Êxodo 21

Malajisyo gankati achikapolo

1 "Gelega gali malajisyo gachimwape Ŵaisilaeli. 2 Naga nkunsuma kapolo Mwebulania, tachintumichila yaka sita, nambo pa chaka cha saba chimwaleche atyoche pangali malipilo gagaligose. 3 Iŵaga ŵaiche jikape, chatyoche jika, ni iŵaga ŵaiche ali alombele, chatyoche ni ŵankwakwe. 4 Naga ambujegwe ŵanlombekasisye jwankongwe ni kwaŵelechela ŵanache achakongwe pane achalume, nipele, jwankongwe jo ni ŵanache ŵakwe ali ŵa ambujegwe, ni jwannume jo chatyoche jikape. 5 Nambo kapolo jo ajilaga kuti akunnonyela ambujegwe ni ŵankwakwe ni ŵanache ŵakwe, ni ngakusaka kutyoka ni kuŵa ŵalecheleswe, 6 nipele, mmbujegwe channyichisye peuto pakwapopelela Akunnungu paujo pa ŵakulamula. Kweleko chanjimiche kapolo jo pannango pane pambali nnango, ni kumpowola liwiwi kwa nsomelo, nombejo chantumichile mbujegwe mu umi wakwe wose.

7 "Naga mundu akunsumisya mwali jwakwe aŵe kapolo, mwali jo ngaalechelelwa mpela yakuti kulechelelwa achikapolo ŵane ŵachilume. 8 Ni iŵaga nganiŵanonyelesya ambujegwe jwansagwile kuti aŵe ŵankwakwe, ambuje wo chanlechele atatigwe ŵawombwele. Ambujegwe ngasansumisya kwa achalendo, ŵansumisyaga kwa achalendo chachiŵa ŵaatendele 9 Iŵaga chansume kuti ŵaape nchanda jwakwe ikusachilwa ŵaatende mpela mwali jwao. 10 Naga mundu ajigele jwankongwe jwine kuntenda wankwakwe, akapungusya kwapa yaikwaŵajila ŵankwawo ŵandanda, chisau yakulya, yakuwala ni ine yose yaikusachilwa mu ulombela. 11 Naga ngakunkwanilisya mu indu itatu yo, ŵankwakwe ŵaandanda akukombola kutyoka ni kuŵa ŵalechelelwe pangali malipilo gagaligose ga mbiya.

Malajisyo kwa ŵaakulanga

12 "Jwalijose jwakumputa mundu ni kummulaga aulajikwe. 13 Nambo iŵaga igambile kutyochela pe, nambo Akunnungu asachileje ikopochele yeleyo, nipele mundu jo tautuchile ku misi jichiisagule ni kweleko chachiŵa salama. 14 Nambo iŵaga mundu apanjile kummulaga njakwe mele ni ammuleje, ni kuutuchila pa chilisa pangu kuti alikulupusye, muntyosye mundu jo ni kummulaga.

15 "Jwalijose jutampute atatigwe pane achikulugwe mundu jo aulajikwe.

16 "Jwalijose jutanjigale njakwe kwa machili ni kunsumisya pane kuntenda kapolo, mundu jo akamulwaga akusachilwa aulajikwe.

17 "Jwalijose jutanlwesye atatigwe pane achikulugwe mundu jo akusachilwa aulajikwe.

18 "Iŵaga ŵandu akukangana, ni jumo amponyaga njakwe liganga pane amputaga lingumi ni nganawa nambo agonile pachindanda akulwalila, 19 ajula jwaputikwe akombolaga kwimuka ni kuliutauta ni ntindiso, ajula juŵamputile chalechelelwe. Nambo chanlipe juŵamputile jula ligongo lya kwatamikasya pangali masengo, ni sooni tannwasye mpaka alame.

20 "Naga mundu amputaga lubokola kapolo jwakwe jwannume pane jwankongwe kwika mwa kwasika papopo, mundu jo akusachilwa ajamukwe. 21 Nambo kapolo ajimukaga pakumala lyuŵa limo pane moŵa gaŵili, mundu jo ngajamukwa, pakuŵa kapolo jo ali jwao.

22 "Achalume aputanaga ni kummulasya jwankongwe jwali ni chiilu kwika mwa kupolosya, nambo nganaulala pane, jwatesile yeleyo chalipe chipanje chichachisala ŵankwakwe jwankongwe jo, pakumala kwitichisya ŵakulamula. 23 Nambo iŵaga aulele nnope, ajula jwaulesye aulaswe nti yatite kuulasya, 24 naga ŵaulesye liso aulaswe liso, ni iŵaga ŵaulesye lino aulaswe lino, iŵaga ŵaulesye nkono aulaswe nkono, ni iŵaga ŵaulesye lukongolo aulaswe lukongolo, 25 ni iŵaga ŵachomile mooto nombejo ŵachome naga ŵaaŵisile liŵanga nombejo ŵaaŵiche liŵanga ni iŵaga ŵakowele nombewo ŵaakowole.

26 "Iŵaga mundu amputile kapolo jwannume pane jwankongwe pa liso ni kuliulasya, akusachilwa ŵalechelele kapolo jo ajaule, gelego gali malipilo ga liso lyakwe. 27 Ni iŵaga ankusile lino kapolo jwao jwannume pane jwankongwe, ŵalechelele kapolo jo ajaule, gelego gali malipilo ga lino lyakwe.

Malajisyo gankati ilango

28 "Iŵaga ng'ombe tonde jintutile mundu kwa misengo ni kummulaga, tonde jo jiulajikwe kwa kujiponya maganga ni nyama jakwe jikaligwa. Nambo nsyene tonde jo ngasimunlamula. 29 Nambo iŵaga tonde jo jisyoŵelele kututa ŵandu ni misengo, nsyene tonde jo ŵajamuchikwe kakajinji nkati chindu cho nambo nganajitaŵilila, jaikaga kuulaga mundu, tonde jo jiulajikwe kwa kujiponya maganga nombe nsyene tonde jo akusachilwa aulajikwe nombe. 30 Nambo mundu jo asalilwaga alipe kuti auwombole umi wakwe, alipe malipilo gakwanila mpela yatite pakusalilwa. 31 Malajisyo ga chigatumiche nombe iŵaga tonde chijimmulaje kwa misengo jwanchanda pane mwali. 32 Iŵaga tonde chijimputile kapolo jwankongwe pane jwannume, nsyene tonde jo chalipe ipande selasini ya feza kunlipa nsyene kapolo, ni tonde jo jiulajikwe kwa kujiponya maganga.

33 "Naga mundu alesile lisimbo pangaunichila pane kusola lisimbo pangaunichila ni tonde pane mbunda jitumbuchile mu lisimbo lyo, 34 asyene lisimbo lyo chalipe, chiŵape mbiya asyene chinyama, ni chinyama chachiwile cho chichiŵe chakwe asyene lisimbo. 35 Naga tonde ja mundu jimmulesye tonde ja mundu jwine kwika mwa kuwa, tansumisye tonde jwanjumi jula ni kugaŵana mbiya yalumo, nombe chinyama chachiwile chila tagaŵane yalumo. 36 Namose yeleyo, iŵaga imanyiche kuti tonde jisyoŵelele kututa ni misengo jakwe ni nsyene tonde jo nganiŵataŵilila, nsyene tonde jo chalipe chinyama kwa chinyama, ni nyama ja chinyama chachiwile chijiŵe jakwe.

Bíblia Online

Veja também

Oração para pedir a Deus que aumente a fé quando o coração está cheio de dúvida

Como o amor de Deus cura as dores de relações passadas?