1 Ŵanache ŵachilume ŵa che Yakubu ŵaŵajawile nao ku Misili, kila mundu ni nnango wakwe ŵaliji, 2 che Lobeni ni che Simeoni ni che Lawi ni che Yuda, 3 ni che Isakali ni che Sabuloni ni che Benjamini, 4 ni che Dani ni che Nafutali ni che Gadi ni che Asheli. 5 Iŵelesi yose i che Yakubu yaliji ŵandu sabini. Katema ko che Yusufu ŵaliji alongolele kutama ku Misili.

6 Nipele che Yusufu ŵajasiche, achapwakwe nombe ni chiŵelesi chila chose chajasiche. 7 Nambo iŵelesi yao, yaani Ŵaisilaeli ŵapundile kuŵelekana nnope, ŵatupile ni kukola machili kwannope ni ŵajenele mu chilambo chose cha Misili.

8 Nipele jwatyochele mwenye jwine kutawala ku Misili jwanganammanyilila che Yusufu. 9 Nombejo ŵaasalile ŵandu ŵakwe, "Nnole, Ŵaisilaeli yatite pakutupa, nombe akututenda tukole lipamba. 10 Kwa iliyose tusose yachitujile pakwapungusya, ni kwasiŵila akapunda kutupa. Naga ngaiŵa yele, jakopochelaga ngondo, chakamulangane ni ŵammagongo ŵetu ni kuputana ni uwe ni kuchitila chilambo chi."

11 Nipele Ŵamisili ŵaaŵisile ŵakwimilila kuti ŵajimilile Ŵaisilaeli, ni kwalagasya kwa masengo gakulimba. Ŵaisilaeli ŵatawile misi ja kugosela mbiko, misi jo ni aji, Pitomu ni Lamesesi. 12 Nambo iŵatiji pakulagaswa, Ŵaisilaeli ŵaŵelekene ni kupunda kwenela pachilambo. Kwayele Ŵamisili ŵaajogwepe kwannope Ŵaisilaeli. 13 Ŵamisili ŵaatendekasisye Ŵaisilaeli masengo pangaakolela chanasa. 14 Ŵautesile utame wao uŵe wa kulimba, kwa kugapanganya masengo ga kukolosya chokaa, ni kugumba matofali, ni masengo gose ga mmigunda. Ŵamisili ŵaatendekasisye Ŵaisilaeli masengo kwaukakatima.

15 Nipele mwenye jwa ku Misili ŵaasalile che Shifula ni che Pua ŵaŵaakamusyaga achakongwe wa Chiebulania paakuŵeleka, 16 ŵatite, "Pankwaŵelesya achakongwe wa Chiebulania, iŵaga nkuwona aligopwele mwanache jwannume mummulaje, nambo, iŵaga jwankongwe munneche jwanjumi." 17 Nambo pakuŵa ŵakuŵelesya ŵala ŵaachimbichisyaga Akunnungu, nganatenda mpela iŵalajichisye mwenye. Nambo ŵaalekaga ŵanache achalume ali ŵajumi. 18 Nipele mwenye ŵaaŵilasile ŵakuŵelesya ŵala, ni kwausya, "Kwa chichi ntesile yeleyo? Kwalechelela ŵanache achalume ŵajumi?" 19 Ni ŵanyawo ŵanjanjile mwenye, "Achakongwe ŵa Chiebulania nganaŵa nti achakongwe ŵa Chimisili, pakuŵa ŵanyawo akulimbangana ni akuŵeleka akanaŵe kwika ŵakuŵelesya."

20 Nombe Akunnungu ŵaatendele yambone ŵakuŵelesya ŵala, ni Ŵaisilaeli ŵapundile kutupa ni kukola machili nnope. 21 Ligongo ŵakuŵelesya ŵala ŵaachimbichisyaga Akunnungu, Akunnungu ŵaatendekasisye akole ŵanache ŵao achinsyene. 22 Mbesi mwenye ŵalamwile ŵandu ŵakwe wose kuti, "Mwanache jwannume juchapagwe mwa Ŵaebulania mumponyele mu lusulo lwa Naili, nambo jwali jwankongwe munneche jwanjumi."