1 AMBUJE ŵaasalile che Musa, 2 "Une naasagwile che Besaleli, mwanache ju che Uli, jwali mwanache ju che Huli, jwa lukosyo lwa Yuda, 3 noneji naagumbesye Mbumu jwa Akunnungu. Naapele ukombole ni lunda ni umanyilisi mu uwele wauli wose wa masengo ga, 4 kuti aganisye yakuti kulembalemba indu yauŵeleuŵele ni kwa kutumia madini ga sahabu, feza ni shaba akolosye indu yo. 5 Naapele umanyilisi wa kukatanya maganga ga ndalama ni kugaŵika mu ikodobwa, ni kusepa itela, ni atumiche kwa masengo gane gose ga ufundi. 6 Sooni nasagwile che Oholiabu mwanache ju che Ahisamaki, jwa lukosyo lwa Dani, kuti waakamusye. Iyoyopeyo naapele umanyilisi wekulungwa ŵandu wane kupanganya kila chindu chinanlajisye mmwe: 7 Lisakasa lya Kusimanilana ni Lisanduku lya Lilangano pamo ni chiunichilo chakwe ni yose yaili mu Lisakasa, 8 meza ni yoombo yakwe, chakuŵichila lumuli cha sahabu jakusalala ni yoombo yakwe yose, chilisa cha kututumichisya ubani, 9 chilisa cha kutyochesya mbopesi jakutinisya ni yoombo yakwe yose pamo ni ntala wakunaŵila ni chitamichilo chakwe, 10 pamo ni yakuwala yailuchikwe ya jwambopesi che Haluni ni yakuwala ya achiŵanagwe katema ka kupanganya masengo ga umbopesi, 11 mauta gakwajitilila ŵambopesi pamo ni ubani waukununjila yambone wa peuto papaswela. Yose yo chinlinganye nti indite pakunlajisya."

12 AMBUJE ŵasalile che Musa, 13 akaasalile Ŵaisilaeli, "Nkamulisye Moŵa gangu ga Kupumulila. Chele chichiŵe chimanyisyo pasikati jangu ni ŵanyamwe kwa iŵelesi yenu yose yaikwika, mmanyilile yakuti Une Ndili AMBUJE junansagwile ŵanyamwe mme ŵandu ŵangu. 14 Chinkamulisye Lyuŵa lya Kupumulila pakuŵa lili lyuŵa lyeswela kukwenu. Jwalijose juchalinyakasye lyuŵa lyo aulajikwe. Iyoyo ni mundu juchapanganye masengo pa lyuŵa lyo, ngasaŵalanjikwa kuŵa jumo mwa ŵandu ŵangu. 15 Chimpanganye masengo moŵa sita, nambo pa lyuŵa lya saba lyele lili Lyuŵa lya Kupumulila ni lyuŵa lyeswela kwa AMBUJE. Mundu jwalijose juchapanganye masengo pa lyuŵa lyo aulajikwe. 16 Kwayele Ŵaisilaeli chakamulisye Lyuŵa lya Kupumulila mu iŵelesi yao yose, lili lilangano lya moŵa gose pangali mbesi. 17 Chindu chi chichiŵe chimanyisyo pasikati jangu ni Ŵaisilaeli moŵa gose pangali mbesi, pakuŵa Une AMBUJE kwa moŵa sita nagumbile kwinani ni chilambo, ni pa lyuŵa lya saba nalesile kupanganya masengo ni kupumulila."

18 AMBUJE paŵamasile kuŵecheta ni che Musa pa chikwesya cha Sinai, ŵaapele che Musa ibao iŵili ya maganga yati Akunnungu ŵalembile makanyo kwa chala chakwe nsyene.