1 Nipele AMBUJE ŵansalile che Musa, "Nkwele chitumbi njise kukwangu mmwe ni che Haluni, ni che Nadabu ni che Abihu, pamo ni achachekulu ŵa Isilaeli sabini, muumbopelele ndi kwa kutalichila. 2 Mmwe che Musa jikape ni juchimumandichile, nambo ŵane akaika kumandichila. Ni Ŵaisilaeli akakwela pachitumbi pamo ni mmwe."

3 Che Musa ŵapite kukwasalila ŵandu gose gaŵasasile AMBUJE ni malajisyo gose. Ŵandu wose ŵajanjile kwanakamo, "Chitutende yose yasasile AMBUJE." 4 Nipele che Musa ŵalembile yose yasasile AMBUJE. Kundaŵindaŵipe ŵataŵile chilisa mungulugulu chitumbi, ni kwimika chanamila kumi na mbili malinga ni ngosyo kumi na mbili sya Isilaeli. 5 Nipele ŵaatumile achachanda ŵa Chiisilaeli kuti akatyosye mbopesi sya kutinisya, ni mbopesi sya ukamulangano sya ng'ombe kwaligongo lya AMBUJE. 6 Che Musa ŵatechile litika lya miasi ja inyama yo ni kujiŵika mu bakuli ni litika liine ŵajimisile pa chilisa. 7 Nipele ŵachijigele chitabu cha lilangano lya AMBUJE ni kwasyomela ŵandu kwakunyanyisya, ni ŵandu ŵatite, "Chitutende yose yalajisye AMBUJE ni kuitichisya." 8 Che Musa ŵajijigele miasi jila ni kwamisila ŵandu achitiji, "Jele jili miasi ja lilangano lyati AMBUJE alitesile ni ŵanyamwe malinga ni maloŵe gose ga."

9 Nipele Che Musa ni che Haluni ni che Nadabu ni che Abibu ni achachekulu sabini wa Isilaeli ŵakwesile kuchitumbi, 10 ŵasimene nao Akunnungu ŵa Isilaeli. Paasi pa sajo syakwe paoneche mpela sakafu ja maganga ga yakuti ga langi ja samawati, uloleche wakwe waliji mpela mwinani mwamulangwiche. 11 Akunnungu nganiŵajonanga ilongola ŵa Ŵaisilaeli. Ŵammweni Akunnungu, ŵalile ni kung'wa.

12 AMBUJE ŵansalile che Musa, "Njise kukwangu ku chitumbi kuno, nlindilile apano, chinjimpa ibao iŵili ya maganga yailembekwe malajisyo ni makanyo, kuti mwajiganye Ŵaisilaeli." 13 Nipele che Musa ŵatyosile pamo ni che Yoshua jwakutumichila jwakwe, ŵakwesile ku chitumbi cha Akunnungu. 14 Che Musa ŵasalile achachekulu, "Ntulindilile apano mpaka pachituuje. Che Haluni ni che Huli ali pamo ni ŵanyamwe, jwalijose jwali ni masauko ŵajaulile ŵanyawo."

15 Nipele che Musa ŵakwesile ku chitumbi ni liunde lyachiunichile chitumbi chila. 16 Ung'alime wa AMBUJE watulwiche pa chitumbi cha Sinai, ni liunde lyachiunichile chitumbi kwa moŵa sita. Lyuŵa lya saba AMBUJE ŵaŵilasile che Musa kutyochela mu liunde lila. 17 Ung'alime wa AMBUJE wo waoneche nti mooto waukukolela pachanya chitumbi. 18 Che Musa ŵajinjile mwiunde mula ŵakwesile mpaka kuchitumbi. Ŵatemi kweleko moŵa alobaini muusi ni chilo.