1 इना गल्ला ते बाद परमेशरे अब्राहमो री परीक्षा कित्ती। परमेशरे अब्राहमो खे बोलेया, "ओ अब्राहम!" तेबे तिने बोलेया, "हां, आँऊ एती ए।"*

2 फेर परमेशरे बोलेया, "आपणे पाऊए खे मतलब आपणे एकलौते पाऊ इसहाको खे, जेस साथे तूँ प्यार राखेया, तेसखे साथे लई की मोरिय्याह नाओं री जगा खे चली जा ओर तेती तेसखे एकी पाह्ड़ो पाँदे जो मां ताखे दखाणा तिजी पाँदे होमबलि करी की चढ़ा।"

3 दूजे दिने अब्राहमे प्यागा ई तड़के उठी की होमबलि चढ़ाणे खे लकड़ी चीरी ली ओर आपणे गह्दे पाँदे काठी बानी की, आपणे दो नौकर ओर आपणे पाऊ इसहाको खे साथे लई की तेसा जगा खे जेतेखे परमेशरे बोलेया था तेथो खे चली पड़ेया। 4 तीजे दिने अब्राहमे आखी चकी की तेसा जगा खे दूरो ते देखेया 5 तेबे अब्राहमे आपणे नौकरा खे बोलेया, "गह्दे गे एथी जेई ठईरो, जदुओ तक आँऊ ओर ये मेरा पाऊ तेथो तक जाई की आराधना करूँए, फेर तुसा गे वापस आऊँगे।" 6 फेर अब्राहमे होमबलिया रिया लकड़िया लई की आपणे पाऊ इसहाको पाँदे लादिया ओर आग ओर छुरी आपणे आथो रे लई ओर सेयो दोनो साथे-साथे चली पड़े।

7 इसहाके आपणे बाओ अब्राहमो ते पूछेया, "ओ मेरे पिता;" तिने बोलेया, "ओ मेरे पाऊ, क्या गल्ल ए?" इसहाके बोलेया, देख, "आग ओर लकड़ी तो अए, पर होमबलिया खे पेड केई ए?"

8 अब्राहमे उत्तर दित्तेया, "ओ मेरे पाऊ, परमेशरो होमबलिया री पेडा रा इन्तजाम आपू करना।" ओर सेयो दोनो साथे-साथे आगे चलदे गये। 9 जेबे सेयो तेते जगा रे जो परमेशरे अब्राहमो खे बताई थी, पऊँचे; तेबे अब्राहमे तेती बेदी बणाई की लकड़िया एक-एक करी की तिजी पाँदे राखिया ओर आपणा पाऊ इसहाक बानी की बेदी पाँदलिया लकड़िया पाँदे राखी ता।* 10 इजी ते बाद अब्राहमे आपणा आथ बढ़ाई की छुरी लई ली ओर आपणा आथ पाऊए री बलि करने खे चकेया।

11 तेबे यहोवे रे दूते स्वर्गो ते तेसखे आका पाई की बोलेया, "ओ अब्राहम, ओ अब्राहम!" तिने उतर दित्तेया, "आँऊ एती आ।"

12 तेबे दूते बोलेया, "एस पाऊए पाँदे आथ नि बढ़ा ओर ना ई एस साथे कुछ कर, तैं जो मेरिया तँईं आपणा पाऊ, बल्कि आपणा एकलौता पाऊ पनि छाडेया, इजी ते एबे माखे पता लगी गा कि तूँ परमेशरो रा डर मानेया।" 13 ओर अब्राहमे आखी चकिया तो तेसखे एक खाडू आपणे सींगा साथे जाड़ो दे फसेया रा दिशेया। तेबे अब्राहमे जाई की से खाडू लया ओर आपणे पाऊए रे बदले होमबलि करी की चढ़ाया। 14 इजी खे अब्राहमे तेसा जगा रा नाओं यहोवा यिरे राखेया, इजी रा मतलब ये ए कि परमेशरो आपू ई इन्तजाम करना; इजी रे मुताबिक आजो तक बी बोलेया जाओआ कि यहोवे रे पाह्ड़ो पाँदे इन्तजाम करेया जाणा।

15 तेबे फेर यहोवे रे स्वर्गदूते दूजी बार स्वर्गो ते आका पाई की अब्राहमो खे बोलेया, 16 "यहोवा ये बोलोआ कि आऊँ आपणे ई नाओं री कसम खाऊँआ कि तैं जो ये काम करी राखेया कि आपणा पाऊ, बल्कि आपणा एकलौता पाऊ पनि छाडेया,* 17 इजी बजअ ते पक्का मां ताखे आशीष देणी ओर मां पक्का तेरा वंश सर्गो रे तारेया ओर समुद्रो कनारले बालूए री कणियां जेड़िया अणगिणत करना ओर तेरा वंश आपणे दुश्मणा रे शईरो रा अक्कदार ऊणा।* 18 ओर तैं मेरी आज्ञा मानी राखी इजी खे तेरे वंशो रे जरीये तरतिया रे सारे प्रदेशा आशीष पाणी।"

19 फेर अब्राहम आपणे नौकरा गे वापस आया ओर सेयो सब मिली की बेर्शेबा खे गये। ओर अब्राहम बेर्शेबा रेई रणे लगेया।

20 कुछ बखतो ते बाद अब्राहमो खे ये संदेशा मिलेया कि तेरे पाई नाहोरो ते तेसरी लाड़ी मिल्का रे पाऊ जम्मी रा। 21 मिल्का रे यो पाऊ ऊए, जेठा पाऊ ऊस, तेसरा पाई बूज ओर कमूएल जो अरामो रा बाओ ऊआ। 22 फेर केसेद, हज़ो, पिल्दाश, यिद्लाप, ओर बतूएल। 23 इना आठा खे मिल्के अब्राहमो रे पाई नाहोरो रे जरीये जन्म दित्तेया। बतूएलो ते रिबका पैदा ऊई। 24 फेर नाहोरो रे रूमा नाओं री एक रखैल बी थी, जेसा ते तेबह, गहम, तहश, ओर माका पैदा ऊए।