1 "Mmwe che Musa munjigale achimwene jwenu che Haloni pamo ni achiŵanagwe, che Nadabu ni che Abihu ni che Eleasali ni che Isamali, pasikati ja Ŵaisilaeli kuti andumichile pa masengo ga umbopesi. 2 Mwatotele che Haloni iwalo yeswela kuti alolechele jwankulu ni jwakuchimbichikwa. 3 Mwalajisye mafundi wose unaapele umanyilisi pa masengo gao, ŵaakolochesye iwaalo yo, kuti aŵichikwe pajika kwa ligongo lya masengo ga umbopesi. 4 Mwasalile ŵaatotele kasaku kakuwala pantima, likoti lyamwana, ni mwinjilo weleu, nkogo wakusalala ni chilemba ni mpumbulu. Che Haloni ni achiŵanagwe ŵachilume chaachiwala kuti andumichile pamasengo ga umbopesi. 5 Mafundi wo atumie sahabu ni usi wa langi ja chibuluu ni wa sambalau ni jechejeu pamo ni nguo jeswela mbee."

6 "Chaapanganye nguo jakuunichila pantima jakuwala jwambopesi kwa nguo jeswela mbee jajiluchikwe kwa usi wa sahabu ni wa chibuluu ni wasambalau ni wechejeu ni kukoloswa yambone. 7 Chikuŵe ni ipande iŵili nti migoji pekoyo jitotekwe pamo pachanya nguo jakuunichila pantima kila upande, kuti akombole kulitaŵa. 8 Mpumbulu wepote yambone nnope pachanya pakwe, ukolochekwe kwa nguo jeswela mbee jepotekwe ni kutotekwa kwa usi wa sahabu ni chibuluu ni sambalau ni wechejeu ni kuŵa chindu chimo ni nguo jakuunichila pantima jo. 9 Nipele njigale maganga gaŵili ga sadoniki gati chinsepele pachanya pakwe meena kumi na mbili ga ŵanache ŵachilume ŵa che Yakubu. 10 Meena sita nsepele mu liganga lyaandanda malinga ni yatite kukuyana pakupagwa, ni gane go mu liganga liine malinga ni yatite kukuyana pakupagwa. 11 Nsepele meena go pachanya maganga nti jwakusyana yakuti kuŵika chimanyisyo. Nipele ngalembe maganga go ni kugaŵanila kumo ni ikodobwa ya sahabu. 12 Ngajigale maganga go ni kugamatila mu ikodobwa ni ikodobwa yo ntaŵilile pa ipande iŵili ya mmakoyo ya nguo jakuunichila pantima nti chikumbuchisyo kwa ngosyo kumi na mbili sya Isilaeli. Che Haloni chawale meena go pekoyo pakwe paujo pangu une AMBUJE kuti chiŵe chikumbuchisyo. 13 Nkolosye ikodobwa iŵili ya sahabu, 14 ni mikufu jiŵili ja sahabu jakusalala jepotekwe nti ngoji. Mmatichile mikufu jo mu ikodobwa yo."

15 "Nkolosye kasaku kakuwala pantima ka kulamulila, nkolosye yambone nti yatite kutotekwa nguo jakuunichila pantima jo. Nkolosye kwa nguo jeswela mbee jepotekwe ni kutotekwa kwa usi wa sahabu ni chibuluu ni sambalau ni wechejeu. 16 Kasaku ko kaŵeje kepinde kaŵili ni kalandene uleu wakwe ni nchijipi mwakwe kwa sentimita ishilini na mbili. 17 Kasaku ko mmiche misitali ncheche ja maganga ga ndalama. Msitali waandanda chiuŵe wa maganga ga akiki, ni topasi ni alumasi jechejeu. 18 Msitali waaŵili mmiche maganga ga sumalidi ni johali ja samawiti ni alumasi, 19 msitali waatatu mmiche maganga ga yasinto ni akiki jechejeu ni ametisito, 20 ni msitali wancheche mmiche maganga ga sabalajadi ni sadoniki ni yasipi. Maganga gose go ngatotele mu kasaku ko nli mmatile mu ikodobwa ya sahabu. 21 Chipaŵe ni maganga kumi na mbili gachigaŵe ni meena mugaŵelele meena ga ŵanache ŵa che Yakubu. Kila liganga chilisepelwe nti chimanyisyo chachili ni liina limo mwa meena ga ngosyo kumi na mbili sya Isilaeli. 22 Nkapanganyichisye kasaku ka pantima mikufu ja sahabu jakusalala jajipotekwe nti ngonji. 23 Nkolosye pete siŵili sya sahabu ligongo lya kuŵika pa kasaku kakuwala pantima, ni kusitaŵilila pa songa siŵili sya kasaku kakuwala pantima ko. 24 Mikufu jiŵili jajipotekwe jo ntaŵilile mu pete sisili pa songa siŵili sya kasaku kakuwala pantima ko. 25 Songa siŵili sine sya mikufu jiŵili jo chimmatile mu ikodobwa iŵili ya mmakoyo mwa nguo jakuunichila pantima. 26 Nkolosye pete siŵili sya sahabu ni kusitaŵilila mu songa siŵili sya paasi chamunkati mwa kasaku kakuwala pantima kuŵandikana ni nguo jakuunichila pantima. 27 Nkolosye pete sine siŵili sya sahabu ni kusikamulisya chapaujo pa songa sya paasi pa ipande iŵili ya nguo jakuunichila pantima, peuto papakulumbikana ni mpumbulu wanchiunu wauluchikwe kwakusalalila. 28 Nlumbikanye kasaku kakuwala pantima ko pa nguo jakuunichila pantima kwa kuŵika pete syakwe ni nguo jakuunichila pantima kwa ngonji sya chibuluu, ilumbikanywe ni aula mpumbulu kuti kasaku ko kakatyoka ni kulekangana ni nguo jakuunichila pantima."

29 "Katema che Haluni pakwinjila Peuto Papaswela, awaleje kasaku kakuwala pantima kakalembekwe meena gose ga ngosyo sya Isilaeli, kuti une AMBUJE naakumbuchile ŵandu ŵangu moŵa gose. 30 Mu kasaku kakuwala pantima ko mmiche tuganga tuŵili twatukuŵilanjikwa Ulimu ni Tumimu, kuti awaleje che Haluni kila pakwika paujo pa AMBUJE, kuti akombole kumanyilila chinguchisaka une AMBUJE kwa Ŵaisilaeli."

31 "Ntote nkogo wakuwala munkati mwa nguo jakuunichila pantima kwa chitambaa cha buluu. 32 Nkogo wo chipaŵe ni pakwinjichisya ntwe pasikati jakwe, ni mumbali lipesa lyo ntote mwakulimbila kusyunguchisya lipowo lyose kuti lipowo lyo likapapuka. 33 Mu lujenje lwa nkogo wo chinkolosye indu mpela makomamanga ga chibuluu, ni sambalau ni gechejeu gachigalelembe kusyungula lujenje, sooni chikuŵe ni njuga sya sahabu jakusalala pasikati ja makomamanga. 34 Mmiche mwakupisyangana njuga ni makomamanga kusyungula lujenje lwa nkogo wose. 35 Che Haluni chachiwala nkogo wo katema kakupanganya masengo ga umbopesi. Kusona kwa njuga syo chikupikaniche katema kakwinjila Peuto Papaswela mbujo mwa AMBUJE ni paakutyoka kuti akasaulajikwa."

36 "Mpanganye chibati kwa sahabu jakusalala ni kulemba nti chimanyisyo pachanya pakwe maloŵe gagakuti, ‘Atyosekwe kwa AMBUJE.’ 37 Chibati cho chintaŵilile paujo pa chilemba cho kwa ngonji sya chibuluu. 38 Che Haluni awaleje chibati cho pausyo jakwe, ni pakutenda yeleyo tajigale ileŵo yose yaikutyochela katema Ŵaisilaeli pakumbelechela mbopesi syeswela, noneji chinjisikunda mbopesi syao."

39 "Mwaaluchile nkogo wekolosye kwa nguo jeswela mbee ni kunluchila chilemba kwa nguo jeswela mbee, ni mpumbulu wa nguo weluchikwe yambone."

40 "Ŵanache ŵa che Haluni mwakolochesye mikogo, mipumbulu ni ipeu kuti alolechele kuti akwete ukulu ni luchimbichimbi. 41 Mwawasye achimwene jwenu che Haluni ni ŵanache ŵao wachilume mikogo jo. Nipele mwataje mauta ga mseituni ni kwatyosya kwa masengo ga umbopesi. 42 Mwatotele budula kwa nguo jeswela mbee syakuwala munkati syakutandila mchiunu kupelela mu yiiga, kuti akatama matakope. 43 Che Haluni ni ŵanache ŵakwe chawale yeleyo kila pakwinjila mu Lisakasa Lyakusimanilana ni Akunnungu pane pakuŵandichila chilisa katema kakundumichila Peuto Papaswela. Kwayele ngaaulajikwa pakuŵa atakwile. Lyelelyo chiliŵe lilajisyo lya moŵa gose ku che Haluni ni iŵelesi yakwe."