Ŵandu akogopanga (Indu ya katema 5:22-33)
18 Ŵandu paŵakupikene kulindima ni kuwona kumesya, ni kupikana lipenga lichisonaga, ni chitumbi chikututuma lyosi, wose ŵatetemele ni kwima kwakutalichila. 19 Ŵandu ŵasalile che Musa, "Mmwe mwasyene mmechete ni uwe, chitumpilikanile. Nambo Akunnungu akaŵecheta noweji tukaika kuwa."
20 Che Musa ŵajanjile, "Nkajogopa! Pakuŵa Akunnungu aiche kukunlinga kuti mpunde kwajitichisya, nkatenda sambi." 21 Nipele ŵandu ŵajimi kwakutalichila katema che Musa paŵajaulaga kuliŵandichila liunde lyakandapala amula muŵaliji Akunnungu.
Malajisyo nkati chilisa
22 AMBUJE ŵasalile che Musa ŵaasalile Ŵaisilaeli: "Nnyiweni mwachinsyene kuti ngungulwiche ni ŵanyamwe kutyochela kwinani. 23 Nkalipanganyichisya minungu jilijose ni kujilandanya ni une, nkalikolochesya minungu ja feza pane ja sahabu. 24 Ntaŵe chilisa cha litaka, nomwe mundyochesye mbopesi pachanya pakwe sya ngondolo ni ng’ombe nti mbopesi sya kutinisya ni mbopesi sya ukamulangano. Palipose pachiisagule kuti ŵandu ambopelele, tinjinnyichilila ni kumpa upile. 25 Iŵaga nkuundaŵila Une chilisa cha maganga, nkagasepa maganga go, pakuŵa naga nkusepa ni indu yenu yakusepela chinchitende chilisa cho chikafai. 26 Nkakwela kwa ngaasi pakwaula ku chilisa changu, nkaika kulosya kumasisimilo pankukwela."