1 AMBUJE ŵaasalile che Musa, 2 "Pa lyuŵa lyaandanda lya mwesi waandanda, nlijimiche Lisakasa Lyakusimanilana ni Akunnungu. 3 Nkati mwakwe nkaŵiche Lisanduku lya Lilangano, paujo pakwe nkaliunichile ni nguo jalusasa. 4 Chinjinjisye mesa ni nkaŵiche penani pa mesa jo indu yakwe. Njinjisye chindu chakuŵichila imuli ni imuli yakwe. 5 Chilisa cha sahabu chakututumichisya ubani chimmiche paujo pa Lisanduku lya Lilangano, nipele chinkoleche nguo jalusasa pannango wa Lisakasa lya Akunnungu. 6 Achila chilisa chakutinichisya mbopesi mmiche paujo pa nnango wa Lisakasa Lyakusimanilana ni Akunnungu. 7 Ntala wa meesi gakunaŵa ula mmiche pasikati ja Lisakasa Lyakusimanilana ni Akunnungu ni chilisa ni kuugumbasya meesi. 8 Chinsunguchisye lutenje ni kukoleka nguo jalusasa pannango."

9 "Njigale mauta gakwajitilila ŵandu ni indu yetyosyekwe kwa AMBUJE ni kugajitilila pa Lisakasa lyo ni indu yakwe, ni yose yaili mwelemo chiiŵe yeswela. 10 Nipele nchijitile chilisa chakutinichisya mbopesi mauta go ni yoombo yakwe yose, nchitende chilisa cho chiŵe cheswela, nombecho chichiŵe cheswela nnope. 11 Ntala wa meesi gakunaŵila wo njitilile mauta go ni chitamichilo chakwe ni kuitenda iŵe yetyosyekwe kwa Ambuje Akunnungu."

12 "Nipele munnyichenawo che Haluni ni achiŵanagwe pannango wa Lisakasa Lyakusimanilana ni Akunnungu lyo ni kwajosya ni meesi. 13 Mwawasye che Haloni iwalo ya chimbopesi ila, mwajitilile mauta ni kwatyosya kwa Ambuje Akunnungu kuti atumichile pa masengo ga umbopesi. 14 Mwaichenawo achiŵanagwe ni kwawasya minjilo jao. 15 Nipele mwajitilile mauta go ŵanache wo mpela imwatite pakwajitilila atati ŵao, kuti ni ŵanyawo nombe andumichile pamasengo ga umbopesi. Kujitililwa mauta ku chikwatende aŵe ŵambopesi ŵangu ŵakutamilisya pa iŵelesi yao yose."

16 Che Musa ŵaitesile inayose mpela iŵatite pakulajiswa ni Ambuje Akunnungu.

17 Pa lyuŵa lyaandanda lya mwesi waandanda pa chaka chaaŵili chitandile paŵatyosile ku Misili, Lisakasa Lyakusimanilana ni Akunnungu lyajimikwe. 18 Che Musa ŵalijimiche Lisakasa lila, ŵaŵisile itamichilo yakwe, ŵajimiche mafelemu, ŵalumbikenye ni mitambalapanya jakwe ni kwimika chanamila syakwe. 19 Ŵaŵisile chiunichilo pachanya Lisakasa Lyakusimanilana ni Akunnungu, sooni ŵaŵisile chiunichilo cha lipende lyakwepepala pachanya pakwe mpela iŵatite pakulajiswa ni AMBUJE. 20 Nipele ŵajigele ibao iŵili ya maganga gagalembekwe makanyo ni kuiŵika mu Lisanduku lya Lilangano. Ŵajinjisye itela yakunyakulila mu pete ni ŵachiŵisile chiunichilo pachanya pakwe. 21 Nipele ŵalijinjisye alila Lisanduku lya Lilangano mu Lisakasa Lyakusimanilana ni Akunnungu ni kujikoleka nguo jalusasa kulichinga Lisanduku lyo, mpela AMBUJE iŵatite pakunnajisya.

22 Chapaasa pa nguo jalusasa jo che Musa ŵajiŵisile mesa mu Lisakasa Lyakusimanilana ni Akunnungu chakumpoto. 23 Pachanya pa mesa jila ŵaŵisile mikate paujo pa AMBUJE mpela AMBUJE iŵatite pakunnajisya. 24 Ŵachiŵisile chindu chakuŵichila imuli mu Lisakasa Lyakusimanilana ni Akunnungu ku lujenda kwa Lisakasa kulolegana ni mesa jila. 25 Ŵaikolesisye imuli yakwe paujo pa AMBUJE mpela AMBUJE iŵatite pakunnajisya. 26 Ŵajinjisye chilisa cha sahabu chila mu Lisakasa, paujo pa nguo jalusasa. 27 Ŵatutumichisye pachanya pa chilisa cho ubani waukununjila yambone mpela AMBUJE iŵatite pakunnajisya. 28 Ŵajikoleche nguo jalusasa pannango wa Lisakasa Lyakusimanilana ni Akunnungu. 29 Ŵachiŵisile chilisa cha mbopesi jakutinisya chiŵandi ni nnango wa Lisakasa Lyakusimanilana ni Akunnungu, ŵatasile mbopesi jakutinisya pachanya pakwe ni mbopesi ja magungulo mpela AMBUJE iŵatite pakunnajisya. 30 Ŵauŵisile ntala wa meesi gakunaŵa ula pasikati ja Lisakasa Lyakusimanilana ni Akunnungu ni chilisa ni kutaga meesi ga kunaŵa. 31 Che Musa, che Haloni ni achiŵanagwe, ŵanawose ŵanaŵaga makono ni makongolo gao kwa meesi ga muntala wo. 32 Paŵajinjilaga mu Lisakasa Lyakusimanilana ni Akunnungu ni kuchiŵandichila chilisa, ŵanaŵile mpela AMBUJE iŵatite pakunnajisya che Musa. 33 Che Musa ŵajimiche lutenje kusyungula Lisakasa ni chilisa, ŵakoleche nguo jalusasa pannango wa Lisakasa. Nipele che Musa ŵamalichisye masengo.

34 Pelepo liunde lila lyaunichile Lisakasa Lyakusimanilana ni Akunnungu ni ung'alime wa ukulu wa AMBUJE wagumbele mu Lisakasa. 35 Che Musa nganakombola kwinjila mu Lisakasa Lyakusimanilana ni Akunnungu ligongo liunde lila lyatemi pachanya pa Lisakasa, ni ung'alime wa ukulu wa AMBUJE wagumbele mu Lisakasa mo. 36 Mu ulendo wao wose palyatyokaga liunde pachanya pa Lisakasa, pelepo Ŵaisilaeli ŵatandite ulendo. 37 Nambo naga liunde lyo nganilityoche nombe Ŵaisilaeli nganatyokaga pa chigono po. Ŵalindililaga mpaka pa lyuŵa lyakuti liunde lyo lityosile. 38 Pa ulendo wao wose Ŵaisilaeli ŵaliji nkuliona liunde lyalikulosya upagwe wa AMBUJE pachanya Lisakasa lyo muusi ni chilo ŵauwonaga mooto mu liunde lyo.