1 Wurubwarɛ wɔtabʋrʋlɛ Eliya gɛtɛ e ye Tisibe ditele gɛtɛ dɩ̀ sa Gileyadi fɔ, ɛ dɔ̀ Ahabi alan, <<Na nya Yahwe, Isareli wo Wurubwarɛ, gɛtɛ ntɛ sʋma lɛ alɛ, dɩya abɛɛ ɛsʋn ɛn nan nʋ̀n bɩkyan bɛrɛɛ gɛtɛ bɩɩ ba lɛ, sɩyɛɛ na dɔ̀ alɛ ɛ nʋ̀n pɛ.>>

2 Ɛwʋ gɛ Yahwe ɛ tabʋrʋ ɛ tɛ Eliya alan, 3 <<Ye nfan fɔ àà fi san ofila wʋʋ gɛtakʋn wʋʋ gɩlan, fɔ àà ma bu Keriti getu-bi gɛtɛ gɩ̀ sa Yodan getu giifila wʋʋ gɛtakʋn fɔ gaanɩ. 4 Aà nyʋn getu-bi fɔ gii butu, gɛ na wɛrɛ dɔ̀ kwankwandabi ɛbɛ alɛ bɛ tɩ̀ tɛ wɔ anyandilɛ dʋkɔ.>>

5 Okoro Eliya ɛ mɛ anlɛ gɛtɛ Yahwe ɛ dɔ̀ wɔ fɔ. Ɛ san Keriti getu-bi gɛtɛ gɩ̀ sa Yodan getu giifila wʋʋ gɛtàkʋn fɔ gaanɩ, gɛ ɛ sara dʋkɔ. 6 Gɛ bɛkwankwandabi ɛbɛ fɔ bɛɛ tɩ̀ ka boroboro ma gɩnan bɛ mɔma wɔ gagyɩgyan ma ɔgyɔlɔ, gɛ ɛɛ nyʋn getu-bi fɔ gii butu.

7 Ɔya bɛrɛɛ wʋkɩ waanɩ fɔ, getu-bi fɔ gii butu bʋ nyʋn, yema ɛsʋn ɛn mɩnɩ taà nʋ̀n gɛtʋnkwaa fɔ gaanɩ.

8 Ɛwʋ gɛ Yahwe dɔ̀ wɔ alan, 9 <<Tɔ disere-kɩlɩn san Sarefati ditele gɛtɛ dɩ̀ sa Sidon gɛtʋnkwaa gaanɩ fɔ, fɔ àà sara dʋkɔ. Nya, na wɛrɛ dɔ̀ ɛkpɩnsɔ ɛkɩ dʋkɔbɛ alɛ, ɛ tɩ̀ tɛ wɔ̀ anyandilɛ.>> 10 Okoro Eliya ɛ tɔ ɛ da Sarefati. Gɛtɛ ɛ ma gyu ditele fɔ diitunu fɔ, ɛkpɩnsɔ ɛkɩ è yela dʋkɔ ɛɛ tasɩ bʋtan. Ɛwʋ gɛ Eliya e kpèlè wɔ gɛ ɛ dɔ̀ wɔ alan, <<Aà talɩ a tɛ mɩ butu bɛrɛɛ ma difirinbi nan nyʋn?>> 11 Gɛ gɛtɛ ɛɛ fɔrɔ ɛ maà kpa butu fɔ ɛ bɛ tɛ wɔ fɔ, e kpèlè wɔ alan, <<Ǹ fɔ wɔ gɛ, àà tɛ mɩ boroboro bɛrɛɛ fɩya!>>

12 Gɛ ɛ dɔ̀ wɔ alan, <<Na nya Yahwe, aa Wurubwarɛ gɛtɛ ɛ̀ sa lɛ alɛ, nn ma boroboro. Ǹ ba gɛ ɔnʋmʋ bɛrɛɛ lɛ gɛtɛ wʋ̀ sa gubun gaanɩ, fɩya ma bʋnɔ bɛrɛɛ gɛtɛ bʋ̀ sa parantʋwa anɩ. Na ba ntɛ kʋla bʋtan nan ka n san dɩkpaara fɔ nan ma ka wʋ n kpèlè, fɔ ɛtɩ ma miinbi-teni taà di taanyan-dɩlɛ-kurumakyɛɛ. Wʋʋ gama fɔ dɩkpan nan wolo tɩ fɔ tàà ku.>>

13 Mɔ Eliya ɛ dɔ̀ wɔ alan, <<Kara yɛ gɩsaa gàà ton wɔ̀! san dɩkpaara fɔ, àà ma mɛ anlɛ gɛtɛ a dɔ̀ lɛ. Mɔ fɔ gyegeye kpa ɔnʋmʋ gɛtɛ à ba fɔ waanɩ bɛrɛɛ mɛ kyakpɛrɛ bɛ tɛ mɩ, wʋʋ gama fɔ àà mɛ gɩnyankɩ tɛ ɛyɩ ma aabi. 14 Yema Yahwe, Isareli wo Wurubwarɛ fɔ ɛ dɔ̀ alan, <Ɔnʋmʋ gɛtɛ wʋ̀ sa gubun gaanɩ fɔ, wʋn nan were wʋ nya, gɛ bʋnɔ gɛtɛ bʋ̀ sa parantʋwa anɩ fɔ mɔ, bʋn nan were, ma sere duwi gɛtɛ Yahwe ɛɛ̀ yɛ ɛsʋn ɛ̀ɛ̀ nʋ̀n gɛtʋnkwaa fɔ gii koro.> >>

15 Ɛwʋ gɛ ɛkpɩnsɔ fɔ ɛ san ɛ ma mɛ anlɛ gɛtɛ Eliya ɛ dɔ̀ fɔ. Okoro anyandilɛ ɩ sara ɩ tɛ Eliya, ma ɛna fɔ ma wɔ dɩkpaara dɩɩ bɛnɩ duwi-kamasɛ. 16 Yema ɔnʋmʋ gɛtɛ wʋ̀ sa gubun fɔ gaanɩ fɔ wun were wʋ nya, gɛlɛ ke gɛ bʋnɔ gɛtɛ bʋ̀ sa parantʋwa anɩ fɔ mɔ, bun were anlɛ gɛtɛ Yahwe ɛ dama Eliya wo koro ɛ dɔ̀ fɔ.

17 Ɔya bɛrɛɛ wʋkɩ wʋʋ gama fɔ dɩkpaara dɩɩna fɔ wobi-tenibi fɔ e be gyu geyeba. Gɛ geyeba fɔ giinyun wʋ bɛ mɛ ɔkɛma gɛtɛ e belen ɔŋɛɛ. 18 Gɛ ɛna fɔ e lila Eliya alan, <<Oo, Wurubwarɛ wɔnɩ, anʋn yaade-kpen gɛ na mɛ wɔ̀? A ba à bɛ kʋna mɩ maade-kpen, fɔ àà wolo miinbi-tenibi?>>

19 Eliya e tiri wuunyun alan, <<Ka aabi fɔ tɛ mɩ.>> E to ebi fɔ e ye walɔ yaanɩ, gɛ ɛ ka wɔ ɛ bʋn ɛ san gatala gii dikwo fɔ daanɩ, ɔkʋn gɛtɛ ɛ̀ sa fɔ, gɛ ɛ ka wɔ ɛ dʋrɔ wɔ npa wo koro. 20 Ɛwʋ gɛ Eliya ɛ gbɛrɛ afala ɛ tɛ Yahwe alan, <<Oo, Yahwe, miin Wurubwarɛ, anʋn yii koro gɛ a wolo ɛkpɩnsɔ gɛtɛ na gyu wakʋn fɔ wobi-tenibi gɛ a yɛ gyerebi e di wɔ?>> 21 Gɛ Eliya ɛ tʋna wo koro, ɛ dʋrɔ ebi fɔ wo koro disere disiyee, gɛ ɛ gbɛrɛ afala ɛ tɛ Yahwe alan, <<Oo, Yahwe, miin Wurubwarɛ, yɛ ebi nyawɔ wɔ nkpa èè biri ba wanɩ.>>

22 Ɛwʋ gɛ Yahwe ɛ nʋn Eliya wafala fɔ, gɛ ebi fɔ wɔ nkpa e biri e be gyu wanɩ gɛ e wura nkpa. 23 Gɛ Eliya ɛ ka ebi fɔ ɛ waran e ye gatala ɛ bɛ tɛ wɔna gatɩn gɛ ɛ dɔ̀ wɔ alan, <<Nya, aabi fɔ ɛ̀ sa nkpa.>>

24 Gɛ ɛna fɔ ɛ dɔ̀ Eliya alan, <<Nkele, na we gɛtɛ à di gɛ Wurubwarɛ wɔnɩ, gɛ Yahwe wanyun-gyebi gɛtɛ i ye aanyun waanɩ fɔ, ì di gɛ nʋnkwarɩ.>>