1 Ambuje Akunnungu ŵansalile che Musa, "Njaule kwa mwenye pakuŵa nautesile ntima wao uŵe wakukakatima, kuti nosye imanyisyo yangu pasikati jao, 2 ni ŵanyamwe nkole chakwasalila ŵanache ŵenu ni isukulu yenu indu indesile kwa chikali kwa Ŵamisili, ni yakusimonjeka indesile pasikati jao, kuti ŵanyamwe mmanyilile yakuti, Une ndili Ambuje Akunnungu."

3 Nipele che Musa ni che Haluni ŵajawile ku nyuumba ja mwenye ni kwasalila, "Ambuje Akunnungu, Akunnungu jwa Ŵaebulania akuti nyi, ‘Ana chinkane kulitulusya paujo pangu mpaka chakachi? Mwaleche ŵandu ŵangu ajaule kukumbopelela. 4 Nambo naga nkukana kwaleka, mpilikane malaŵi tinyichisye sombe sijinjile mu chilambo chenu, 5 chisijenele pa chilambo pose ni ngankombola kuliwona litaka. Chisilye isogosi iyasigalile pangajonasikwa ni ula ja maganga, ni sooni chisilye itela yaikusipuka. 6 Sombe syo chisigumbale mmajumba mwenu ni majumba ga ŵakamusi ŵenu, ni mmajumba ga Ŵamisili wose, chindu changanachiwoneje achatati ŵenu namose achambuje ŵenu, chitandilile paŵatandite kutama mu chilambo chi mpaka lelo jino.’ " Nipele che Musa ŵagalawiche ni kunneka mwenye.

7 Ŵakamusi ŵa mwenye ŵammusisye mwenye, "Ana mundu ju chatusausye mpaka chakachi? Mwaleche ŵandu ŵa ajaule akaapopelele Ambuje Akunnungu, Akunnungu ŵao. Ana ngankwimanyilila kuti chilambo cha Misili chijonasiche?"

8 Ŵaaichisye che Musa ni che Haluni kwa mwenye, nombejo ŵaasalile, "Njaule nkaapopelele Ambuje Akunnungu, Akunnungu ŵenu. Nambo ŵandu chi uchajaule pamo ni ŵanyamwe?" 9 Che Musa ŵajanjile, "Chitujaule ni achachanda ŵetu ni achachekulu, pamo ni ŵanache ŵetu ŵachilume ni ŵachikongwe. Sooni chitujigale ngondolo syetu ni mbusi syetu pamo ni ng'ombe syetu, kuti tukaatendele chindimba Ambuje Akunnungu."

10 Mwenye ŵaajanjile kwa mapyulo achitiji, "Ambuje Akunnungu aŵe pamo ni ŵanyamwe iŵaga tinanlechelele njaule ni achiŵankwenu ni achiŵana ŵenu, pakuŵa chiinsimane yangalumba mmbujo mo. 11 Ngaŵa yele, njaule achalume pe nkaapopelele Ambuje Akunnungu, pakuŵa yele ni inkwisaka." Kwayele che Musa ni che Haluni ŵaŵinjikwe paujo pa mwenye.

12 Ambuje Akunnungu ŵasalile che Musa, "Ngolosye nkono ŵenu pa chilambo cha Misili kuti sombe siiche, silye mimela jose jijasigele katema ka ula ja maganga jila." 13 Nipele che Musa ŵalosisye lubokola lwao pa chilambo cha ku Misili, ni Ambuje Akunnungu ŵajipujisye mbungo ja kungopochelo lyuŵa muusi wose ni chilo chose. Pakwachele mbungo jila jaichisye sombe. 14 Sombe sila syajenele mu chilambo chose cha Misili, ni syatusile mmipika jose ja Misili. Syaliji syejinji syanganisityochele ni ngasityochela sooni sombe syanti yele. 15 Syaunichile chilambo chose, mpaka chilambo chaliji piii. Syalile mimela jose mu chilambo ni isogosi yose ya mu itela iyasigele pa itela yanganijonasikwa ni ula ja maganga jila. Nganisigasya namuno lisamba limo atamuno mmela wa mmigunda pa chilambo chose cha Misili.

16 Nipele mwenye ŵaaŵilasile che Musa ni che Haluni ni kwasalila, "Naaleŵele Ambuje Akunnungu, Akunnungu ŵenu ni ŵanyamwe ŵakwe. 17 Sambano ngunchondelela muunechelesye aka kamope, ni nkaapopele Ambuje Akunnungu, Akunnungu ŵenu kuti andyochesye achi chiputiko chachikwikanacho chiwa chi." 18 Che Musa ŵatyosile kwa mwenye ni kwaula kukwapopelele Ambuje Akunnungu. 19 Nombe Ambuje Akunnungu ŵajipujisye mbungo jekulungwa kutyochela kumaswelelo lyuŵa ni kusityosya sombe ni kusijausya ku bahali ja Shamu. Nganijisigalila namose sombe jimo pa chilambo cha Misili. 20 Nambo Ambuje Akunnungu ŵaukakatimisye ntima wa mwenye, ni nganasaka kwalechelela Ŵaisilaeli ajaule.

21 Ambuje Akunnungu ŵaasalile che Musa, "Ngolosye nkono wenu mwinani kuti chikopochele chipi totolo pa chilambo chose cha Misili, chati ngapagwa mundu juchajende pangapapasyapapasya." 22 Nipele che Musa ŵanyakwile nkono wao mwinani, kwaliji ni chipi totolo mu chilambo cha Misili kwa moŵa gatatu. 23 Ŵandu nganakombola kuwonegana jwine ni jwine ni nganapagwa namose jumo juŵatyosile paŵaliji kwa moŵa gatatu go. Nambo ku Gosheni ko kuŵatamaga Ŵaisilaeli kwaliji ni lulanga.

24 Nipele mwenye ŵammilasile che Musa ni kunsalila, "Ayaga, njaulangane nkaapopelele Ambuje Akunnungu. Achiŵankwenu ni ŵanache ŵenu nombe ajaulangane. Nambo ngondolo ni mbusi ni ng'ombe syenu chisisigalile papapa." 25 Nambo che Musa ŵasalile, "Ntuleche tujigale ngondolo ni mbusi kuti sine tukaatyochesye Ambuje Akunnungu, Akunnungu ŵetu sadaka ni mbopesi syakutinisya. 26 Tukwaula ni ilango yetu, ngapagwa chinyama namose chimo chachichisigalile. Pakuŵa mwa ŵelewo chitukasagule chinyama cha kwatyochesya mbopesi Ambuje Akunnungu, Akunnungu ŵetu. Ngatukwimanyilila kuti chinyama chi chichikafayi kwatyochesya mbopesi Ambuje Akunnungu, chitukaimanye pakwika kweleko."

27 Nambo Ambuje Akunnungu ŵaukakatimisye ntima wa mwenye, nombejo nganasaka kwalechelela Ŵaisilaeli ajaule. 28 Mwenye ŵansalile che Musa, "Ntyoche apa! Nlilolechesye kuti nkaika kukuumona sooni, pakuŵa lyuŵa lyachimuumone kumeso kwangu chimmwe." 29 Che Musa ŵajanjile, "Nsasile yambone! Ngamuumona sooni ng'oo!"