1 एड़ा ऊआ कि याकूबो खे यो गल्ला सुणने रे आईया कि लाबानो रे पाऊ बोलणे लगी रे थे कि, "याकूबे म्हारे बाओ रा सारा तअन छीनी ला रा ओर म्हारे बाओ रे तअनो रिया बजअ तेई तेसखे इतणा मान-सम्मान मिली रा।" 2 ओर याकूबे लाबानो रे मुंए खे देखेया तो तिने समजी ला कि मेरिया तँईं तेसरे बर्ताव रे पईले जेड़ा प्यार निए।

3 तिजी ते बाद यहोवे याकूबो खे बोलेया, "आपणे बुजुर्गा रे देश ओर आपणी जन्मपूमिया खे वापस ऊई जा ओर मां तां साथे रणा।"

4 तेबे याकूबे राहेल ओर लिआ खे, मैदानो रे आपणी पेडा-बाकरिया गे बुलाई की बोलेया, 5 "तुसा रे बाओ रे मुंए खे देखी की माखे लगोआ कि तेसरा बर्ताव जेड़ा पईले मां साथे था, तेड़ा एबे निए; पर मेरे बाओ रा परमेशर मां साथे ए। 6 ओर तुसे बी जाणोईया कि मैं किंयाँ तुसा रे बाओ री सेवा पुरिया तागती साथे करी राखी। 7 फेर बी तुसा रे बाओए मां साथे तोखा करी की मेरी मजदूरी दस बार बदली ती; पर फेर बी परमेशरे तेसते मेरा कोई बी नुकशाण करने नि दित्तेया।" 8 जेबे तिने बोलेया, "चित्तीवाल़े बच्चे तेरी मजदूरी ठईरनी," तेबे सब पेडा-बाकरिया चित्तीवाल़े बच्चे ई जमाणे लगिया ओर जेबे तिने बोलेया, "तारीवाल़े बच्चे तेरी मजदूरी ठईरनी," तेबे सब पेडा-बाकरिया तारीवाल़े बच्चे जमाणे लगिया। 9 ईंयाँ परमेशरे तुसा रे बाओ रे डांगर लई की माखे देईते। 10 पेडा-बाकरिया रे गाबण ऊणे रे बखते मैं सुफने रे देखेया कि जो बाकरे बाकरिया पाँदे चढ़ने लगी रे, सेयो तारिया वाल़े, चित्तीवाल़े ओर चिटकाबरे ए।

11 तेबे परमेशरो रे दूते माखे सुफने रे बोलेया, "ओ याकूब," फेर मैं बोलेया, "आऊँ एती ए।" 12 तेबे तिने दूते बोलेया, "सिर ऊच्चा करी की तिना सबी बाकरेया रे चूण्डो खे जो बाकरिया पाँदे चढ़ने लगी रे, देख, कि सेयो तारीवाल़े, चित्तीवाल़े ओर तब्बेवाल़े ए; कऊँकि जो कुछ लाबान तां साथे करोआ, से मैं देखी राखेया। 13 आँऊ तेसी बेतेलो रा परमेशर ए, जेती तैं एकी खम्बे पाँदे तेल पाई की मां साथे एक कसम खाई थी। एबे उठ! एस प्रदेशो खे छाडी की आपणी बुजुर्गा री जन्मपूमिया खे वापस ऊई जा।"

14 एकी दिने राहेल ओर लिया आपू बीचे बोलणे लगी री थिया तेबे तिना बीचा ते एकी जणिए तेसखे बोलेया, "क्या म्हारे बाओ रे कअरे एबे बी म्हारा कुछ बरासती रा इस्सा बची रा? 15 क्या आसे तेसरी नजरा रे पराईया नि ठईरिया? तिने तो आसे बेची तिया ओर म्हारिया खातर दित्तेया रा चाँदी बी खाई बैठी रा। 16 सच्चो खेई परमेशरे म्हारे बाओ रा जितणा तअन ला रा, से म्हारा ओर म्हारे बाल-बच्चेया राए; इजी खे जो कुछ परमेशरे ताखे बोलेया, सेई कर।" 17 तेबे याकूबे उठी की आपणे बच्चे ओर लाड़िया ऊँटो पाँदे चढ़ाए 18 फेर से जितणे डांगर ओर जो कुछ समान पद्दनरामो रे कट्ठा करी की अमीर बणीगा था, तिना सबी खे कनानो रे रणे वाले़ आपणे बाओ इसहाको गे जाणे री इच्छा ते, साथे लईगा। 19 लाबान तो आपणी पेडा री ऊन कापणे खे चलीगा था ओर राहेल आपणे बाओ रे कअरो री मूर्तिया खे चोरी की लईगी। 20 याकूब चलाकिया साथे अरामी वंशो रे लाबानो खे बिना बताए नठी जाणा चाओ था। 21 से आपणा सब कुछ लई की फरात नदिया खे टपी की आपणा मूँ गिलादो रे पाह्ड़ो री तरफा खे करी की चलदा रया।

22 तीजे दिने लाबानो खे समाचार मिलेया कि याकूब नठी गा रा। 23 तेबे लाबाने आपणे रिश्तेदारा खे साथे लई की साता दिना तक तेसरा पीछा कित्तेया ओर गिलादो रे पाह्ड़ो रे जाई तिना गे पऊँची गा।

24 तेबे परमेशरे राती सुफने रे अरामी लाबानो गे आई की बोलेया, "चौकस रओ, तूँ याकूबो खे ना तो खरा बोलणा ओर ना ई बुरा।" 25 जेबे लाबान याकूबो गे पऊँची गा तेबे याकूबे आपणा तम्बू गिलाद नाओं रे पाह्ड़ी प्रदेशो रे खड़ा करी राखेया था; तो लाबाने बी आपणे पाईया साथे आपणा तम्बू तेस पाह्ड़ी प्रदेशो रे खड़ा कित्तेया।

26 तेबे लाबान याकूबो खे बोलणे लगेया, "तैं ये क्या कित्तेया कि मांगा गे ते चोरिए आईगा ओर मेरी बेटिया खे एड़ा ली आया, जेड़ा कोई तलवारी रे बलबूते पाँदे बंदी बणाई की ली आओआ। 27 तूँ चोरिए कऊँ नठीगा ओर माखे बिना कुछ बोले मांगा गे ते चोरिए आईगा, नई तो मां तूँ खुशिया साथे डफली ओर बीणा बजवांदे ऊए ओर खुशिया रे गाणे गांदे ऊए बिदा करना था। 28 तैं तो मांते मेरे दोईते-दोईतिया गल़े तक नि लगणे दित्ते, इदे तैं मूर्खता करी राखी। 29 मांदे तुसा लोका रा नुकशाण करने री तागत तो अयी; पर तुसा रे बाओ रे परमेशरे पिछली राती सुफने रे आई की माखे बोलेया कि चौकस रओ, याकूबो खे ना तो खरा बोलणा ओर ना ई बुरा। 30 पला, एबे तूँ आपणे बाओ रे कअरो खे जाणे री इच्छा ते आईगा तो आईगा, पर मेरे देवतेया रिया मूर्तिया खे तूँ कऊँ चोरी की ली आया?"

31 तेबे याकूबे लाबानो खे जबाब दित्तेया, "आँऊ ये सोची की डरीगा था कि एड़ा नि ओ कि तूँ केथी आपणी बेटिया खे मांते जबरदस्ती छुड़ाई लओ। 32 पर जेस केसी गे बी तेरे देवतेया रिया मूर्तिया मिलो गिया, से जिऊँदा नि बचणा। मांगे तेरा जो कुछ निकल़ोगा, तिजी खे पाई-बन्दुआ रे सामणे पछयाणी की लई लो।" याकूबे एड़ा बोली ता कऊँकि से नि जाणो था कि राहेल कअरो री मूर्तिया खे चोरी की ली आई री। 33 ये सुणी की लाबान, याकूब ओर लिआ ओर दुँईं दासिया रे तम्बूआ रे गया; पर तेसखे कुछ नि मिलेया। तेबे लिआ रे तम्बूए ते निकल़ी की राहेला रे तम्बूए रे गया। 34 राहेल तो कअरो री मूर्तिया खे ऊँटो री काठिया पाँदे राखी की तिना पाँदे बैठी री थी। लाबानो खे तेसा रे सारे तम्बूए रे टोल़ी की बी सेयो नि मिलिया।

35 राहेले आपणे बाओ खे बोलेया, "ओ मेरे यहोवा; इजी ते नराज नि ओ कि आऊँ तां सामणे नि उठी; कऊँकि आऊँ मासिक धर्मो ते ए।" तेबे तेसरे टोल़-टाल़ करने ते बी कअरो री मूर्तिया तेसखे नि मिलिया। 36 तेबे याकूब गुस्से रे ऊई की लाबानो साथे लड़ने लगेया ओर बोलेया, "मेरा क्या पाप ए? मेरा क्या पाप ए कि तैं इतणे गुस्से रे आई की मेरा पीछा कित्तेया? 37 तैं जो मेरिया सारिया चीजा टोल़ी की देखिया, तो ताखे आपणे कअरो री सारिया चीजा बीचा ते क्या मिलेया? जे कुछ मिली रा तो तिजी खे एती आपणे ओर मेरे पाईया सामणे राखी दे ओर तिना आसा दुँईं बीचे न्याय करना। 38 एबुए तक इना बीई साला बीचे आऊँ तांगे रया; इना साला बीचे ना तो तेरी पेडा-बाकरिया री टाल़ गई ओर ना ई तेरे खाडूआ रा मास मैं कदी खाया। 39 जो डांगर जंगल़ी जानवरे खाए, तिजी खे आऊँ तांगे नि ल्याऊँ था तिजी रा नुकशाण आऊँ ई परूँ था; चाए दिने चोरो चाए राती, तूँ मांते ई तिजी री रकम लओ था। 40 मेरी तो एड़ी दशा थी कि दिने तो गर्मी ओर राती पाल़ा माखे खाईगा ओर नींज मेरी आखी ते नठी जाओ थी। 41 बीई साल तक आऊँ तेरे कअरे नौकरो जेड़ा रया; चौदा साल तो मैं तेरी दुँईं बेटिया री खातर काम कित्तेया ओर छे साल तेरिया पेडा-बाकरिया री तँईं सेवा कित्ती ओर तैं मेरी मजदूरी दस बार बदली। 42 जे मेरे बाओ रा परमेशर मतलब अब्राहमो रा परमेशर, जेसरा डर इसहाक बी मानोआ, जे मेरी तरफा खे नि ऊँदा, तो पक्का तां आऊँ खाली आथे ई पेजणा था। पर मेरा दु:ख ओर मेरे आथो री मईणत देखी की परमेशरे पिछली राती तूँ डाँटेया।"

43 लाबाने याकूबो खे बोलेया, "ये बेटिया तो मेरिया ईए ओर यो पाऊ बी मेरे ईए ओर ये पेडा-बाकरिया बी मेरिया ईए ओर जो कुछ ताखे दिशोआ, ये सब कुछ मेरा ईए। फेर बी एबे आऊँ आपणी इना बेटिया ओर इना री ल्वादा साथे क्या करी सकूँआ? 44 एबे आओ, आँऊ ओर तूँ दोनो जणे आपू बीचे वाचा बानूँए ओर ये तां ओर मां बीचे गवाई ठईरो।" 45 तेबे याकूबे एक पात्थर लई की तिजी रा एक खम्बा खड़ा कित्तेया।

46 फेर याकूबे आपणे पाई-बन्दुआ खे बोलेया, "तुसे पात्थर कट्ठे करो," ये सुणी की तिने पात्थर कट्ठे करी की एक टेर लगाया ओर तेथी पात्थरो रे टेरो गे तिने रोटी खाई। 47 तेस पात्थरा रे टेरो रा नाओं लाबाने तो जैगर सहादुथा राखेया जेते रा मतलब अरामिक पाषा रे गवाईया रा टेर, पर तिजी खे याकूबे गिलियाद बोलेया कऊँकि इब्रानी पाषा रे गिलियादो रा मतलब ए गवाईया रा टेर।

48 लाबाने बोलेया, "ये टेर आजो ते मां ओर तां बीचे गवा रणा।" इजी खे तिजी रा नाओं गिलियाद* राखेया, 49 ओर तेस खम्बे रा नाओं मिस्पा* बी राखेया, कऊँकि तिने बोलेया, "जेबे आसे एकी दूजे ते दूर रणे, तेबे यहोवा मेरी ओर तेरी देखपाल़ करदा रओ। 50 जे तूँ मेरी बेटिया खे दु:ख दे या तिना ते अलावा ओरी जवाणसा साथे ब्या करे, तो आसा बीचे कोई माणूं तो नि रणा, पर देख, मां ओर तां बीचे परमेशर गवा रणा।"

51 फेर लाबाने याकूबो खे बोलेया, "एस टेरो खे देख ओर एस खम्बे खे बी देख, जो मैं आपणे ओर तां बीचे खड़ा करी राखेया। 52 ये टेर ओर ये खम्बा दोनो एते गल्ला रे गवा रओ कि नुकशाण करने री इच्छा ते ना तो मां ये टेर लंगी की तांगे आऊणा ओर ना ई तां ये टेर ओर ये खम्बा लंगी की मांगे आऊणा। 53 अब्राहम ओर नाहोर ओर तिना रे बाओ; तिंऊँ रा जो परमेशर ए, सेई आसा दुँईं बीचे न्याय करो।" तेबे याकूबे तेसरी कसम खाई जेसरा डर तेसरा बाओ इसहाक मानो था। 54 ओर याकूबे तेस पाह्ड़ो पाँदे बलि चढ़ाई ओर आपणे पाई-बंदुआ खे रोटी खाणे खे बुलाया, तेबे तिने रोटी खाई की रात पाह्ड़ो पाँदे ई कटी। 55 दूजे दिने प्यागा लाबान उठेया ओर आपणी बेटिया ओर दोईते-दोईतिया खे गल़े लगाई की ओर आशीर्वाद देई की चली पड़ेया। फेर से आपणे रिश्तेदारा खे साथे लई की आपणी जगा खे वापस ऊईगा।