उत्पत्ति 29

याकूबो रा राहेला ते मिलणा

1 फेर तिजी ते बाद याकूब बेतेलो ते आपणी बाटा रिये चलेया ओर पूर्विया रे प्रदेशो दे आया। 2 तिने आऊँदे ऊए दूरो ते खुले मैदाना रे एक कुआँ देखेया। जेतेरे नेड़े पेडा-बाकरिया रे तीन चूण्ड बैठी रे थे कऊँकि तेते कुएँ बीचा ते पेडा-बाकरिया खे पाणी पल़्याया जाओ था ओर तेते कुएँ रे सिरे पाँदे एक पारी पात्थर राखी राखेया था। 3 जेबे सारे चूण्ड तेती कट्ठे ऊई जाओ थे, तेबे गवाल़े तेस पात्थरो खे कुएँ रे मुरे पाँदा ते खसकेई की पेडा-बाकरिया खे पाणी पल़्याओ थे ओर तेबे पात्थरो खे कुएँ रे मुरे पाँदे तिंयाँ ई राखी देओ थे।

4 तेबे याकूबे ग्वाल़ेया ते पूछेया, "ओ मेरे पाईयो, तुसे केथो रे ए?" तिने बोलेया, "आसे हारान प्रदेशो रे ए।"

5 तेबे तिने तिना ते पूछेया, "क्या तुसे नाहोरो रे पोते लाबानो खे जाणोए?" तिने बोलेया, "आ, आसे तेसखे जाणूंए।"

6 फेर तिने तिना ते पूछेया, "से ठीक-ठाक तो अए।" तिने बोलया, "आ, से ठीक ए ओर ये देख, तेसरी बेटी राहेल पेडा-बाकरिया खे लई की आऊणे लगी री।"

7 तिने बोलेया, "देखो, एबु तो दिन बऊत ए, डांगरा रे कट्ठे ऊणे रा बखत निए; इजी खे पेडा-बाकरिया खे पाणी पल़्याई की फेर चराणे खे जाओ।"

8 तिने बोलेया, "आसे एबु एड़ा नि करी सकदे, जेबे सारे चूण्ड कट्ठे ओए, तेबे पात्थर कुएँ रे मुरे ते खसकेया जाओआ ओर तेबे आसे पेडा-बाकरिया खे पाणी पल़्याऊँए।" 9 जेबे तिना रिया यो गल्ला ऊणे लगी री थिया तेबे राहेल आपणे बाओ रिया पेडा-बाकरिया लई की आईगी कऊँकि सेई डांगरा खे चराया करो थी। 10 एबे आपणे मामे लाबानो री बेटी राहेला खे ओर तेसरिया पेडा-बाकरिया खे बी देखी की याकूबे नेड़े जाई की कुएँ रे मुरे पाँदा ते पात्थर खसकेई की आपणे मामे लाबानो रिया पेडा-बाकरिया खे पाणी पल़्याया। 11 फेर याकूब राहेला रे गल़े लगेया ओर जोरे-जोरे की रोया। 12 ओर याकूबे राहेला खे बताईता कि आऊँ तेरी बुआ रिबका रा पाऊ ए। तेबे तेसे दौड़ी की आपणे बाओ गे बताईता। 13 आपणे पांणजे याकूबो रा समाचार मिलदे ई लाबान तेसखे मिलणे खे दौड़ेया ओर तेसरे गल़े लगेया, फेर तेसखे आपणे कअरे ली आया। तेबे याकूबे लाबानो गे आपणी सारी गल्ल सुणाई कि कऊँ से हारानो रे आई रा।

14 तेबे लाबाने याकूबो खे बोलेया, "तूँ तो सच्ची मेरा रिश्तेदार ए।" ओर याकूब एक मीन्ना परी तेस साथे रया। 15 तेबे लाबाने याकूबो खे बोलेया, "रिश्तेदार ऊणे रिया बजअ ते तांते मुफ्तो री सेवा कराणा माखे ठीक निए, इजी खे बोल आँऊ ताखे सेवा रे बदले क्या देऊँ?"

16 लाबानो रे दो बेटिया थिया, तिना बीचा ते बडिया रा नाओं लिआ ओर छोटिया रा नाओं राहेल था। 17 लिआ रे तो कचरिया आखी थिया, पर राहेल रूपवती ओर बांकी थी।

याकूबो री राहेला रिया तँईं सात साल सेवा

18 इजी खे याकूब जो राहेला साथे प्यार करो था, बोलेया, "मां तेरी छोटी बेटी राहेला रिया तँईं साता साला तक तेरी सेवा करनी।"

19 लाबाने बोलेया, "एसा खे पराए मर्दो खे देणे ते ताखे देणा अच्छा ऊणा; इजी खे मांगे रओ।" 20 तेबे याकूबे राहेला रिया तँईं साता साल तक सेवा कित्ती ओर तेसखे सेयो दिन राहेला रे प्यारो रिया बजअ ते थोड़े ई दिना रे बराबर लगे।

तोखे ते राहेला रे बदले लिया खे दित्तेया जाणा

21 एकी दिने याकूबे लाबानो खे बोलेया, "माखे दित्तेया रा बखत मैं पूरा कित्तेया एबे माखे आपणी बेटी मेरी लाड़ी ऊणे खे दे, ताकि आऊँ तेसा साथे आपणी जिन्दगी बिताई सकूँ।" 22 इजी खे लाबाने तेथो रे सारे लोक बुलाई की कट्ठे कित्ते ओर एक पाट्टी कित्ती। 23 तेस दिने साँजके बखते से आपणी बेटी लिआ खे याकूबो गे लईगा ओर तिने तेसा साथे रात कटी। 24 लाबाने आपणी बेटी लिआ खे तेसा री दासी ऊणे री खातर आपणी दासी जिल्पा दित्ती। 25 जेबे प्याग ऊई तो तिने तेती लिया देखी, तेबे याकूबे लाबानो खे बोलेया, "ये तैं मां साथे क्या कित्तेया? मैं तां साथे रई की जो तेरी सेवा कित्ती से क्या राहेला रिया तँईं नि कित्ती? फेर तैं मां साथे एड़ा तोखा कऊँ कित्तेया?"

26 लाबाने बोलेया, "म्हारे एती एड़ा रवाज निए कि बडिया बेटिया ते पईले छोटिया बेटिया रा ब्या करो।"

याकूबो रिया तँईं राहेला खे बी देणा

27 एसा रा अफ़्ता तो पूरा कर, फेर दूजी बी ताखे तेसा सेवा री तँईं मिली जाणी, जो तां मां साथे रई की ओर साता साला तक करनी। 28 याकूबे एड़ा ई कित्तेया, इजी खे लिआ रा ब्याओ रा अफ़्ता पूरा करने ते बाद लाबाने तेसखे आपणी बेटी राहेल बी देईती कि से तेसरी लाड़ी ऊई जाओ। 29 लाबाने आपणी बेटी राहेला खे तेसा री दासी ऊणे खे आपणी दासी बिल्हा दित्ती। 30 तेबे याकूब राहेला गे बी गया ओर तेसरा प्यार लिआ ते जादा तेसा साथे ई ऊआ ओर तिने लाबानो साथे रई की सात साल ओर तेसरी सेवा कित्ती।

याकूबो री ल्वाद

31 जेबे यहोवे देखेया कि याकूबो खे लिआ प्यारी निए, तेबे तिने तेसा री कोख खोली, पर राहेल बांझ रई। 32 ईंयाँ लिआ गर्भवती ऊई ओर तेसा रे एक पाऊ पैदा ऊआ ओर तेसे तेसरा नाओं ये बोली की रूबेन राखेया, "यहोवे मेरे दु:खो पाँदे नजर दित्ती। एबे तो जरूर मेरे लाड़े मां साथे प्यार राखणा।" 33 फेर से गर्भवती ऊई ओर तेसा रे एक पाऊ ओर पैदा ऊआ ओर तेबे तेसे ये बोलेया, "ये सुणी की कि आऊँ प्यारी निए, यहोवे माखे ये बी पाऊ दित्तेया।" इजी री खातर तेसे तेसरा नाओं शिमोन राखेया। 34 फेर से गर्भवती ऊई ओर तेसा रे एक ओर पाऊ पैदा ऊआ ओर तेसे बोलेया, "एते बारिए तो मेरे लाड़े मां साथे प्यार करना, कऊँकि तेसते मेरे तीन पाऊ पैदा ऊए।" इजी री खातर तेसरा नाओं लेवी. *29:34 लेवी. मतलब जुड़ेया रा राखेया। 35 तेसे फेर गर्भवती ऊई की एक ओर पाऊ पैदा कित्तेया ओर तेसे बोलेया, "एबकी बारी तो मां यहोवे रा तन्यवाद करना।" इजी री खातर तेसे तेसरा नाओं यहूदा राखेया; यहूदा रा मतलब स्तुति ए। तेबे तिजी ते बाद तेसा रे बच्चे जमणे बन्द ऊईगे।*29:35 मत्ती 1:2