Kutyoka 18:13-26 | YNT2018

13 Malaŵi jakwe che Musa ŵatemi pamo ni ŵandu achilamulaga. Ŵandu ŵajimi ali ŵaasyungwile kutandilila kundaŵi mpaka ligulo. 14 Che Yetulo akwegawo che Musa paŵaiweni aila che Musa iŵaapanganyichisye ŵandu, ŵaasalile, "Chindu chachi chelechi chinkwapanganyichisya ŵandu? Ligongo lyachi mmwe jika ntemi akuno ŵandu wose ajimi kunsyungula kutandila kundaŵi mpaka ligulo?" 15 Che Musa ŵaajanjile, "Nguitenda yele pakuŵa ŵandu ŵa akunyichilila une kukuusya yakuisaka Akunnungu. 16 Aŵaga ni magambo galigose akwikangana kukwangu ni une ngwalamula ŵaleŵile. Ni une ngwamanyisya makanyo ga Akunnungu ni malajisyo gakwe." 17 Nipele che Yetulo ŵatite, "Ngaŵa yambone inkwitendekanya. 18 Chingambe kuuŵana mmwe ni ŵandu ŵa! Pakuŵa masengo ga gali gakulimba, ni ngankombola kugapanganya jika pe. 19 Mumbilikanile sambano, ingunsalila ni Akunnungu taŵe ni mmwe. Mmwejo mme pamalo pa ŵandu paujo pa Akunnungu ni kwapelechela Akunnungu ukangani wao. 20 Sooni timwajiganye makanyo ni malajisyo ga Akunnungu ni kwalosya itajile pa kutama ni indu yakusachilwa kuitenda. 21 Nambo mwasagule ŵandu ŵampepe mwa ŵelewo, ŵandu wo aŵeje ŵaali ni ukombole ni ŵakwachimbichisya Akunnungu, ŵachikulupichiko ni ŵangakupochela indu ya pachisyepela. Mwaŵiche ŵane mwa ŵeleo kuti aŵe ilongola ŵa ŵandu elufu, ŵane ilongola ŵa ŵandu mia moja ni ŵane ilongola ŵa ŵandu hansini ni ilongola ŵa ŵandu likumi. 22 Mwalechele ŵelewo kuti ŵalamuleje ŵandu moŵa gose. Ni chiiŵe yele magambo gagakusausya nnope aichisye kukwenu, nambo magambo gamwanamwana tachilamula achinsyene. Pakutenda yeleyo masengo genu tigaŵe gakwepepala, pakuŵa ŵanyawo tankamusyane ni mmwe. 23 Naga tintende yeleyo ni iŵaga ni yakwisaka Akunnungu nnyitende, ngampela ni ŵandu tachiuja kumangwao ali ni chitendeŵele."

24 Che Musa ŵapikanile maloŵe ga akwegwao ni kuitenda mpela iŵasasile. 25 Ŵasagwile ŵandu ŵaali ni ukombole pasikati ja Ŵaisilaeli, ni kwaŵika aŵe ilongola ŵa ŵandu elufu, ni ŵane ilongola ŵa ŵandu mia moja ni ŵane ilongola ŵa ŵandu hansini ni ŵane ilongola ŵa ŵandu likumi. 26 Ni ŵanyawo ŵaalamulaga ŵandu moŵa gose. Magambo gakusausya ŵapelechele che Musa, nambo magambo gamwanamwana ŵagalamwile achinsyene.

Estes versículos te tocaram? Ore agora!