1 Gɛtɛ Yahwe Dikola dɩɩ dɩdaka fɔ dɩ sara Filisiti bete bɔɔ gɛtʋnkwaa gaanɩ bebon kwarankɩ wʋʋ gama fɔ, 2 Filisiti bete be kpèlè boo bekpente ma bɔɔ bɛsɔmalɛ, gɛ be lila bɛ alan, <<Lan gɛ taà mɛ ma Yahwe Dɩdaka fɔ? I wùlà tɩ anlɛ gɛtɛ taà birima dɩ tɩ san dii geyekʋn.>>

3 Be tiri wuunyun alan, <<Gengyi yaà birima Isareli wokpen Dɩdaka fɔ ɩ san fɔ, ɩ kara ka dɩ ɩ san tuntun, ɩ ka ade-kpen yɩɩ gɛkakyɛ yii gedi gɩɩ gɛtɛ̀ ɩ fɩya ma ɛdɩ. Gɛlɛ fɔ, yaà wura geyeba gɩɩ gɛkya, gɛ yaà nyɩnla ade gɛtɛ yii koro gɛ wowurufa wʋʋ ba yii koro.>>

4 Filisiti bete be lila alan, <<Anyan mɔmɔ gɛ taà ka tɩ tɛ ade-kpen yɩɩ gɛkakyɛ yii gedi gɩɩ gɛtɛ̀ fɩya ma Dikola Dɩdaka fɔ?>>

Gɛ be tiri wuunyun alan, <<Yaà tɛ sɩka-sɩya wanyan ton gɛtɛ ì yela ɩ̀ tɛ beserelɛ gɛtɛ be sere yɩ fɔ, ma begbele ton anlɛ gɛtɛ yii begyu-dɩrɛ bɔɔkʋna wù we fɔ. Yema diyebabi-kɩlɩn nyadɩ na gye ɛyɩ ma yii-ise yɩɩ bɛtɛlɛ fɔ. 5 Okoro ɩ mɛ anyan-maralɛ anlɛ beserelɛ fɔ boonundu ma begbele gɛtɛ bɛɛ mɩna gɛtʋnkwaa fɔ, fɔ yàà ka gebù ɩ tɛ Isareli wokpen fɔ. Nkɩfɔ eè kere wowurufa gɛtɛ è de ɛyɩ ma yii bekpen ma yɩɩ gɛtʋnkwaa yii koro fɔ ɛ ya. 6 Anʋn yii koro gɛ ɩɩ mɛ oturu-dʋrʋ anlɛ gɛtɛ Egyipiti bete ma Farawo bɛ mɛ fɔ? Ɔkʋna gɛtɛ Wurubwarɛ e tiira bɛ giten fɔ, bɛn tɛ Isareli bete fɔ osele, gɛtɛ bàà san ɔkʋn gɛtɛ bee len fɔ?

7 Nkele, ɩ mɛ tiiramisan, fɔ yàà len bɛkwɔ-nanɩ bɛnyɔɔ gɛtɛ bè de abi, gɛ bɛn tɛ sa bɛ oyon gigyen mɛ gʋtʋn fɔ. Ɩ ban bɛ ma tiiramisan fɔ, mɔ i birima baabi fɔ ɩ ma sa bɛnan boo dikwo daanɩ. 8 Ɩ ka Yahwe Dɩdaka fɔ ɩ gyaga tiiramisan fɔ wo koro, fɔ yàà ka sɩka-sɩya wanyan gɛtɛ ɩ mɛ gɛtɛ i yela tɛ ade-kpen yɩɩ gɛkakyɛ dii gedi dɩɩ gɛtɛ̀ fɔ ɩ sa dɩdakabi gɛtɛ ɩ mɛ ɩ marama tiiramisan fɔ daanɩ. Fɔ yaà tiri tiiramisan fɔ osele. 9 Mɔ ɩ sɩ̀ gʋnʋn yaà tɩ nya dɩ! Gengyi dɩ̀ bʋn dɩɩ fɔrɔ dii geyekʋn Beti-Semesi fɔ, wuu wùlà alɛ Yahwe na di tɩ gyerebi-dɩrɛ nyawɔ. Mɔ gengyi dɩn da ma dʋkɔ fɔ, wuu wùlà alɛ nka Yahwe n tɛ tiira tɩ giten. Wù di ade-dɩrɛ gɛtɛ ɩ ba gɛ tuntun.>>

10 Okoro bɛ mɛ gɛlɛ. Bɛ ka bɛkwɔ-nanɩ bɛnyɔɔ fɔ gɛtɛ be de abi fɔ, gɛ bɛ ban bɛ bɛ marama tiiramisan fɔ, gɛ bɛ kpaara baabi fɔ bɛ ma sa bɛnan boo dikwo daanɩ. 11 Bɛ ka Yahwe dɩdaka fɔ bɛ gyaga tiiramisan fɔ wo koro fɩya ma begbele gɛtɛ bɛ ka sɩka-sɩya bɛ mɛ fɔ ma sɩka-sɩya wanyan gɛtɛ bɛ mɛ yɩ anlɛ beserelɛ fɔ, bɛ sa dɩdakabi fɔ daanɩ. 12 Gɛ Bɛkwɔ fɔ bɛ ka osele fɔ tɩɩn bɛ bʋn ma Beti-Semesi, gɛtɛ bɛn falɩ dɩbɩyan abɛɛ ɔlɔgyɩ. Gɛ Filisiti wo-ise yii bɛndɩrɛ fɔ bɛ tɛrɛma bɛ gɛlɛɛ ma ye Beti-Semesi wɔbalan waanɩ.

13 Waanɩ fɔ Beti-Semesi bete bee belen baamɔrɔ dɩtagba fɔ daanɩ. Gɛtɛ bɛ bʋma bʋnʋn, gɛ be we Yahwe dɩdaka fɔ, wʋ mɛ bɛ ɔsɛ gepepe. 14 Tiira-mɩ-san fɔ ɛ ma gyu Yosuwa gɛtɛ e ye Beti-Semesi fɔ woli waanɩ, gɛ wu yela dʋkɔbɛ dɩtaa-dɩrɛ dɩkɩ dɩɩpɩ. Bɛnɩ fɔ be kebi tiiramisan fɔ wo-iyon bɛ sa ɔtan gɛ bɛ ka bɛkwɔ fɔ bɛ tɛ gekuma gii gedi bɛ tɛ Yahwe. 15 Lefi bete bɛ warama Yahwe Dɩdaka fɔ fɩya ma dɩdakabi gɛtɛ sɩka-sɩya wanyan ɩ̀ sa daanɩ fɔ bɛ gyaga dɩtaa-dɩrɛ fɔ dii koro. Duwi dɩtɔkɔ Beti-Semesi bete bɛ tɛ Yahwe gekuma gii gedi, ma gedi gɩɩ gɛtɛ̀ kperen-kperen. 16 Filisiti wo begyu-dɩrɛ ton fɔ be we ade nyayɩ powu, gɛ duwi dɩtɔkɔ ke be biri bɛ da Ekiron.

17 Sɩka-sɩya wanyan gɛtɛ bɛ mɛ anlɛ beserelɛ gɛtɛ Filisiti bete, ditele-kamasɛ ma diiyo (Asidodi, ma Gasa, ma Asikelon, ma Gati, ma Ekuron). Bɛ ka bɛ ba anlɛ ade-kpen yii gedi dɩɩ gɛtɛ̀ tɛ Yahwe fɔ ɩ lɛ. 18 Gɛ begbele gɛtɛ bɛ ka Sɩka-sɩya bɛ mɛ fɔ, baasɔ ɩ̀ san ma Filisiti bete boo begyu-dɩrɛ ton baatele-dɩrɛ gɛtɛ bɛ mara ɩpɔrɩ be silin yɩ fɔ. Dɩtaa-dɩrɛ gɛtɛ bɛ warama Yahwe dɩdaka bɛ gyaga dii koro, gɛ dɩ̀ sa Yosuwa gɛtɛ e ye Beti-Semesi fɔ woli waanɩ fɔ n di adansɛ duwi dɩtɔkɔ.

19 Mɔ Yahwe e wolo Beti-Semesi beteni bɛkɩ. E wolo baanɩ akpilin asiyee ma fwo (70), yema bɛ nya Wurubwarɛ Dikola dɩɩ dɩdaka fɔ daanɩ. Gɛ bɛnɩ fɔ be wula yema Yahwe e wolo bɛnɩ kpekpesi nyabɛ e ye baanɩ. 20 Gɛ Beti-Semesi bete be lila alan, <<Ɛnyan nan talɩ e yela Yahwe, Wurubwarɛ fɩrɩnfɩrɩn nyawɔ bʋnʋn? Ɛnyan wakʋn gɛ taà ka Wurubwarɛ dɩdaka nyadɩ ti ye tɩ san?

21 Okoro bɛ sa bɛnɩ bɛ san Kiriyati-Yarim bete baakʋn gɛ bɛ dɔ̀ bɛ alan, <<Filisiti bete be birima Yahwe dɩdaka fɔ bɛ ba. Ɩ waran ɩ ba yàà ba ka dɩ ɩ bʋn ɩ san yaakʋn.>>