1 दाऊदो रे आखरी वचन यो ए: यिशै रे पाऊए री ये बाणी ए, तेस मर्दो री बाणी ए

जो ऊच्चे रे खड़ा कित्तेया गया ओर याकूबो रे परमेशरो रा अभिषिक्त ओर इस्राएलो रा मिठे पजन गाणे वाल़ा ए:

2 "यहोवे रा आत्मा मांदे ऊई की बोलोआ

ओर तेसरा ई वचन मेरे मुंए दे आया।

3 इस्राएलो रे परमेशरे बोली राखेया,

इस्राएलो री चट्टाने मां साथे गल्ला करी राखिया कि माणूंआ पाँदे राज करने वाल़ा एक तर्मी ऊणा,

जेस परमेशरो रा डर मानदे ऊए राज करना,

4 से मानो प्यागा रा प्रयासा ऊणा जेबे सूरज निकल़ोआ,

एड़ी प्याग जिदे बादल़ नि ओ,

जेड़ी बर्खा ते बाद छाँट निबल़ो रिया बजअ ते जमीना ते अरा-अरा काआ जम्मोआ।

5 क्या मेरा कराना परमेशरो रिया नजरा दे एड़ा नि ए?

तिने तो मां साथे सदा री एक एड़ी वाचा बानी राखी,

जो सबी गल्ला रे ठीक कित्ती री ओर अटल़ बी ए।

कऊँकि चाए से तिजी खे बताओ नि,

तेबे बी मेरा पूरा उद्धार ओर पूरी इच्छा रे बारे दे सेईए।

6 पर सारे बुरे लोक नकम्मे जाड़ो जेड़े ए जेतेखे आथो साथे पकड़ी नि सकदे;

7 पर जो लोक तिजी खे छूँओआ

तेसखे सेयो एड़े चूबो ए जेड़े लोए रे या लकड़िया रे बणे रे ओ,

सेयो लोक कांडेया जेड़े ऊणे, सेयो आगी दे सेटे जाणे,

ओर सेयो पूरी तरआ ते पस्म ऊई जाणे।"

8 दाऊदो रे शूरवीरा रे नाओं यो ए, मतलब तहकमोनी जगा रा रणे वाल़ा योशेब्यश्शेबेत, जो सरदारा दे खास था; तेसखे एस्नी अदीनो बी बोलो थे; जिने एक ई बखते 800 सिपाई काये थे। 9 तेसते बाद अहोही दोदै रा पाऊ एलीआजर था। से तेस बखते दाऊदो साथले तीनो वीरा बीचा ते था, जेबे तिने युद्ध करने खे कट्ठे ऊई रे पलिश्ती ललकारे ओर इस्राएली सिपाई दूर चली गे थे। 10 से पलिश्तिया खे तदुओ तक कांदा रया जदुओ तक तेसरा आथ थकी नि गया ओर तलवार आथो साथे चिपकी नि गई ओर तेस दिने यहोवे बड़ी जीत कराई ओर जो लोक तेस पीछे ऊए सेयो सारे बस लुटणे खे ई तेस पीछे ऊए। 11 तेसते बाद हरारी कुलो रे आगो रा पाऊ शम्मा था। पलिश्तिये कट्ठे ऊई की एक लही शईरो दे दल बानेया, जेती मस्सरा रा एक डोरू था ओर लोक तिना रे डरो रे मारे नठीगे। 12 तेबे तिने डोरूआ बीचे खड़े ऊई की से बचाया ओर पलिश्ती काई ते ओर यहोवे बड़ी जीत दलाई। 13 तेबे तीई खास सरदारा बीचा ते तीन जणे बडाईया रे बखते दाऊदो गे अदुल्लाम गुफा दे आए ओर पलिश्तिया रे दले रपाईम नाओं री काअटिया दे डेरे लगाई राखे थे। 14 तेस बखते दाऊद गढ़ो रे था ओर तेस बखते पलिश्तिया री चौकी बेतलेहमो दे थी। 15 एक दिन दाऊदे बड़ी इच्छा साथे बोलेया, "माखे बेतलेहमो रे बड़े द्वारो रे कुएँ रा पाणी केस पल़्याणा?" 16 तेबे सेयो तीनो वीर पलिश्तिया रे डेरे दे गये ओर तिना साथे लड़े ओर बेतलेहमो रे बड़े द्वारो रे कुएँ रा पाणी परी की दाऊदो गे ली आए। पर तिने पीणे खे ना करी ती ओर यहोवे रे सामणे लटिता, 17 ओर बोलेया, "ओ यहोवा, मांते एड़ा काम दूर रओ। क्या आऊँ तिना माणूंआ रा खून पियूँ जो आपणे प्राणो पाँदे खेली की गये थे?" इजी बजअ ते तिने से पाणी पीणे ते ना करी ती। इने तीऊँ वीरे यो ई काम कित्ते। 18 अबीशै जो सरूयाह रे पाऊ योआबो रा छोटा पाई था, से तीऊँ ते लग था। तिने आपणा भाल़ा चलाई की 300 जणे काये ओर तीऊँ बीचे तेसरा नाओं ऊईगा। 19 से तीऊँ ते जादा जाणेया-मानेया रा था। ओर इजी ते ई से तिना रा परदान ऊईगा; पर खास तीऊँ पदा पाँदे नि पऊँचेया। 20 तेबे यहोयादा रा पाऊ बनायाह था, जो कबसेल शईरो दे रणे वाल़ा एक बड़ा काम करने वाल़े वीरो रा पाऊ था; तिने शेरो जेड़े दो मोआबी काये ओर बर्फ पड़ने रे बखते तिने एक गड्डे दे उतरी की एक शेर काया। 21 तेबे तिने एक बांका मिस्री मर्द काया। मिस्त्रिये तो आथो रे भाल़ा लई राखेया था; पर बनायाह एक डण्डा लई की ई तेसगे गया ओर मिस्त्रिये रे आथो ते भाल़ा छुड़ाई की तेसरे ई भाल़े साथे से काई ता। 22 एड़े-एड़े काम करी की यहोयादो रा पाऊ बनायाह तिना तीऊँ बीचे नामी ऊईगा। 23 से तीई जणेया बीचे जादा जाणेया-मानेया रा तो था, पर खास तीऊँ पदा पाँदे नि पऊँचेया। तेसखे दाऊदे आपणी निज सभा रा सभासद नियुक्त कित्तेया। 24 तेबे तीईया बीचे योआबो रा पाई असाहेल; बेतलेहमी दोदो रा पाऊ एल्हानान, 25 हेरोद कुलो रा शम्मा, ओर एलीका, 26 पेलेती शईरो रा हेलेस, तकोई शईरो रे इक्केशो रा पाऊ ईरा, 27 अनातोत शईरो रा अबीएजेर, हूशाई कुलो रा मबुन्ने, 28 अहोही कुलो रा सल्मोन, नतोपाही शईरो रा महरै, 29 एक ओर नतोपाही शईरो रा बानाह रा पाऊ हेलेब, बिन्यामीनिया रे गिबा शईरो रे रीबै रा पाऊ इत्तै, 30 पिरातोनी शईरो रा बनायाह, गाश पाह्ड़ो रे नाल़ेया गे रणे वाल़ा हिद्दै, 31 अराबा रा अबीअल्बोन, बहूरीम शईरो रा अज्मावेत, 32 शालबोन शईरो रा एल्यहबा, याशेनो रे कुलो बीचा ते योनातान, 33 हरारी कुलो रा शम्मा, हरार शईरो रे शारारो रा पाऊ अहीआम, 34 माका शईरो रे अहसबैए रा पाऊ एलीपेलेत गीलो शईरो रे रणे वाल़े अहीतोपेलो रा पाऊ एलीआम, 35 कर्मेल शईरो रा हेस्रो, अराबी शईरो रा पारै 36 सोबाई नातानो रा पाऊ यिगाल, गादी बानी, 37 अम्मोनी सेलेक, बेरोत शईरो रा नहरै जो सरूयाह रे पाऊ योआबो रा अथियार टोणे वाल़ा था, 38 येतेर शईरो रा ईरा ओर गारेब 39 ओर हित्ती ऊरिय्याह था: सारे मिलाई की सैंती थे।