Gênesis 39

पोतीपरो रे कअरे यूसुफ

1 जेबे यूसुफ मिस्र प्रदेशो रे पऊँचाया, तेबे पोतीपर नाओं रा एक मिस्री, जो फिरौनो रा हाकिम ओर सिपाईया रा परदान था, तेसखे इश्माएलिया रे आथो ते, जो तेसखे तेती ल्याये थे, तिना ते से खरीदी ला। 2 यूसुफ आपणे मिस्री स्वामिए रे कअरे रओ था ओर यहोवा तेस साथे था; तेबेई से भाग्यशाली मर्द ऊईगा।*39:2 प्रेरित 7:9 3 जेबे यूसुफो रे स्वमिए देखेया कि यहोवा तेस साथे रओआ ओर जो काम से करोआ तिजी खे यहोवा तेसरे आथो ते सफल करी देओआ।*39:3 प्रेरित 7:9 4 तेबे यूसुफे आपणे स्वामिए री नजरा रे अनुग्रह पाया ओर से तेसरी सेवा करने खे ठराईता; तेबे पोतीपरे से आपणे कअरो रा अधिकारी बणाई की आपणा सब कुछ तेसगे सम्बाल़ी ता। 5 जदुओ ते तिने मिस्रिए से आपणे कअरो रा ओर आपणी सारी सम्पत्तिया रा अधिकारी बणाया, तदुओ ते यहोवा यूसुफो रिया बजअ ते पोतीपरो रे कअरे आशीष देणे लगेया ओर क्या कअरे, क्या मैदानो रे, तेसरा जो कुछ था, तिजी सबी पाँदे यहोवे री आशीष ऊणे लगी। 6 तेबे पोतीपरे आपणा सब कुछ यूसुफो रे आथो रे एथो तक छाडीता कि आपणे खाणे री रोटिया खे छाडी की से आपणी सम्पत्तिया रे बारे दे कुछ नि जाणो था। यूसुफ बांका ओर रूपवान था।

7 इना गल्ला ते बाद एड़ा ऊआ कि तेसरे स्वामिए री लाड़िए यूसुफो रिया तरफा खे आख लगाई ओर बोलेया, "मां साथे सओ।"

8 पर तिने तेसा री ये गल्ल नि मानी ओर आपणे स्वामिए रिया लाड़िया खे बोलेया, "सुण, जो कुछ एते कअरो रे ए, से मेरे आथो रे ए; तिजी रे बारे दे मेरा स्वामी कुछ नि जाणदा ओर तिने सब कुछ मेरे आथो रे सम्बाल़ी ता रा। 9 एते कअरो रे मांते बड़ा कोई निए ओर तिने ताखे छाडी की, जो तेसरी लाड़ी ए; सब कुछ मांगे छाडी राखेया; तेबे पला, आऊँ इतणी बड़ी दुष्टता करी की परमेशरो रा पापी कऊँ बणूँ?" 10 ओर एड़ा ऊआ कि से हर रोज यूसुफो साथे गल्ला करदी रई, पर तिने तेसा री नि मानी कि तेसा गे लेटो या तेसा साथे रओ। 11 एकी दिन एड़ा ऊआ कि यूसुफ आपणा काम-काज करने खे कअरे गया ओर कअरो रे नौकरा बीचा ते कोई बी कअरो रे पीतरे नि था।

12 तेबे तेसे जवाणसे तेसरे टाल्ले पकड़ी की बोलेया, "मां साथे सओ," पर से आपणे टाल्ले तेसा रे आथो रे छाडी की नठीगा ओर बारे निकल़ी गा।

13 ये देखी की कि से आपणा टाल्ला मेरे आथो रे छाडी की बारे नठीगा, 14 तेसे जवाणसे आपणे कअरो रे नौकरा खे बुलाई की बोलेया, "देखो, ये एक इब्री माणूंए खे मेरी बेज्जती करने खे मांगे ली आई रा। से तो मां साथे सऊणे रे मतलबो ते मांगे पीतरे आया था ओर आऊँ जोरे की चींगणे लगी। 15 ओर मेरा जोरे की चींगणा सुणी की से आपणा टाल्ला मांगे छाडी की नठीगा ओर बारे निकल़ी गा।" 16 तेसे तेसरा टाल्ला तेसरे स्वामिए रे कअरे आऊणे तक आपू गे राखेया।

17 तेबे तेसे तेसगे ईंयाँ बोलया, "से इब्री दास, जेसखे तूँ एती मांगे ली आई रा, से मेरी बेज्जेती करने खे मांगे आया था; 18 ओर जेबे आऊँ जोरे की चींगणे लगी, तेबे से आपणा टाल्ला मांगे छाडी की बारे नठीगा।" 19 आपणी लाड़िया री इना गल्ला खे सुणी की कि तेरे दासे मां साथे एड़ा-एड़ा काम कित्तेया, यूसुफो रे स्वामिए रा गुस्सा पड़की गा।

यूसुफो खे जेला रे पाणा

20 ओर यूसुफो रे स्वामिए से पकड़ी की जेला रे, जेती राजे रे कैदी बंद थे, पाईता; तेबे से तेते जेला रे रणे लगेया। 21 पर यहोवा यूसुफो साथे-साथे रया ओर तेस पाँदे करूणा कित्ती ओर जेला रे परदानो री दया-दृष्टि तेस पाँदे ऊई। 22 इजी खे जेला रे परदाने सेयो सारे बंदी, जो जेला रे थे, यूसुफो रे आथो रे सम्बाल़ीते ओर जो-जो काम सेयो तेती करो थे, से तेसरी ई आज्ञा ते ओ था। 23 यूसुफो रे वशो रे जो कुछ था तिजी बीचा ते जेला रे परदानो खे कोई बी चीज नि देखणी पड़ो थी; कऊँकि यहोवा यूसुफो साथे था ओर जो कुछ से करो था, यहोवा तेसखे तिदे कामयाबी देओ था।