1 Pa moŵa go mundu jumo jwa nyuumba ji che Lawi, jwanlombile jwankongwe jwa lukosyo lwa Ŵalawi. 2 Jwankongwe jula jwakwete chitumbo ni kuligopola mwanache jwannume. Paŵamweni kuti ali jwakusalala ŵansisile kwa miesi jitatu. 3 Nambo, paŵaiweni kuti ngakukombola kunsisa sooni, ŵakajigele katundu kakaluchikwe ni matete, ŵakapachile lipula kakajinjisya meesi. Ŵammisile mwanache jo mu katundu, ni kukaŵika pa manyasi mungulugulu lusulo lwa Naili. 4 Mlumbugwe mwanache jo ŵalisisile pakuŵandichila ni pepala, kuti aiwoneje ichiyasimane apwao.

5 Nipele mwali jwa mwenye ŵajaŵile kulusulo kukoga, akuno ŵakutumichila ŵakwe ali nkwendajenda mungulugulu lusulo. Mwali jula ŵakaweni katundu mmanyasi, ŵantumile jumo jwa ŵakutumichila ŵakwe kuti akakajigale katundu kala. 6 Paŵakaunukwile katundu kala ŵakaweni kanache kalinkulila, ŵakakolele chanasa, ŵatite, "Aka kanache kali kamo mwa ŵanache ŵa Chieblania."

7 Pelepo nlumbugwe kanache kala ŵalilosisye ni kunsalila mwali jula, "Uli, nyaule ngansosele jwankongwe jwa Chiebulania kuti akakalele ni kukajonjesya kanache ka?" 8 Mwali jwa mwenye ŵansalile, "Ejaa, njaule." Nipele nlumbugwe ŵajaŵile ni kunnyichisya achikulugwe kanache kala. 9 Mwali jwa mwenye ŵaasalile achikulu ŵala, "Nkajigale kanache ka nkakajonjesye ni une chinjimpa mbote jenu." Nipele, achikulu ŵala ŵakajigele kanache ni kukalela.

10 Mwanache jula paŵakusile ni kukola lisusa, ŵanjawisye kwa mwali jwa mwenye, nombejo ŵanjigele ni kuntenda jwakwe ni kunkolanga liina a Musa, achitiji, "Naachuwile mmeesi."

11 Pa lyuŵa limo, che Musa paŵaliji jwanchanda ŵajaŵile kukwalola Ŵaebulania achinjakwe, ni ŵaiweni iŵatite pakulagaswa. Ŵansimene Mmisili jumo alinkumputa jumo jwa nlongo njakwe jwa Chiebulania. 12 Che Musa ŵalolite aku nakuku, paŵaiweni pangali mundu jwakummona, ŵammuleje Mmisili jula ni kuusilila ntembo mu nsanga. 13 Lyuŵa lyaaŵili lyakwe, che Musa ŵaaweni Ŵaebulania ŵaŵili ali nkuputana. Ŵammusisye juŵanleŵele njakwe jula, "Kwachichi nkumputa njenu?" 14 Mundu jula ŵajanjile, "Ŵaani ammisile mwe mme jwankulu ni jwakutulamulila uŵeji? Uli nkusaka kumulaga une mpela imwammuleje Mmisili jula?" Nipele che Musa wajogwepe ni kuganisya, "Amati! Imanyiche inaitesile ila." 15 Nombe mwenye paŵapilikene nkati ngani jila, ŵasachile kummulaga che Musa. Nambo che Musa ŵantisile mwenye, ŵajawile kutama ku chilambo cha ku Midiani chiŵandi ni chisima.

16 Nipele achiŵali saba ŵa jwambopesi jumo jwa ku Midiani, ŵaiche kukuteka meesi ni kugumbasya yombo iŵang'welelaga inyama, kuti aing'wesye inyama ya atati ŵao. 17 Ŵakuchinga ŵane ŵaiche ni kwatopola achiŵali ŵala, nambo che Musa ŵaachenjele achiŵali ŵala, ni kuing'wesya inyama yao. 18 Paŵausile kwa che Leuli atati ŵao, nombejo ŵausisye, "Iŵele uli lelo mbusile chitema?" 19 Nombewo ŵanjanjile, "Mmisili jumo atukulupwisye kutyoka kwa ŵakuchinga ŵala, sooni ŵatutechele meesi ni kuing'wesya inyama yetu." 20 Atati ŵao ŵausisye achiŵali ŵala, "Ana alikwapi mundu jo? Kwachichi munnesile kukoko? Nkammilanje aiche kukulya."

21 Che Musa ŵakundile kulonjela kwa mundu jula, nombejo ŵampele mwali jwao juŵaŵilanjikwaga che Sipola kuti annombe. 22 Che Sipola ŵammelechele mwanache jwannume. Che Musa ŵatite, "Ndili jwanlendo mu chilambo chi." Kwayele ŵammilasile liina lyakwe Gelishomu.

23 Gali gapite moŵa gamajinji, mwenye jwa ku Misili jwajasiche. Ŵaisilaeli ŵaliji nkudandaula ni kulila achisakaga ukamuchisyo, ligongo ŵaliji bado achikapolo, ni chililo chao chaaichilile Akunnungu kwinani. 24 Akunnungu ŵachipikene chililo chao ni ŵachikumbuchile chilanga chiŵalangene ni che Ibulahimu ni che Isaka ni che Yakubu. 25 Akunnungu ŵaalolite Ŵaisilaeli yaakuti pakulagaswa ni ŵaakolele chanasa.