1 Ambuje Akunnungu ŵansalile che Musa, 2 "Mumichile pajika ŵanache achalume ŵa kwitiwo wose, pakuŵa ŵanache achalume ŵa kwitiwo ŵa Ŵaisilaeli ni mikambaku jandanda kupagwa, wose ali ŵangu."

3 Che Musa ŵasalile ŵandu kuti, "Nlikumbuchile lyuŵa li! Lyuŵa limwakopweche ku Misili kwele kumwaliji achikapolo. Ambuje Akunnungu ŵankopwesye ŵanyamwe ku Misili kwa machili gao gamakulu. Palyuŵa li nkalya nkate wetaje amila. 4 Ŵanyamwe nkutyokangana lelo mu chilambo cha Misili chi, lyuŵa lyaandanda pa mwesi waukuŵilanjikwa Abibu. 5 Ambuje Akunnungu pachachinnyichisya ku ilambo yaakutama Ŵakanaani ni Ŵahiti ni Ŵaamoni ni Ŵahivi ni Ŵayebusi, ilambo iŵalanjile achachekulu ŵenu kuti tachimpa ŵanyamwe. Chilambo chachili ni chajila chachikufai kulanga ilango yejinji ni kulima, nkatendeje chindimba kila chaka paukwika au mwesi wu. 6 Nkalyeje mikate jangataga amila kwa moŵa saba. Pa lyuŵa lya saba nkatende chindimba cha kwachimbichisya Ambuje Akunnungu. 7 Mmoŵa saba go chinchilya mikate jangataga amila. Pakaoneka nkate wauli ni amila pasikati jenu, namose kukaŵa ni amila mmipika ja chilambo chenu. 8 Pa lyele lyuŵa lyo tinchasalila ŵanache ŵenu, ‘Tukutenda yose yi kukumbuchila iyaitesile Ambuje Akunnungu paŵatukoposyaga ku Misili.’ 9 Chindimba cho chichiŵe mpela chindu chakulitaŵa pa nkono wenu pane pa usyo jenu, chichinkamusye kuendelechela kunkumbusya kukunguluchila ni kulijiganya Malajisyo ga Ambuje Akunnungu, pakuŵa Ambuje Akunnungu ŵankopwesye ku Misili ni nkono wao wauli ni machili. 10 Ntendeje chindimba kila chaka, pa katema kakaŵichikwe."

11 Che Musa ŵajendelechele kwasalila ŵandu, "Ambuje Akunnungu patachinyichisya pa chilambo cha Ŵakanaani ni kumpa mwanya chilambo cho mpela yannanjile ŵanyamwe ni achambuje ŵenu kumpa, 12 chimwape Ambuje Akunnungu kila mwanache jwa chilume jwa kwitiwo. Sooni chimwape Ambuje Akunnungu kila nkambaku waandanda kupagwa wa ilango yenu. Yose yo ili ya Ambuje Akunnungu. 13 Kila mwanache jwaandanda kupagwa jwa mbunda chimummombole kwa ngondolo, nambo iŵaga ngankusaka kummombola, muntemangule lukosi. Sooni chimwawombole ŵanache achalume ŵa kwitiwo mu ŵanache ŵenu. 14 Achiŵana ŵenu pachammusye kanyuma achitiji, ‘Chelechi malumbo gakwe ichichi?’ Chimwajanje, ‘Ambuje Akunnungu ŵatukopwesye ku Misili kutwaliji mu ukapolo kwa machili ga gamakulu. 15 Mwenye kwa makani gakwe, paŵakanile kutulechela tutyoche mu chilambo chakwe, Ambuje Akunnungu ŵaauleje ŵanache achalume ŵao ŵa kwitiwo. Ŵanache ŵa ŵandu ni ŵa ilango yao. Kwa ligongo lyo, uŵeji tukumpelechela Ambuje Akunnungu mbopesi ja kila nkambako waandanda kupagwa wa ilango yetu nambo tukwawombola ŵanache achalume ŵa kwitiwo. 16 Chindu cho chichiŵe mpela chindu chakutaŵa pa nkono pane pa usyo penu, kunkumbusya iŵatite Ambuje Akunnungu pakutukoposya ku Misili kwa machili gao gamakulu.’ "

17 Mwenye paŵalechele Ŵaisilaeli ajaule, Akunnungu nganiŵapitisya litala lyakupitila ku chilambo cha Ŵafilisiti, namose lyaliji litala lyalijipi. Pakuŵa Akunnungu ŵatite, "Iŵaga ŵandu ŵa chasimane ni ngondo, chapitikusye nganisyo syao ni kuujila ku Misili," 18 Pamalo pakwe, Akunnungu ŵaalongwesye litala lya kusyungula lyalikupitila mwipululu kuja ku bahali ja Shamu. Ŵaisilaeli ŵakopweche ku Misili ali aliŵichile chile kwa ngondo.

19 Che Musa ŵagajigele maupa ga che Yusufu gala, pakuŵa che Yusufu ŵaalumbilisye nnope Ŵaisilaeli achitiji, "Akunnungu tachinkamuchisya ŵanyamwe ntyoche ku Misili. Pachityochele yeleyo njigale maupa gangu ni kwaula nago."

20 Nipele, Ŵaisilaeli ŵatyosile ku Sukoti ni kwaula ku Etamu, mungulugulu mwa lipululu ni kutaŵa masakasa gao kweleko. 21 Paŵajendaga katema ka muusi Ambuje Akunnungu ŵaalongolele ni chiimila cha liunde kwalosya litala. Katema ka chilo ŵaalongolele ni chiimila cha mooto kwalanguchisya, kuti akombole kwenda muusi ni chilo chakwe. 22 Chiimila cha liunde chila nganichityoka muusi namose chiimila cha mooto nganichityoka chilo, paujo pa ŵandu wo.