1 Akunnungu ŵaŵechete aga maloŵe gose ŵatite, 2 "Une ndili AMBUJE Akunnungu ŵenu, junankopwesye ku chilambo cha Misili kumwaliji achikapolo.

3 "Nkapopelela minungu jine ikaŵe Une.

4 "Nkalisepela chinyago ni kuchipopelela namose nkalandanya ni chindu chilichose chachili kwinani pane chachili pachilambo, pane chachili mmeesi paasi pa chilambo. 5 Ngasinkotamila atamuno kuitumichila, pakuŵa Une AMBUJE Akunnungu ŵenu ngwete wiu. Ngwajamuka ŵanache ligongo lya sambi sya achinangolo ŵao, mpago waatatu ni wancheche ŵa ŵandu ŵaakumenga. 6 Nambo ngulosya unonyelo wangu kwa ŵandu ŵajinji ŵangaŵalanjika, ŵaakunonyela ni kugakamula makanyo gangu.

7 "Nkalikolanga liina lya AMBUJE Akunnungu ŵenu iyiyipeyi, pakuŵa AMBUJE tanjamuche mundu jwakulitumia liina lyao kwa wamba.

8 "Nkumbuchileje Lyuŵa lya Kupumulila ni kulitenda lyuŵa lyo liŵe kwaligongo lya AMBUJE pe. 9 Moŵa sita mpanganye masengo genu gose, 10 nambo pa lyuŵa lya saba lili Lyuŵa lya Kupumulila kwaligongo lya AMBUJE Akunnungu ŵenu. Pa lyuŵa lyo nkapanganya masengo mmwe mwasyene atamuno nchanda jwenu atamuno mwali jwenu, atamuno kapolo jwenu jwannume pane jwankongwe atamuno ilango yenu atamuno jwannendo jwakutama pamo ni mmwe. 11 Moŵa sita une AMBUJE nagumbile chilambo ni kwinani, bahali ni yose yaili mwelemo, nambo pa lyuŵa lya saba napumulile. Kwaligongo lyo AMBUJE ŵalipele upile lyuŵa lya saba ni kuliswejesya.

12 "Mwachimbichisye atati ŵenu ni achikulu ŵenu, moŵa ga umi wenu gaŵe gamajinji, mu chilambo chakumpa AMBUJE Akunnungu ŵenu.

13 "Nkaulaga.

14 "Nkatenda chikululu.

15 "Nkajiiŵa.

16 "Nkapeleka umboni wa unami nkati njenu.

17 "Kasinnajila nyuumba ja mundu jwaali chiŵandi ni mmwe pane ŵankwakwe, namose kapolo jwakwe jwannume pane jwankongwe, namose ng'ombe jakwe pane mbunda jakwe, atamuno chindu chilichose chakwete."

18 Ŵandu paŵakupikene kulindima ni kuwona kumesya, ni kupikana lipenga lichisonaga, ni chitumbi chikututuma lyosi, wose ŵatetemele ni kwima kwakutalichila. 19 Ŵandu ŵasalile che Musa, "Mmwe mwasyene mmechete ni uwe, chitumpilikanile. Nambo Akunnungu akaŵecheta noweji tukaika kuwa."

20 Che Musa ŵajanjile, "Nkajogopa! Pakuŵa Akunnungu aiche kukunlinga kuti mpunde kwajitichisya, nkatenda sambi." 21 Nipele ŵandu ŵajimi kwakutalichila katema che Musa paŵajaulaga kuliŵandichila liunde lyakandapala amula muŵaliji Akunnungu.

22 AMBUJE ŵasalile che Musa ŵaasalile Ŵaisilaeli: "Nnyiweni mwachinsyene kuti ngungulwiche ni ŵanyamwe kutyochela kwinani. 23 Nkalipanganyichisya minungu jilijose ni kujilandanya ni une, nkalikolochesya minungu ja feza pane ja sahabu. 24 Ntaŵe chilisa cha litaka, nomwe mundyochesye mbopesi pachanya pakwe sya ngondolo ni ng'ombe nti mbopesi sya kutinisya ni mbopesi sya ukamulangano. Palipose pachiisagule kuti ŵandu ambopelele, tinjinnyichilila ni kumpa upile. 25 Iŵaga nkuundaŵila Une chilisa cha maganga, nkagasepa maganga go, pakuŵa naga nkusepa ni indu yenu yakusepela chinchitende chilisa cho chikafai. 26 Nkakwela kwa ngaasi pakwaula ku chilisa changu, nkaika kulosya kumasisimilo pankukwela."