Êxodo 32

Chinyago cha ng'ombe jamwana cha sahabu

1 Ŵandu paŵaiweni che Musa akukaŵa kutuluka ku chitumbi, ŵasongangene ku che Haluni ni kwasalila, "Ngatukuchimanyilila a Musa wo uŵatulongwesye kukopoka ku Misili chasimene chindu chi, kwayele ntukolochesye minungu jati jitulongosye uweji." 2 Che Haluni ŵajanjile, "Njigale ipuli ya sahabu ya mmawiwi mwa achiŵankwenu ni ŵanache ŵenu ni achiŵali ŵenu nnyiche nayo kukwangu." 3 Nipele ŵandu wose ŵausile ipuli yao ya sahabu, ni kwapelechela che Haluni. 4 Che Haluni ŵaijigele ipuli yo ni kuinyelenyendusya, pajaposile ŵakolosisye chinyago cha ng'ombe jamwana kwa kusepa ni teeso. Ŵandu wo ŵanyanyisye, "Ŵanyamwe Ŵaisilaeli jweleju ni nnungu jwenu jwankopwesye ku chilambo cha Misili."

5 Nipele che Haluni ŵachitaŵile chilisa chinyago chila ni kutenda ngulantwe, "Malaŵi chikuŵe ni chindimba kwa ligongo lya AMBUJE." 6 Malaŵi jakwe ŵandu ŵajimwiche kundaŵipe ni kutyosya mbopesi ja kutinisya ni sadaka sya ukamulangano ni Akunnungu. Ŵandu ŵatemi kulya ni kung'wa, nipele ŵajimi ni kutyala kwa kupunilana.

7 Nipele AMBUJE ŵasalile che Musa, "Ntuluche, pakuŵa ŵandu ŵenu umwatyosisye ku Misili aleŵile ni kuungana Une. 8 Ajangwiye kuleka litala linalaajisye kulikuya, alikolochesye chinyago cha ng'ombe jamwana. Achipopelele ni kuchityochesya mbopesi ni kuti, ‘Jweleju ni nnungu jwetu, ŵanyamwe Ŵaisilaeli, jwatukopwesye ku chilambo cha Misili.’ " 9 AMBUJE ŵansalile sooni che Musa, "Ngwamanyilila ŵandu ŵa yatite kuŵa ŵangapikana. 10 Sambano ngasimusiŵila. Muneche naajonanje kwa lutumbilo lwangu lwachikali. Nipele chinantende mmwe ni iŵelesi yenu mme achachinji."

11 Nambo che Musa ŵaachondelele AMBUJE Akunnungu ŵao achitiji, "AMBUJE, kwachichi nkwatumbilila ŵandu ŵenu, umwakopwesye ku Misili kwa ukombole wekulungwa ni kwa nkono wauli ni machili? 12 Mwatendaga yeleyo ŵandu ŵa ku Misili chajile, ‘Mwakopwesye ŵandu ŵenu kwa nningwa wangalumbana kuti mwaulaje mmatumbi ni kwajonanga wose pachilambo.’ Alakwe Akunnungu, choonde ntondoye lutumbilo lwenu lwannope, nneche kupanganya yangalumbana inkusaka kwapanganyichisya ŵandu ŵenu. 13 Mwaakumbuchile ŵakutumichila ŵenu, che Ablahamu ni che Isaka ni Isilaeli, umwaalanjile kwa liina lyenu nchitiji, ‘Chinauchuluye uŵelesi wenu chiuŵe nti ndondwa sya mwinani ni chilambo chose chi chinaalanjile, chinaape chiŵe chao moŵa gose pangali mbesi.’ " 14 Nipele AMBUJE ŵapitikwisye nganisyo syao ni kuleka kwajonanga ŵandu ŵakwe.

15 Nipele che Musa ŵatulwiche kutyochela ku chitumbi ali akamulile ibao iŵili ya maganga mmakono mwao, yailembekwe makanyo ga Akunnungu mbande syose. 16 Juŵakolosisye ibao yo ali Akunnungu nsyene, ni juŵalembile makanyo mu ibao yo ali Akunnungu nsyene.

17 Che Yoshua paŵapilikene ŵandu alinkunyokonya kwakunyanyisya, ŵaasalile che Musa, "Likupikanika lisegwe lya ngondo kuchigono kula." 18 Nambo che Musa ŵaajanjile, "Lyele ngaŵa lisegwe lyalikulosya kupunda pane kulepela, nambo lisegwe lingulipikana une lili lya ŵandu ŵakwimba." 19 Che Musa paŵaŵandichile pachigono ni kuchiwona chinyago cha ng'ombe jamwana jila pamo ni ŵandu ŵaakutyala, ŵatumbile nnope. Ŵaponyisye paasi ibao ila iyaliji mmakono mwao, ni kuikasanya apala paasi chitumbi. 20 Nipele ŵachijigele chinyago chila ni kuchinyelendusya pa mooto, ŵachisyajile ni chaliji nti utandi. Utandi ula ŵautasile mmesi ni kwapa Ŵaisilaeli ang'we.

21 Che Musa ŵausisye che Haluni, "Ŵandu ŵa ŵantensile chindu chi, kwika mwakulechelela atende sambi janti nyi?" 22 Che Haluni ŵajanjile, "Choonde ambuje ŵangu, nkaandumbilila. Alakwe nkwamanyilila ŵandu ŵa yatite kuŵa chile kuitendekanya yachigongomalo. 23 Ŵandu ŵa ŵaasalile, ‘Ntupanganyichisye minungu jati chijitulongolesye. Pakuŵa ngatukuchimanyilila a Musa juŵatulongwesye kukopoka ku chilambo cha Misili chaasimene chindu chi.’ 24 Kwayele naasalile, jwalijose jwali ni chindu chachikolochekwe ni sahabu aiche nayo apano. Nipele, ŵaiche nayo noneji nainyelenyendwisye pa mooto, pelepo ni pachatyochele chinyago cha ng'ombe jamwana chi!"

25 Nipele che Musa ŵaiweni kuti che Haluni ŵalechelele ŵandu aleche kwajitichisya Akunnungu, apanganye yakuisaka achimisyene, kwayele aŵele nti chindu cha kusekasya kwa ŵammagongo ŵao. 26 Che Musa ŵajimi pa nnango wekulungwa wa kwinjilila pa chigono ni kunyanyisya, "Jwalijose jwaali upande wa AMBUJE, asejele upande wangu une." Pelepo, Ŵalawi wose ŵasongangene pamo ku che Musa. 27 Ni paŵaasalile, "Yelei ni yakuti AMBUJE Akunnungu wa Ŵaisilaeli, ‘Kila mundu alitaŵilile upanga wakwe nchiunu, asyungule mosemose pa chigono, kutyochela ku nnango wu mpaka nnango wine, kila mundu ammulaje njakwe pane mmbusangagwe pane jwaŵandikene nao.’ " 28 Ŵalawi ŵatesile mpela iŵatite pakulajiswa ni che Musa. Ŵandu ŵaŵaulajikwe lyuŵa lyo ŵaliji elufu tatu. 29 Nipele che Musa ŵaasalile Ŵalawi, "Lelo jino mwachinsyene nlityosisye kwa ligongo lya AMBUJE, pakwaulaga ŵanache ŵenu ni achalongo ŵenu, kwayele AMBUJE ampele upile lelo." 30 Lyuŵa lyaaŵili che Musa ŵaasalile ŵandu, "Ntesile sambi jekulungwa. Nambo sambano ngukwela sooni kuchitumbi kwa AMBUJE panjipa chingombole kuutenda ujilanyo ligongo lya sambi syenu." 31 Kwayele che Musa ŵajaulile AMBUJE ni kwasalila, "Ŵandu ŵa atesile sambi jekulungwa alipanganyichisye minungu ja sahabu ni kujipopelela. 32 Choonde mwalechelele sambi syawo. Naga ngankusaka nlityosye liina lyangu mu chitabu chenu chinlembile meena ga ŵandu ŵenu." 33 AMBUJE ŵaajanjile, "Mundu jwatesile sambi ngulityosya liina lyao mu chitabu changu. 34 Sambano njaule nkaalongosye ŵandu mpaka liuto linansalile, nnole katumetume jwangu channongolele. Namuno yeleyo katema kachinjiika chinjaamuka ligongo lya sambi syao."

35 Kanyuma AMBUJE ŵaajamwiche kwa ulwele ligongo lya kuchipopelela chinyago cha ng'ombe jamwana jiŵajikolosisye che Haluni.

Bíblia Online

Veja também

Oração para pedir a Deus que aumente a fé quando o coração está cheio de dúvida

Como o amor de Deus cura as dores de relações passadas?