1 एकी दिने जेबे अब्राहम मम्रे रे बड़े डाल़ा बीचे दिनो री कड़ाके रिया तूपा रे बखते तम्बूए रे द्धारो पाँदे बैठी रा था, तेबे यहोवा तेसखे दिशेया। 2 अब्राहमे आखी चकी की देखेया कि तीन मर्द तेस सामणे खड़ी रे। जेबे तिने सेयो देखे, तेबे से तिना खे मिलणे रिया तँईं तम्बूए रे द्धारो पाँदा ते दौड़ेया ओर जमीना पाँदे थाले चूकी की माथा तेकेया। 3 ओर बोलणे लगेया, "ओ यहोवा, जे मां पाँदे तेरी दया री नजर ए, तो आऊँ बिनती करूँआ कि आपणे दासो गे ते चली नि जाएयो। 4 आँऊ थोड़ा जा पाणी ल्याऊँआ ताकि तुसे आपणे पैर तोई की एस डाल़ो निठे राम करो। 5 फेर आऊँ तुसा खे थोड़ी जी रोटी ली आऊँआ ओर तुसे तिजी खे खाई लओ ताकि तुसा रे शरीरो रे जान आई जाओ, तिजी ते बाद फेर आगे चली जाएओ, पर तुसे जो आपणे दासो गे आई रे।" "बऊत अच्छा," तिने बोलेया, "जिंयाँ तूँ बोलेया तिंयाँ ई कर।"

6 तेबे अब्राहमे फटाफट तम्बूए रे जाई की सारा खे बोलेया, "बीई किलो मैदा फटाफट गूँद ओर फुलके बणा।" 7 तेबे अब्राहम एक अच्छे जानवरा रे चूण्डो गे दौड़ी की गया ओर एक मुलायम ओर अच्छा तगड़ा बाच्छू लई की आपणे नौकरो गे दित्तेया ओर तिने फटाफट से पकाया। 8 तेबे तिने दईं ओर दूद ओर से पकवाया रा बाच्छूए रा मास तिना रे आगे परोसी ता ओर आपू डाल़ो निठे तिना गे खड़ेया रा रया ओर सेयो खाणे लगे।*18:8 इब्रानी 13:2

9 तिने तेसखे पूछेया, "तेरी लाड़ी सारा केयी ए?"

अब्राहमे बोलेया, "से तो तम्बूए रे ए।"

10 तिने बोलेया, "मां आगले साल एसी बसन्त ऋतुआ रे तांगे फेर जरूर आऊणा ओर तेबे तेरी लाड़ी सारा गे जम्मेया रा एक पाऊ ऊणा।" सारा तम्बूए रे द्धारो पाँदे, जो अब्राहमो पीछे था, सुणने लगी री थी।*18:10 रोमी 9:9 11 अब्राहम ओर सारा दोनो बऊत स्याणे ऊईगे थे ओर सारा रा बच्चे पैदा करने रा बखत पार ऊईगा था।*18:11 रोमी 4:9

12 तेबे सारा एसा गल्ला खे आपणे मनो रे सोचदे ऊए आसणे लगी री थी, माखे स्याणदे बखते ओर मेरे मालको खे जेबे एसरी जवानी बी खत्म ऊई चूकी री, तेबे ये सुख ऊणा क्या?

13 तेबे यहोवे अब्राहमो ते पूछेया, "सारा ये बोली की कऊँ आस्सी कि क्या मेरे, आँऊ जो इतणी स्याणी ऊईगी री, सच्ची एक पाऊ जमणा? 14 क्या यहोवे खे कोई काम कठण ए? ठराए रे बखतो पाँदे आगले साल एसी बसन्त ऋतुआ रे मां तांगे फेर आऊणा ओर सारा रे पाऊ ऊणा।" 15 तेबे सारा डरो रे मारे ये बोली की मुकरी गी, "आँऊ नि आस्सी।"

यहोवे बोलेया, ना, "तूँ आस्सी तो थी।"*18:15 1 पत 3:6

16 जेबे सेयो तीनो मर्द तेथा ते चली की, सदोमो रिया तरफा खे देखणे लगे तेबे अब्राहम तिना खे बिदा करने खे तिना साथे-साथे चलीगा।

17 तेबे यहोवे बोलेया, ये जो आऊँ करूँआ, तिजी खे क्या अब्राहमो ते लकोई की राखूँ? 18 अब्राहमो ते तो पक्का एक महान् ओर सामर्थी जाति पैदा ऊणी ओर तरतिया रिया सारिया जातिया तेसरे जरीये आशीष पाणी।*18:18 प्रेरित 3:25, रोमी 4:13, गलाति 3:8 19 परमेशरे बोलेया, मैं अब्राहम इजी खे चूणी राखेया कऊँकि आऊँ जाणूंआ कि तेस आपणे पाऊआ ओर परिवारो खे बी जो तेसते बाद रई जाणे, आज्ञा देणी कि सेयो यहोवे रिया बाटा रे चली की न्याय रे काम करदे ऊए ओर तर्मी जीवन बितांदे ऊए तिदे अटल बणे रे रओ ताकि जो कुछ यहोवे अब्राहमो ते वादा कित्तेया से तिजी खे पूरा करी सको। 20 तेबे यहोवे बोलेया, "सदोम ओर गमोरा शईरो रा चींगणा बढ़ी गा रा ओर तिना रा पाप बऊत पारी ऊईगा रा, 21 इजी री खातर मां थाले उतरी की देखणा कि तिना रा जो चींगणा मेरे कानो तक पऊँची रा, तिने ठीक तेड़ा ई काम करी राखेया कि नई ओर जे नई करी राखेया ऊगा, तो मां से जाणी लणा।"*18:21 प्रकाशित 18:5

22 तेबे सेयो मर्द तेथा ते मुड़ी की सदोम शईरो रिया तरफा खे जाणे लगे, पर अब्राहम यहोवे रे आगे खड़ेया रा रया। 23 तेबे अब्राहम यहोवे रे नेड़े जाई की बोलणे लगेया, क्या तुसा सच्ची दुष्टा साथे तर्मी बी नाश करी देणे? 24 जे तेस शईरो रे पंजा तर्मी ओ, तो क्या तुसा सच्ची से जगा नाश करी देणी ओर तिना पंजा तर्मिया रिया बजअ ते, जो तिदे ओ तिना खे माफ नि करोगे? 25 एड़ा काम करना तुसा ते दूर रओ कि दुष्टा साथे तर्मिया खे बी काई देओ ओर तर्मी ओर दुष्ट दुँईं री एक जेड़ी दशा ओ। ये तुसा ते दूर रओ। क्या सारी तरतिया रा न्यायी न्याय नि करोगा?

26 यहोवे बोलेया, "जे माखे सदोम शईरो रे पंजा तर्मी लोक बी मिले, तो तिना रिया बजअ ते से सारी जगा मां तिना खे छाडी देणी।"

27 फेर अब्राहमे बोलेया, "ओ यहोवा, आँऊ तो माट्टी ओर स्वा ए, ओर आँऊ कुछ बी नि ऊँदे ऊए इतणी ईम्मत करूँआ कि तुसा साथे गल्ला करुँ। 28 जे तिना तर्मिया बीचे पंजा ते पाँज कम ऊई जाओ, तो क्या तुसा पाँज कम ऊणे रिया बजअ ते से सारा शईर नाश करी देणा?"

तिने बोलेया, "जे माखे तिदे पैंताल़ी बी मिले, तेबे बी मां से नाश नि करना।"

29 फेर अब्राहमे यहोवे खे ये बी बोलेया, "जे तेती चाल़ी मिले।"

तिने बोलेया, "मां चाल़िया रिया बजअ ते बी एड़ा नि करना।"

30 फेर अब्राहमे बोलेया, "गुस्सा नि करो तो आऊँ तुसा खे कुछ ओर बोलूँ, जे तेती तीई मिलो।"

तेबे परमेशरे बोलेया, "जे माखे तेती तीई बी मिले, तेबे बी मां एड़ा नि करना।"

31 फेर अब्राहमे बोलेया, "ओ यहोवा, सुणो! तुसा साथे गल्ला करने खे मैं इतणी ईम्मत तो कित्ती कि तुसा ते पूछी सकूँ, जे तेती केथी बीई मिले।"

तेबे परमेशरे बोलेया, "मां बीई रिया बजअ ते बी तिजी रा नाश नि करना।"

32 फेर तिने बोलेया, "ओ यहोवा, गुस्सा नि करो, मां एक ई बार ओर बोलणा, जे तिदे केथी दस मिलो तो।"

परमेशरे उतर दित्तेया, "मां दसा रिया बजअ ते बी तिजी रा नाश नि करना।"

33 जेबे यहोवे अब्राहमो साथे गल्ला करी चुकेया, तेबे चलीगा ओर अब्राहम आपणे कअरो खे वापस ऊईगा।