1 Mpingo wose wa Ŵaisilaeli wajesile kutyochela ku lipululu lya Sini ni kwaula akuno ni akuno mpela iŵalajiswe ni Ambuje Akunnungu. Ŵakuiche ku Lefidimu, nombe pelepo nganigapagwa meesi gati ŵandu tang'we. 2 Nipele ŵandu ŵaalalatile che Musa achitiji, "Ntupe meesi tung'we." Che Musa ŵausisye, "Kwachichi nkuulalatila une? Kwa chichi nkwalinga Ambuje Akunnungu?" 3 Nambo ŵandu jakamwile njota nnope, nombewo ŵaalalatile che Musa achitiji, "Kwachichi mwatukopwesye akula ku Misili ni kututenda uweji ni ŵanache ŵetu ni ilango yetu tuwe ni njota?"

4 Che Musa ŵaalilile Ambuje Akunnungu achitiji, "Ana ndende uli ni ŵandu ŵa? Pakuŵa asigele panondi kuumbonya maganga." 5 Ambuje Akunnungu ŵaasalile che Musa, "Njaule mmbujo mwa ŵandu, nkaajigale ilongola ŵa Ŵaisilaeli ŵampepe alongane pamo ni mmwe, ni alula lubokola lwenu lumwaputile nao meesi ga lusulo lwa Naili. 6 Une tinyime paujo penu pachanya lwala ku Holebu. Nkalupute lwala lo ni lubokola lo ni meesi tigakopoche kuti ŵandu ang'we." Nipele che Musa ŵatesile yeleyo paujo pa ilongola ŵa Ŵaisilaeli. 7 Che Musa ŵaliŵilasile liuto lila "Masa" ni "Meliba," pakuŵa Ŵaisilaeli ŵaalalatile kwa kwalinga Ambuje Akunnungu achiliusyaga, "Ana Ambuje Akunnungu ali pamo ni uŵeji pane ngaŵa?"

8 Ŵaamaleki ŵaiche ni kwagunguchila Ŵaisilaeli ku Lefidimu. 9 Che Musa ŵaasalile che Yoshua, "Nsagule achalume ŵampepe njaule nkaputane ni Ŵaamaleki. Malaŵi, chinyime pachanya chisonga cha chitumbi, ndi ngamulile alula lubokola luŵaambele Akunnungu mmakono mwangu." 10 Nipele che Yoshua ŵatesile mpela iŵatite pakusalilwa ni che Musa, ŵapite kukuputana ni Ŵaamaleki. Che Musa ni che Haluni pamo ni che Huli ŵakwesile pa lusonga lwa chitumbi. 11 Katema kose che Musa paŵanyakwile nkono wakwe mwinani, Ŵaisilaeli ŵaliji nkupunda pa ngondo, nambo paŵatulusyaga nkono wakwe, Ŵaamaleki ŵaliji nkupunda. 12 Nambo makono ga che Musa gapesile. Pele che Haluni ni che Huli, ŵajigele liganga ni kuntamichila che Musa nombejo ŵalitamile. Nipele, ŵatemi jwine aku, ni jwine aku achinyakulilaga makono ga che Musa mwinani. Ŵagakamulile mpaka lyuŵa kutitimila. 13 Che Yoshua ŵaapundile Ŵaamaleki pa ngondo kwa mapanga.

14 Nipele Ambuje Akunnungu ŵansalile che Musa, "Nnembe ngani ji ja kupunda mu chitabu kuti jikaliŵalikwa. Sooni mwasalile che Yoshua kuti Une tinaajonanje Ŵaamaleki, akakumbuchilwa sooni pachilambo." 15 Che Musa ŵataŵile chilisa ni ŵachiŵilasile, "Ambuje Akunnungu ali Bendela Jangu jakulosya kupunda." 16 Ŵatite, "Njikwesye bendela ja Ambuje Akunnungu! Ambuje Akunnungu tamenyane ngondo ni Ŵaamaleki moŵa gose!"