1 Nipele che Besaleli ŵakolosisye alila lisanduku kwa ibao ya nsonobali, lyalili ni uleu wa sentimita mia moja na kumi ni nchijipi sentimita sitini na sita, ni lisusa lyakwe sentimita sitini na sita. 2 Ŵaliunichile lisanduku lyo kwa sahabu jakusalala paasa ni munkati ni kusyunguchisya nchenjeka wa sahabu mbande syose. 3 Nipele ŵakolosisye pete ncheche sya sahabu, ŵasitaŵilile mu ngongolo ncheche sya lisanduku lyo, pete siŵili upande umo ni pete siŵili upande wine. 4 Ŵakolosisye itela iŵili yakunyakulila kwa chitela cha nsonobali ni kuunichila kwa sahabu. 5 Itela yo ŵaijinjisye mu pete syasili mbande syose kuti anyakulile lisanduku lyo. 6 Nipele ŵakolosisye chiunichilo cha lisanduku lyo kwa sahabu jakusalala chati pane pakuŵilanjikwa peuto pa chanasa, uleu wakwe waliji sentimita mia moja na kumi ni nchijipi mwakwe sentimita sitini na sita. 7 Nipele ŵasyanile kwa sahabu yepanganyikwe iŵili yaili ni mapapiko yaikuŵilanjikwa makelubi ni kuiŵika mbesi siŵili sya chiunichilo cho. 8 Chepanganyikwe chimo ŵachiŵisile kumbesi upande umo ni chine ŵachiŵisile upande wine kumbesi, ŵaipanganyisye ili ilumbikene ni chiunichilo cha lisanduku. 9 Yepanganyikwe yo yatemi kwakulolegana ni mapapiko gao gatambasukwile pachanya chiunichilo cha lisanduku ni kuchiunichila ni jwalijose ŵaliji nkuchilola chiunichilo cho.

10 Ŵakolosisye sooni mesa kwa chitela cha nsonobali, uleu wakwe sentimita semanini na nane ni chanchijipi sentimita alobaini na nne ni lisusa lyakwe sentimita sitini na sita. 11 Ŵajiunichile mesa jo kwa sahabu jakusalala ni kusunguchisya nchenjeka wa sahabu. 12 Ŵakolosisye chibao chachili ni ujipi milimita sabini na tano, ni ŵajisunguchisye mesa jila nchenjeka wa sahabu. 13 Ŵakolosisye pete ncheche sya sahabu kwaligongo lya mesa ni kusitaŵilila mu ngongolo syakwe ncheche. 14 Pete syo syataŵililwe kuŵandikana ni nchenjeka kuti situmiche kujinjisya aila itela yakunyakulila mesa. 15 Ŵakolosisye itela yakunyakulila mesa jo kwa chitela cha nsonobali ni kuiunichila kwa sahabu. 16 Ŵakolosisye yoombo ya sahabu jakusalala yakuŵika pachanya mesa: Mbale ni chindu chakuŵichila ubani ni mitala jakunaŵila ni bakuli sya mbopesi sya chakung'wa.

17 Ŵakolosisye kwa sahabu jakusalala chindu chakuŵichila lumuli, chitamichilo chakwe ni itela yakwe, ni ikombe yakwe ni itumba ni uluŵa wakwe yanayose ŵasyanile kumo. 18 Nombe chakuŵichila lumuli cho chaliji ni nyambi sita mumbali mwakwe, nyambi sitatu akuno ni sine sitatu akuno. 19 Mu nyambi syose sita pa kila lujambi kwaliji ni ikombe itatu yaipanganyikwe chisau ni uluŵa wa mlosi, ni pa kila lujambi chitumba ni uluŵa wakwe. 20 Pasikati ja chiimila cha chindu chakuŵichila lumuli cho kwaliji ni ikombe ncheche, yaipanganyikwe chisau ni uluŵa wa mlosi, pamo ni itumba ni uluŵa wakwe. 21 Papalipose papakopochele nyambi siŵili pa nyambi syose sita kuusi kwakwe chikuŵe ni chitumba chimo. 22 Matumba go pamo ni nyambi syakwe syose, yaliji yekamulene ni chindu chakuŵichila lumuli cho, chose chesyane kwa sahabu jakusalala. 23 Nipele ŵakolosisye imuli yakwe saba, ni chindu chakupalapatila utambi pampepe ni mbale syakwe kwa sahabu jakusalala. 24 Ŵachikolosisye chindu chakuŵichila lumuli cho ni indu yakwe yosepe kwa kilo selasini na tano sya sahabu jakusalala.

25 Che Besaleli ŵakolosisye chilisa chakututumichisya ubani kwa mbao sya nsonobali. Chilisa cho uleu wakwe ni chanchijipi mwakwe mulandane ni lisusa lyakwe lyaliji sentimita tisini. Misengo ja chilisa cho jakamulene ni chilisa chisyene. 26 Ŵachiunichile chilisa cho kwa sahabu jakusalala, pachanya pakwe ni mumbali mwakwe mose pamo ni misengo jakwe. Ŵakolosisye nchenjeka kwa sahabu kusyungula chilisa chose. 27 Ŵakolosisye pete siŵili sya sahabu ni kusiŵika kuusi kwa nchenjeka mumbalati siŵili. Pete syo syatumiche kujinjisya aila itela yakunyakulila. 28 Ŵakolosisye itela iŵili kwa chitela cha nsonobali ni kuiunichila kwa sahabu.

29 Che Besaleli ŵakolosisye mauta kwaligongo lya kwajitilila ŵakutyosyekwa kwa AMBUJE, ni ubani wakusalala ni kununjila yambone, wewanganye yambone ni kununjila yambone.