1 एकी दिने मूसा आपणे सऊरे यित्रो जेसरा नाओं रूएल ए ओर जो मिद्यानो रा पुरोईत था तेसरिया पेडा-बाकरिया चराणे लगी रा था ओर से तिना खे सुनसाण जगा री पच्छमा री तरफा खे होरेब नाओं रे परमेशरो रे सीनै नाओं रे पाह्ड़ो रे नेड़े लईगा। 2 तेबे यहोवे रे दूते मूसे खे एक कांडे वाल़े फुखदे ऊए जाड़ो बीचे आगी री लूपिया रे दर्शण दित्तेया ओर तिने नजर करी की देखेया कि जाड़ फूखणे लगी रा, पर स्वा नि ऊणे लगी रा।* 3 तेबे मूसे सोचेया, "मां तेती जाई कि ये अचम्बे रा काम देखणा कि एते कांडे वाल़े जाड़ो रे आग तो लगी री पर ये जाड़ फूखणे कऊँ नि लगी रा।"*

4 जेबे यहोवे देखेया कि मूसा मुड़ी की देखणे आऊणे लगी रा, तेबे परमेशरे तेसखे कांडे वाल़े जाड़ो बीचा ते आका पाईया, "ओ मूसा, ओ मूसा!" मूसे बोलेया, "हाँजी, आँऊ एती ए।"

5 तेबे परमेशरे बोलेया, "एते नेड़े नि आओ ओर आपणे पैरा ते जोड़े खोली दे, कऊँकि जेते जगा रे तूँ खड़ी रा, से पवित्र जगा ए।"* 6 फेर परमेशरे बोलेया, "आऊँ तेरे बाओ-दादे, अब्राहम, इसहाक ओर याकूबो रा परमेशर ए।" तेबे मूसा जो परमेशरो रिया तरफा खे देखणे ते डरने लगी रा था, तिने आपणा मूँ टखी ता।*

7 फेर यहोवे बोलेया, "मैं आपणी प्रजा रे लोक, जो मिस्रो रे ए, तिना रे दु:ख पक्का देखी राखे ओर तिना रा चींगणा जो मईणत करवाणे वाल़े रिया बजअ ते ओआ, से बी मैं सुणी राखेया ओर तिना रे दु:खो पाँदे मैं त्यान लगाई राखेया। 8 इजी री खातर एबे आऊँ उतरी की आईगा रा ताकि तिना खे मिस्रिया रे वशो ते छुड़ाऊँ ओर तेते देशो ते निकयाल़ी की केसी तुरे ओर बड़े देशो रे जो सच्चो खेई बऊत ई पजणे वाल़ा देश ए, मतलब कनानी, हित्ती, एमोरी, परिज्जी, हिब्बी ओर यबूसी लोका रिया जगा रे पऊँचाई देऊँआ। 9 इजी रिया तँईं एबे सुण, इस्राएलिया रा चींगणा माखे सुणी रा ओर मिस्रिया रा तिना पाँदे अन्देर करना बी माखे दिशी रा। 10 इजी री खातर आओ, आऊँ ताखे फिरौनो गे पेजुँआ, ताकि तूँ मेरे इस्राएली लोका खे मिस्रो ते निकयाल़ी की ल्याओ।"*

11 तेबे मूसे परमेशरो खे बोलेया, "आऊँ कुण ए जो फिरौनो गे जाऊँ ओर इस्राएलिया खे मिस्र देशो ते निकयाल़ी की ल्याऊँ?" 12 तेबे परमेशरे बोलेया, "पक्का मां तां साथे रणा ओर इजी गल्ला रा कि ताखे पेजणे वाल़ा आऊँ ए, एक चिह्न ऊणा, जेबे तूँ तिना लोका खे मिस्रो ते निकयाल़ी चुकोगा तेबे तुसा एस ई पाह्ड़ो पाँदे परमेशरो री पूजा करनी।"* 13 मूसे परमेशरो खे बोलेया, "जेबे आऊँ इस्राएलिया गे जाई की तिना खे ये बोलूँ कि तुसा रे पितरा रे परमेशरे आऊँ तुसा गे पेजी राखेया, तेबे जे सेयो मांते पूछो कि तेसरा नाओं क्या ए, तेबे आऊँ तिना खे क्या बताऊँगा?" 14 परमेशरे मूसे खे बोलेया, "आऊँ जो अए से अए।" दुबारा ते परमेशरे तेसखे बोलेया, तैं इस्राएलिया खे ये बोलणा कि जेसरा नाओं आऊँ ए तिने ई आऊँ तुसा गे पेजी राखेया।* 15 परमेशरे मूसे खे ये बी बोलेया, "तैं इस्राएलिया खे ये बोलणा कि तुसा रे पितरा रा परमेशर मतलब अब्राहम, इसहाक ओर याकूबो रा परमेशर यहोवा ए, तिने ई आऊँ तुसा गे पेजी राखेया। देख, सदा तक मेरा नाओं येई रणा ओर पीढ़िया ते पीढ़िया तक मेरी याद इजी नाओं तेई ऊणी।* 16 इजी री खातर एबे जाई की इस्राएलिया रे स्याणेया खे कट्ठा कर ओर तिना खे बोल कि तुसा रे बुजुर्ग अब्राहम, इसहाक, ओर याकूबो रे परमेशर यहोवा माखे दर्शण देई की ये बोली राखेया कि मैं तुसा पाँदे ओर तुसा साथे जो बर्ताव मिस्रो रे कित्तेया जाओआ तेते पाँदे बी त्यान लगाई राखेया 17 ओर मैं ठाणी ला रा कि मां तुसे मिस्रो रे दु:खो ते निकयाल़ी की कनानी, हित्ती, एमोरी, परिज्जी, हिब्बी ओर यबूसी देशो रे लोका बीचे लई चलणे, जो एड़ा देश ए जो सच्चो खेई बऊत ई पजणे वाल़ा ए। 18 तेबे तिना तेरी ई गल्ल सुणनी ओर तैं इस्राएलिया रे स्याणेया खे साथे लई की मिस्रो रे राजे गे जाई की तेसखे एड़ा बोलणा कि इब्रिया रे परमेशर यहोवे साथे म्हारी मुलाकात ऊई री, इजी री खातर आसा खे एबे तिंऊँ दिना रिया बाटा दे सुनसाण जगा दे जाणे दे, ताकि आसे आपणे परमेशर यहोवे खे बलिदान चढ़ाऊँ। 19 आऊँ जाणूंआ कि मिस्रो रे राजे तुसे नि पेजणे बल्कि बड़े जोरो साथे दबाव पाई की पनि जाणे देणे।* 20 इजी री खातर मां आपणा आथ बढ़ाई की मिस्र देशो रे सारे अचम्बे रे काम करने ओर तिना खे सजा देणी तेबे तिजी ते बाद तेस तुसे जाणे देणे। 21 तेबे मां मिस्रिया ते आपणी एसा प्रजा पाँदे दया करवाणी ओर जेबे तुसे निकल़ने तेबे खाली आथ नि निकल़ने। 22 बल्कि तुसा रिया सबी जवाणसा आपणियां-आपणियां मिस्री पड़ोसणी ते सूईने चाँदिए रे गईणे ओर टाल्ले मांगी लणे ओर तुसे सेयो आपणे माठे-बेटिया खे पन्याणे ओर ईंयाँ तुसा मिस्री लुटणे।"