33 फेर इस्राएलियाँ नै यहोवा कै पर्वत तै चाल कै तीन दिन का सफर करया; अर उन तीन्‍नु दिनां कै राह म्ह यहोवा के करार का सन्दूक उनके खात्तर आराम का स्थान टोहन्दा होया उनकै आग्गै-आग्गै चालदा रह्या। 34 अर जिब वे छावणी की जगहां तै चाल्या करै थे फेर दिन भर यहोवा का बाद्दळ उनके उप्पर छाया रहवै था। 35 अर जिब-जिब सन्दूक का चालणा होवै था तब-तब मूसा यो कह्या करै था, "हे यहोवा, उठ, अर तेरे बैरी तित्तर-बितर हो जावैं, अर तेरे बैरी तेरे स्याम्ही तै भाज जावैं।" 36 अर जिब-जिब वो ठैहर ज्या था तब-तब मूसा कह्या करै था, "हे यहोवा, हजारां-हजार इस्राएलियाँ म्ह बोहड़कै आजा।"