1 Che Besaleli ŵakolosisye chilisa kwaligongo lya mbopesi jakutinisya kwa chitela cha nsonobali, uleu wakwe ni chanchijipi mwakulandana, ni lisusa lyakwe mita moja ni lobo. 2 Ŵakolosisye msengo pa kila ndumba ja chilisa jijaliji jekamulane ni chilisa cho ni ŵaunichile kwa shaba. 3 Ŵakolosisye yoombo yose ya pa chilisa, yaani iŵiga yakutyochesya liu, sepetu, ni mabakuli ga kusuluchisya miasi ni isyano yakutyochesya nyama pamoto ni mapale. Yombo yakwe yose yakolochekwe kwa shaba. 4 Ŵakolosisye lwau lwa shaba, ŵaluŵisile paasi chamunkati pa nchenjeka kusyungulila mbande syose, lwau lo waliji pasikati ja chilisa cho. 5 Mu kila ndumba ŵakolosisye pete jimo kwa shaba jakunyakulila chilisa. 6 Ŵakolosisye itela kwa chitela cha nsonobali yakunyakulila chilisa ni kuiunichila kwa shaba. 7 Ŵaijinjisye itela yo mu pete syasili mu ndumba mwa chilisa kuti chinyakulikwe. Ŵakolosisye chilisa cho kwa ibao ni kuusi kwakwe kwaliji kwangaunichila.

8 Che Basaleli ŵakolosisye ntala wa kuŵichila meesi gakunaŵila kwa shaba ni chitamichilo chakwe chaliji cha shaba, shaba jo jaliji ja lindala lya achakongwe ŵaŵatumichilaga pa nnango wa Lisakasa Lyakusimanilana ni Akunnungu.

9 Nipele che Besaleli ŵasyunguchisye lutenje lwa Lisakasa lyakusimanilana ni Akunnungu. Nguo sya lusasa sya lutenje lo upande wa kulujenda syakolochekwe kwa nguo jeswela mbee ni uleu wakwe waliji mita alobaini na nne, 10 ni njanamila syakwe syaliji ishilini ni itamichilo yakwe yaliji ishilini, yosepe yaliji ya shaba. Itaŵililo yakwe ni ikulusisya yakwe yaliji ya feza. 11 Kumpoto kwa lutenje lo nombe uleu wakwe waliji mita alobaini na nne, njanamila syakwe syaliji ishilini, ni itamichilo yakwe yaliji ishilini, yosepe yaliji ya shaba, itaŵililo yakwe ni ikulusisya yakwe yaliji ya feza. 12 Kulikutiŵila lyuŵa kwaliji ni nguo jalusasa uleu wakwe mita ishilini na mbili, njanamila syakwe likumi ni itamichilo yakwe likumi, itaŵililo yakwe kumi ni ikulusisya yakwe yaliji ya feza. 13 Kungopochelo lyuŵa kwa lutenje kwaliji ni nnango nchijipi mwakwe mwaliji mita ishilini na mbili. 14 Nguo jalusasa ja upaande umo wa nnango uleu wakwe waliji mita sita ni nusu, ni njanamila syakwe sitatu ni itamichilo yakwe itatu. 15 Iyoyopeyo upaande waaŵili, akuno ni akunokuno pannango wa lutenje kwaliji ni nguo jalusasa ja uleu wa mita sita ni nusu ni njanamila syakwe sitatu ni itamichilo yakwe itatu. 16 Nguo sya lusasa syose kusyungula lutenje syakolochekwe kwa nguo jeswela mbee jajipotekwe. 17 Itamichilo yose yaliji ya shaba, ni njanamila yakwe ni ikulusisya yakwe ni itaŵililo yakwe yaliji ya feza. 18 Nguo jalusasa ja pannango wa lutenje jakolochekwe kwa nguo jeswela mbee jajiluchikwe kwa usi wa langi ja chibuluu ni sambalau ni wechejeu ni kutotekwa yambone. Nombelyo uleu wakwe waliji mita tisa ni lisusa lyakwe mita siŵili malinga ni lisusa lya nguo jalusasa ja palutenje. 19 Yanamila yakwe yaliji ncheche ni itamichilo yakwe ncheche yaliji ya shaba. Ikulusisya yakwe yaliji ya feza ni itaŵililo yakwe yaliji ya feza. 20 Igingi yose ya Lisakasa Lyakusimanilana ni Akunnungu ni ya lutenje kusyungulila mbande syosye yakolochekwe kwa shaba.

21 Yeleyi ni indu iyatumiche kukolochesya Lisakasa Lyakusimanilana ni Akunnungu, muyaŵichikwe ibao yamaganga iyaliji ni makanyo. Ŵalawi ni ŵaŵagatesile masengo ga kwa malajisyo ga che Musa, kwa ulongosi u che Itamali mwanache jwa jwambopesi che Haluni.

22 Che Besaleli mwanache ju che Uli, jwali mwanache ju che Huli jwa lukosyo lwa Yuda, ŵaitesile yanayose aila AMBUJE iŵannajichisye che Musa aipanganye. 23 Ŵakamuchikwe ni che Oholiabu mwanache ju che Ahisamaki, jwa lukosyo lwa Dani juŵaliji jwakumanyilila kulembalemba kwa kusepelela ni jwaali ni ukombole wa kuganichisya malembolembo ga indu ni kwakutumia malembo go kukolosya indu kwa kutotela pa nguo jeswela mbee jeluchikwe kwa usi wa chibuluu, sambalau wechejeu.

24 Sahabu jose jiŵatyosisye ŵandu kwa AMBUJE jati jatumiche kwaligongo lya masengo go, pakukolosya Lisakasa Lyakusimanilana ni Akunnungu, jaliji ni utopele wakwe waliji nti kilo elufu moja malinga ni ipimo ya pa Lisakasa Lyakusimanilana ni Akunnungu. 25 Feza siŵaichenasyo mpingo wa ŵandu wo utopele wakwe waliji kilo elufu tatu na mia nne ni salasini malinga ni ipimo ya pa Lisakasa Lyakusimanilana ni Akunnungu. 26 Mundu jwalijose juŵaŵalanjikwe kutandilila jwa yaka ishilini ni kupunda pelepo ŵaichenasyo feza nti gilamu sita. Achalume wose ŵaŵaŵalanjikwe ŵaliji laki sita ni elufu tatu mia tano na hansini. 27 Kilo elufu tatu na mia nne sya feza syatumiche kukolochesya aila itamichilo mia moja ya Peuto Papaswela ni itamichilo ya nguo jalusasa, yaani kilo salasini na nne kwa chitamichilo chimo. 28 Asila kilo salasini syasisigalile syatumiche kukolochesya ikulusisya ni kuunichila pachanya yanamila yo ni kukolochesya itaŵililo yakwe. 29 Shaba jiŵannyichisye AMBUJE utopele wakwe waliji kilo elufu mbili na mia nne ishilini na tano. 30 Che Besaleli ŵatumie shaba jo kukolochesya itamichilo ya pannango wa Lisakasa Lyakusimanilana ni Akunnungu, chilisa ni lwau lwakwe, ni yoombo yose ya pa chilisa. 31 Itamichilo ya lutenje kusyungula mbande syose ni itamichilo ya pannango wa lutenje lo, ni igingi yose ya Lisakasa Lyakusimanilana ni Akunnungu ni igingi yose ya lutenje kusyungula mbande syose.