kw’aho, Yesʉ mwabwɨra omuhindano hagʉma n’abɨga bʉwe athɨ: 2 «aBakangɨrɨtsya b’oMʉgomba n’aBafarisayo mobahabwa maka w’erɨkangɨrɨtsya abandʉ bw’oMʉgomba wa Mʉsa. 3 Aho lɨtholere nimwashikyabo n’ɨkola ebyoshi abababwɨra, hewethuwe mʉthakwamaga emɨkolere yabo, kʉshangwa ebyo abanegena bɨthalɨ byo banakola. 4 Abanakana mɨtsɨgo mɨtsɨtho, n’ihekyaro abandɨ bandʉ ko bithigo, hewethuwe ɨbo bene-bene abanathɨnda ishukyaro mu munwe bʉshana bangɨrɨrebo. 5 Ebyoshi abanakola, abanakolabyo bʉshana bayikangye ko bandʉ. Aho, abananenehya ehɨkopo hɨrɨmo hɨbabɨ hishakireko eBɨnwa Bibuyirire hyo banamɨnɨra ko bʉsʉ na ko minwe. Na kandɨ, abanambala ropo eso abanayɨra emɨsɨke yatho mo mɨre-mɨre.*23:5 Ngɨmba siwithe mɨsɨke mɨre-mɨre: Ɨkwamana n’emɨbere eyi, aBafarisayo bagenda abayikangania ko bashikitsye amathegeko wa Gongo. Shʉnga Ɨthoka 13:9; 16; Mɨganzo 15:37-41. 6 Atsiire ikala mo myanya y’embere mo linye na ko bifumbi by’embere mo sosinakoki. 7 Atsiire ɨketsɨbwa na lʉkengerwa mo mihindano nɨahʉlwa n’abandʉ mo Bakangɨrɨtsya.»

8 «He imwe, mʉthatsɨɨraga abandʉ babwahʉlemo "mʉkangɨrɨtsya," kʉshangwa mʉlɨ bagala kʉ bagala na muwithe Mʉkangɨrɨtsya mʉgʉma. 9 Hano ishi, muthanalinda mwahʉla mʉndʉ mo "Thatha," kʉshangwa muwithe Thatha mʉgʉma, nɨ yo ʉlɨ elʉbʉla. 10 Na kandɨ mʉthɨmɨraga abandʉ babwahʉlemo "Bakʉlʉ," kʉshangwa muwithe Mʉkʉlʉ mʉgʉma, naye nɨ Kirisito. 11 Hewethuwe omʉkʉlʉ mw’imwe atholere niabya mʉgombe enyu. 12 Bʉlɨ mʉndʉ yo wandayihamya andakimibwa, hewethuwe obʉlɨ mʉndʉ yo uyihohya andahamibwa.»

Yesʉ athakɨra aBakangɨrɨtsya b’oMʉgomba n’aBafarisayo

13 «Bʉhanya kw’imwe, Bakangɨrɨtsya b’oMʉgomba na kw’imwe Bafarisayo, bayimbya! Omʉkɨngɨra abandʉ b’oluyi lw’oBwamɨ bw’elʉbʉla, imwe bene mʉthalɨ omwɨngɨra mʉbo, n’abo bashondya ɨngɨra mʉbo omʉkɨkɨrabo.» [14 «Bʉhanya kw’imwe, Bakangɨrɨtsya b’oMʉgomba n’aBafarisayo, bayimbya! Omʉnanyaga abashʉmbakatsɨ bw’ebyo bawitheko n’ɨyɨra mɨshabe mɨre-mɨre bʉshana muyikanganie. Bʉshana n’ekyo mwandasohwa kʉtsɨbʉ*23:14 omʉlondo ono athalɨ mʉ mashako magʉma wa kera.!»]

15 «Bʉhanya kw’imwe, Bakangɨrɨtsya b’oMʉgomba n’aBafarisayo, bayimbya! Omʉnaya ahoshi n’ɨshabʉka esongetsɨ, n’ɨtsʉka mo bɨhʉgo bʉshana mʉbɨndʉle mʉndʉ mʉgʉma abye mwɨga enyu. Na mwamamʉbona nɨmwamʉyɨramo mʉndʉ yo atholere esohi y’okw’ɨrʉnga ngendo kabɨrɨ kʉbalenga*23:15 Hano Yesʉ akemera aBafarisayo bathahiraga abo bathɨkɨrɨtsya mw’ishikya oMʉgomba wo kʉtsɨbʉ, nɨalemana kʉshangwa niamabya wa kahatho..»

16 «Bʉhanya kw’imwe, bashondotsɨ mbumi! Omʉnanegena mʉthɨ: "Mʉndʉ amalahɨtsya ko Nyʉmba ya Gongo, ekyo kɨthalɨ kɨndʉ, hewethuwe amalahɨtsya ko horo y’omo Nyʉmba ya Gongo, lɨtholere nɨabereretsya erɨlahɨtsya eryo." 17 Imwe thʉhʉmo na mbumi! Kɨhe kyo kirengitsye kirikyabo, ehoro kʉtse eNyʉmba ya Gongo yo yɨnayɨra ehoro mo nyibuyirire? 18 Kandɨ omʉnegena mʉthɨ: "Omʉndʉ amalahɨtsya ko lʉtarɨ, aho hathalɨ ki, hewethuwe amalahɨtsya ko bɨhembo byo bɨrɨ ko lʉtarɨ, oyo atholere ɨbereretsya erɨlahɨtsya lɨwe." 19 Imwe mbumi! Iki kyo kilengitsye ekɨndɨ, ebɨhembo, kʉtse olʉtarɨ lo lʉnayɨra ebɨhembo mo bibuyirire? 20 Kwenene, yo wamalahɨtsya kw’ɨtsɨna ly’olʉtarɨ, nɨamalahɨtsya kʉlo n’ebyoshi bɨrɨ kʉlo. 21 Yo wamalahɨtsya kw’ɨtsɨna ly'eNyʉmba ya Gongo, nɨamalahɨtsya kʉlyo na kʉ Gongo yo wikeremo. 22 Yo wamalahɨtsya kw’ɨtsɨna ly’olʉbʉla nɨamalahɨtsya n’oko lʉthebe lwa Gongo na Gongo yo wikere kʉlo*23:22 Lingania na Isaya 66:1; Matayo 5:34..»

23 «Bʉhanya kw’imwe, Bakangɨrɨtsya b’oMʉgomba n’aBafarisayo, bayimbya! Omunahulukya kɨgʉma k’ikumi kya myaka ya nyinyi.*23:23 Soma Balawi 27:30; Ɨbʉka Mʉgomba 14:22. Hewethuwe omʉnasʉnzʉgʉra ebishikibwe mo Mʉgomba, nga obʉthʉnganene, eshashi, n’olwɨkɨrɨtsyo. Nɨ ebyo byo mwangagendire omʉkola, bʉthasʉnzʉgʉra ebɨndɨ ebyo. 24 Imwe bashondotsɨ mbumi! Omunatsuya eby’erɨshoma bʉshana muthokyemo eshuki, hewethuwe omʉmera engamɨa!

25 «Bʉhanya kw’imwe, Bakangɨrɨtsya b’oMʉgomba n’aBafarisayo, bayimbya! Omʉnetsya embʉga y’olwatha n’embale, hewethuwe mo kathi kabyo nimotswire bɨndʉ by’obwɨtsɨ na by’esongʉmbʉ mbɨ. 26 Ɨwe Mufarisayo mbumi! Thanga wetsya mo kathi k’olwatha aho n’embʉga yalo nɨyera.

27 «Bʉhanya kw’imwe, Bakangɨrɨtsya b’oMʉgomba n’aBafarisayo, bayimbya! Mushoshire nga masɨnda athahakwa mbemba.*23:27 Amasɨnda w’aBayuta anahakwa rangi ya mʉshohe, bʉshana abandʉ bathafʉlaga kʉwo mo kɨro na bathahatsyaga, na bathangandashabwa ndihi y’ɨetsɨbwa. Embʉga ashoshire kʉbʉya, hewethuwe omwishi, otswiremo mafʉha wa baholi na bʉlɨ mʉhanda wa mɨkonzɨ. 28 Nemwe kuthyo, embʉga omʉshʉngɨka mo mesho w’abandʉ nga bandʉ bathʉnganene, he mo kathi kenyu mwotswiremo obuyimbya n’ebɨbɨ.

29 «Bʉhanya kw’imwe, Bakangɨrɨtsya b’oMʉgomba n’aBafarisayo, bayimbya! Omunahimba amasɨnda w’abamɨnyeretsɨ, n’ɨhaka mbemba ko masɨnda w’abathʉnganene. 30 Nemwe omʉnegena mʉthɨ: "Thwangabereho mo bɨro by’abo thatha-kʉlʉ, thuthangayire mo nama yabo y’eritha abamɨnyeretsɨ." 31 Aho, imwe bene-bene mwamɨkɨrɨtsya ko mʉlɨ bana b’abo bithaga aBamɨnyeretsɨ. 32 Aho, mʉhɨrɨke, mʉmalɨrɨre ebyo bo sho-kʉlʉ benyu bathangaga! 33 Imwe nzoka, lʉbʉtho lwa bɨkwetha! Mʉthɨ ko mwandalama esohi y’okw’ɨrʉnga? 34 Ekyo kyo kɨreka nɨnyabathʉmɨra bamɨnyeretsɨ, na bangʉmwa na bakangɨrɨtsya. Mwanditha bagʉma ba mʉbo na mwandabamba abandɨ ko mɨsalaba, n’abandɨ mwandahumbabo mbasha mo sosinakoki senyu na mwandaliithabo ɨthoka muyi kʉ ʉndɨ. 35 Aho, omʉsasɨ w’abandʉ bathʉnganene, ow’asheshawa bʉtsɨra bɨbɨ hano ishi, ɨthoka kʉ Abeli mʉthʉnganene ihika kʉ Sakarɨa mʉgala wa Barakia yo mwithiraga ho kathi k’ahabuyirire n’olʉtarɨ andabya ko mithwe enyu. 36 Kwenene enyɨbabwɨra, ebyoshi ebyo byandabya ko muthwe w’olʉgero lwa munobwire!»

Yesʉ alɨrɨra omuyi w’ɨYerʉsalemʉ

37 «Yerʉsalemʉ, Yerʉsalemʉ, ɨwe unitha aBamɨnyeretsɨ n’itha mʉ mabwe bo Gongo akʉthʉmɨra! Ngendo nyɨngɨ monyashondya ihindania abana bawe hofɨ nangye ng’engoko ko inahindania ehipyege hyaro mo bipupa byaro, hewethuwe momwathɨnda! 38 Aho, mʉmɨnye ko enyʉmba enyu yabya kihuma.*23:38 Soma Yeremia 22:5. 39 Kʉshangwa enyɨbabwɨra nyɨthɨ ɨthoka munobwire mʉthɨndashʉbe nyɨlolako ihika ko ndambi mwandanegena mʉthɨ: "Agashanɨrwe yo uhika kw’ɨtsɨna lya Nyinya-kowethʉ!"*23:39 Soma Saburi 118:26.»