1 Nipele Ambuje Akunnungu ŵansalile che Musa, "Njaule kwa mwenye nkaasalile kuti Ambuje Akunnungu, Akunnungu jwa Ŵaebulania, akuti nyi, ‘Mwaleche ŵandu ŵangu akaambopelele. 2 Iŵaga nkupunda kukana kwalechelela, 3 tinjinjamuka kwa kumpelechela ilwele yakalipa kwa ilango yenu yose: Ng'ombe syenu ni falasi ni mbunda ni ngamia ni mbusi ni ngondolo. 4 Nambo, chinjiilekanganya ilango ya Ŵamisili ni Ŵaisilaeli, kuti ngasichipagwa chinyama atamuno chimo cha Ŵaisilaeli chachichiwe.’ "

5 Ambuje Akunnungu ŵaŵisile katema achitiji, "Malaŵi uneji Ambuje Akunnungu chiindende chelechi mu chilambo chi."

6 Malaŵi jakwe Ambuje Akunnungu ŵaitesile iŵasasile. Ilango yose ya Ŵamisili yawile, nambo nganichipagwa chilango namose chimo cha Ŵaisilaeli chachiwile. 7 Mwenye ŵatumile utenga kukuuchilichisya yaitendekwe, ŵasimosiswe pakupikana kuti namose jumo mwa ilango ya Ŵaisilaeli chichawile. Nambo mwenye ŵapundile kukakatima ntima nganiŵaleka Ŵaisilaeli ajaule.

8 Ambuje Akunnungu ŵaasalile che Musa ni che Haluni, "Njigale liu lya pa chisisa ligasa limo, ni che Musa aliponye kwinani mwenye ali nkulola. 9 Liu lyo tilijenele pa chilambo chose cha Misili mpela luundu. Ni mose kutilijenele chiikopochele yakuimbila ni kutumbuka, pa iilu ya ŵandu ni inyama pa chilambo chose cha Misili." 10 Nipele wose ŵasapwile liu pachisisa ni ŵajile kwima paujo pa mwenye. Che Musa ŵaliponyisye kwinani liu lila, yakopochele yakuimbila iyaimbaga ni kutumbuka pa iilu ya Ŵamisili ni inyama yao yose. 11 Namose ŵasaŵi ŵalepele kwika paujo pa che Musa, pakuŵa ni ŵanyawo ŵakwete yakuimbila pamo ni Ŵamisili wose. 12 Nambo Ambuje Akunnungu ŵaukakatimisye ntima wa mwenye. Nombejo nganaapikanila che Musa ni che Haluni, mpela Ambuje Akunnungu iŵatite pakunsalila che Musa.

13 Nipele Ambuje Akunnungu ŵaasalile che Musa, "Njimuche kundaŵi pe, njaule nkasimane ni mwenye ni kwasalila kuti Ambuje Akunnungu, Akunnungu ŵa Ŵaebulania akuti, ‘Mwaleche ŵandu ŵangu ajaule kukumbopelela. 14 Naga ngankwalechelela ajaule, chinannyichisye iputiko yangu yose kukwenu ni kwa ŵakamusi ŵenu ni kwa ŵandu ŵenu, pelepo timmanyilile kuti pangali jwine jwakulandana ni une pa chilambo chose. 15 Pakuŵa katema ka ngaliji masile kunjonanga mmwejo ni ŵandu ŵenu kwa ulwele wa chikali, ni ŵanyamwe wose nkaliji mmwile. 16 Nambo nanlesile mmwejo ŵajumi, nnole machili gangu, nikuti ukulu wangu umanyiche pachilambo pose. 17 Mmwe chiŵela nkulikwesya pa ŵandu ŵangu ni ngankusaka kwaleka ajaule. 18 Mpilikanile, malaŵi ndaŵi jijiji chiichenajo ula jekulungwa ja maganga janganijinye chitandilile kupagwa chilambo chino mpaka sambano. 19 Sambano nnajisye kwa jwalijose kuti, ilango ni yose yaili mmigunda ajinjisye mwichinga, ni ŵandu nombe nawo aŵeje munkati. Pakuŵa ula ja maganga tijinye, ni kila chindu chachili paasa chichiwe, iŵeje ŵandu pane inyama.’"

20 Ŵandu ŵampepe pasikati ja ŵakamusi ŵa mwenye paŵapikene giŵaŵechete Ambuje Akunnungu ŵajogwepe. Mwakwanguya ŵaijinjisye inyama yose ni ŵakutumichila ŵao wose munkati. 21 Nambo ŵanganagakosya maloŵe gaŵaŵechete Ambuje Akunnungu, ŵailesile ilango yao ni achikapolo ŵao paasa.

22 Nipele Ambuje Akunnungu ŵansalile che Musa, "Nkwesye nkono ŵenu mwinani kuti ula ja maganga jigwe pa chilambo chose cha ku Misili, ni pa ŵandu ni pa inyama ni pa yemele yose ya mmigunda."

23 Che Musa ŵanyakwile lubokola lwao mwinani ni Ambuje Akunnungu ŵapeleche kulindima ni njasi ni ula ja maganga. Ŵanyesisye ula ja maganga pa chilambo chose cha Misili. 24 Nipele janyele ula jekulungwa ja maganga jijalongosyene ni njasi ni kumesya akuno ni akuno. Nganijipagweje ula janti yele, jajiwaiye kunya chitandilile kupagwa kwa chilambo cha Misili. 25 Ni ula ja maganga jila jajonasile indu yose iyaliji paasa, mundu jwalijose ni inyama nombe. Ula jo jajonasile ni yemele yose ni kutemangula itela yose. 26 Nambo ku chilambo cha ku Gosheni pe kuŵatamaga Ŵaisilaeli kwaliji kwangali ula jekulungwa ja maganga.

27 Nipele mwenye ŵaatumile ŵandu kukwaŵilanga che Musa ni che Haluni ni kwasalila, "Aka katema ka une ndesile sambi. Ambuje Akunnungu ali ŵa chigolochelo, une ni ŵandu ŵangu tuleŵile. 28 Mwapopele Ambuje Akunnungu alekasye ula ji, pakuŵa ngatukukombola kupililila kulindima ni ula ja maganga ji. Ni une chinjinneka nkatama mwakupunda pa Misili pa." 29 Che Musa ŵanjanjile mwenye, "Nakopoka pe mu musi wu chingagolosye makono gangu ni kupopela kwa Ambuje Akunnungu. Nipele kulindima chikuleche ni ula ja maganga ngajinya sooni kuti mmanyilile yakuti chilambo chose chili chakwe Ambuje Akunnungu. 30 Nambo nguimanyilila kuti mmwe ni ŵakamusi ŵenu ngankwajogopa Ambuje Akunnungu."

31 Mimela jakolochesya nguo ni shayili jajonasikwe pakuŵa shayili jaliji jikomele ni mimela jakolochesya nguo jaliji jetande kutyosya uluŵa. 32 Nambo ngano ni mbeju sine syakulandana ni ngano nganisijonasikwa pakuŵa syaliji syangakula ni sikukaŵa kugungula.

33 Nipele che Musa ŵannesile mwenye ni kwaula paasa musi. Ŵanyakwile makono gao mwinani ni kwapopela Ambuje Akunnungu. Kulindima kula ni ula jamaganga jila jalesile kunya pa chilambo cha Misili. 34 Nambo mwenye jula paŵaiweni kuti ula ni ula jamaganga pamo ni kulindima kula kulesile, ŵatesile sambi sooni, jwelejo pamo ni ŵakamusi ŵakwe ŵakakatimisye mitima. 35 Kwayele ntima wa mwenye waliji wakukakatima, nganiŵalechelela Ŵaisilaeli ajaule mpela muŵaŵechetele Ambuje Akunnungu kwa litala li che Musa.