Gênesis 41

फिरौनो रा सुफना

1 पूरे दो साल बीतणे ते बाद फिरौने ये सुफना देखेया कि से नील नदिया रे कनारे खड़ी रा 2 ओर तेते नील नदिया बीचा ते सात बांकिया ओर मोटिया-मोटिया गायी निकल़ी की कछारो रा काआ चरने लगिया। 3 ओर तिने क्या देखेया कि तिना पीछे सात ओर गायी, जो कदर्सणिया ओर माड़िया ए, नील नदिया ते निकल़िया ओर दूजिया गायी रे नेड़े नदिया रे कनारे पाँदे खड़िया ऊईगिया। 4 यो कदर्सणिया ओर माड़िया गायी तिना सात बांकिया ओर मोटी-मोटी गायी खे खाई गिया। तेबे फिरौन जागी गा। 5 फेर से सईगा ओर दूजा सुफना देखेया कि एक डंठल़िया ते सात मोटे ओर अच्छे-अच्छे सिल्ले निकल़े 6 ओर देखेया कि तिना पीछे सात सिल्ले पतल़े ओर पूर्वी अवा ते मुरझाए रे निकल़े। 7 ओर तिने पतल़े सिल्लेया सेयो सात मोटे ओर दाणेया ते परे रे सिल्ले खाई ते। तेबे फिरौन जागेया ओर तेसखे पता लगेया कि ये तो सुफना ई था। 8 प्यागा खे फिरौनो रा मन बेचैन ऊईगा ओर तिने मिस्रो रे सारे ज्योतषी ओर पण्डत बुलाए ओर तिना गे आपणे सुफने बताए, तिना बीचा ते कोई बी तिना सुफनेया रा फल़ फिरौनो ते नि बोली सकेया।

यूसुफो रे जरीये फिरौनो रे सुफनेया रा मतलब

9 तेबे पल्याणे वाल़ेया रे परदाने फिरौनो खे बोलेया, "मेरे पाप माखे आज याद आए। 10 जेबे फिरौन आपणे दासा ते गुस्से ऊआ था ओर आऊँ ओर रसोईया कैद कराई की सिपाईया रे परदानो रे कअरो री जेला दे पाईते थे; 11 तेबे आसे दुँईं एकी ई राती आपणी-आपणी योग्यता रे मुताबिक सुफना देखेया; 12 तेती आसा साथे एक इब्री जवान था, जो सिपाईया रे परदानो रा दास था; तेबे आसे तेसगे बताया ओर तिने म्हारे सुफनेया रा फल़ आसा गे बताया। आसा बीचा ते एकी-एकी रे सुफने रा फल़ तिने बताईता। 13 ओर जेड़ा-जेड़ा फल़ तिने आसा गे बोलेया था, तेड़ा ई ऊआ बी, माखे तो मेरा पद दुबारा मिलीगा, पर से फाँसिया पाँदे लटकाई ता।"

14 तेबे फिरौने यूसुफ बुलाया ओर से फटाफट जेला ते बारे निकयाल़ेया ओर बाल़ बणवाई की ओर टाल्ले बदली की फिरौनो रे सामणे आया। 15 फिरौने यूसुफो खे बोलेया, "मैं एक सुफना देखी राखेया ओर तिजी रा फल़ बताणे वाल़ा कोई बी निए; ओर मैं तेरे बारे दे सुणी राखेया कि तूँ सुफना सुणदे ई तिजी रा फल़ बताई सकेया।"

16 यूसुफे फिरौनो खे बोलेया, "आँऊ तो कुछ नि जाणदा, परमेशरो ई फिरौनो खे शान्तिया रा वचन देणा।"

17 फेर फिरौन यूसुफो खे बोलणे लगेया, "देखो, मैं आपणे सुफने रे देखेया कि आऊँ नील नदिया रे कनारे खड़ी रा। 18 फेर मैं क्या देखेया कि नील नदिया बीचा ते सात मोटिया ओर बांकिया-बांकिया गायी निकल़ी की कनारिया रा काआ चरने लगिया। 19 फेर देखेया कि तिना पीछे सात ओर गायी निकल़िया, जो बऊत ई माड़िया, ओर बऊत कदर्सणिया ओर बऊत माड़िया ए, मैं तो सारे मिस्रो रे एड़िया बदसूरत गायी कदी नि देखिया। 20 इने माड़िए ओर बदसूरत गायी सेयो पईलिया सात मोटिया-मोटिया गायी खाई तिया। 21 ओर जेबे तिने सेयो खाई तिया, तेबे ये पता नि लगो था कि तिने सेयो खाईली रिया, कऊँकि सेयो जेड़िया पईले थिया तेड़िया ई माड़िया रईया। तेबे आऊँ जागी की उठेया। 22 फेर मैं एक ओर सुफना देखेया कि एक ई डंठल़ो रे सात अच्छे-अच्छे ओर दाणे ते परे रे सिल्ले निकल़े। 23 फेर क्या देखूँआ कि तिना पीछे सात सिल्ले ओर खाली-खाली ओर पतल़े ओर पूर्वी अवा साथे मुरझाए रे निकल़े। 24 ओर तिने पतल़े सिल्लेया सेयो सात अच्छे-अच्छे सिल्ले खाई ले। ये मैं ज्योतषिया गे बताया, पर इना खे समजयाणे वाल़ा कोई नि मिलेया।"

25 तेबे यूसुफे फिरौनो खे बोलेया, "फिरौनो रा सुफना एक ईए, परमेशर जो काम करना चाओआ, से तिने फिरौनो गे प्रकट करी राखेया। 26 सेयो सात अच्छी-अच्छी गायी सात साल ए ओर सेयो सात सिल्ले बी सात साल ए; सुफना एक ईए। 27 फेर तिना पीछे जो कमजोर ओर कुडौल गायी निकल़िया ओर जो खाली ओर पूर्वी अवा साथे मुरझाए रे सिल्ले निकयाल़े, सेयो अकाल़ो रे सात साल ऊणे। 28 ये सेई गल्ल ए जो आऊँ फरौनो खे बोली चुकेया रा कि परमेशर जो काम करना चाओआ, से तिने फिरौनो गे दखाई राखेया। 29 सुण, मिस्र प्रदेशो रे सात साल तो बऊत जादा फसला रे ऊणे। 30 तिना ते बाद सात साल अकाल़ो रे ऊणे ओर सारे मिस्र प्रदेशो रे लोका ये सारी फसल पुलाई देणी ओर अकाल़ो ते प्रदेशो रा नाश ऊई जाणा। 31 ओर बऊत जादा फसल प्रदेशो रे फेर याद नि रणी कऊँकि अकाल़ बऊत जादा खतरनाक ऊणा। 32 ओर फिरौने जो ये सुफना दो बार देखी राखेया इजी रा पेत येई ए कि ये गल्ल परमेशरो रिया तरफा ते ठराई री ए, ओर परमेशरो ये चट ई पूरी करनी। 33 इजी री खातर एबे फिरौन केसी समजदार ओर अक्लमंद मर्दो खे टोल़ी की तेसखे मिस्र प्रदेशो पाँदे अधिकारी ठराओ। 34 फिरौन एड़ा करो कि प्रदेशो दे अधिकारिया खे ठराओ ओर जदुओ तक अच्छे सात साल रओ, तदुओ तक से मिस्र प्रदेशो री फसला रा पाँजुआ इस्सा लया करो। 35 ओर से इना अच्छे साला रे खाणे रिया सबी किस्मा रिया चीजा कट्ठिया करो ओर शईरो-शईरो रे पण्डार कअर खाणे रिया चीजा खे फिरौनो रे वशो रे करी की तीना री रखवाल़ी करो। 36 ओर से खाणे रिया चीजा अकाल़ो रे तिना सात साला खे ए, जो मिस्र प्रदेशो दे आऊणे, प्रदेशो दे खाणे खे राखिया जाओ, जेते कि देश तेस अकाल़ो ते नाश नि ओ।"

यूसुफो खे मंत्री बनाणा

37 ये सलाई री गल्ल फिरौन ओर तेसरे सारे काम करने वाल़ेया खे अच्छी लगी। 38 तेबे फिरौने आपणे काम करने वाल़ेया खे बोलेया, "क्या आसा खे एड़ा मर्द, जेड़ा ये ए, जेसरे परमेशरो रा आत्मा रओआ, मिली सकोआ?" 39 फेर फिरौने यूसुफो खे बोलेया, "परमेशरे ताखे जो इतणा ज्ञान देई राखेया कि तां जेड़ा कोई समजदार ओर अक्लमंद निए; 40 इजी बजअ ते तूँ मेरे कअरो रा अधिकारी ऊणा ओर तेरी आज्ञा रे मुताबिक मेरी सारी प्रजा चलणी, सिर्फ राजगद्दिया रे बारे दे आऊँ तांते बड़ा ऊणा।"*41:40 प्रेरित 7:10 41 फिरौने यूसुफो खे बोलेया, "देखो, आँऊ ताखे सारे मिस्र प्रदेशो पाँदे अधिकारी ठराई देऊँआ।" 42 तेबे फिरौने आपणे आथो ते मुअरा वाल़ी छाप निकयाल़ी की यूसुफो रे आथो रे पन्याईती ओर तेसखे बढ़िया लीलणो रे टाल्ले पन्याईते, ओर तेसरे गल़े रे सूईने री माल़ा पाईती। 43 ओर तिने से आपणे दूजे रथो रे चढ़ाया ओर लोक तेसते आगे-आगे ये प्रचार करदे ऊए चले, "चूकी की माथा टेको।" ओर फिरौने यूसुफ सारे मिस्र प्रदेशो पाँदे अधिकारी ठराया। 44 फेर फिरौने यूसुफो खे बोलेया, "फिरौन तो आऊँ ए, पर सारे मिस्र प्रदेशो रे केसी बी तेरी आज्ञा ते बिना आथ-पैर नि ईलाणा।" 45 फिरौने यूसुफो रा नाओं सापनत-पानेह*41:45 सापनत-पानेह मतलब पेत प्रकट करने वाल़ा राखेया ओर ओन शईरो रे पुरोईत पोतीपेरा री बेटी आसनता साथे तेसरा ब्या करी ता। तेबे यूसुफ सारे मिस्र प्रदेशो रे दौरा करने लगेया। 46 जेबे यूसुफ मिस्रो रे राजा फिरौनो रे सामणे खड़ा ऊआ, तेबे से तीई साला रा था। से फिरौनो रे सामणे ते निकल़ी की सारे मिस्र प्रदेशो रे दौरा करने लगेया। 47 इना अच्छे सातो साला रे जमीन बऊत जादा नज्ज देंदी रई। 48 ओर यूसुफ तिना सातो साला रे सब प्रकारा रिया खाणे रिया चीजा, जो मिस्रो रे ओ थिया, जमा करी की शईरो रे राखदा गया ओर हर एक शईरो रे चऊँ कनारे रिया खाणे रिया चीजा से तेस ई शईरो रे कट्ठा करदा रया। 49 ईंयाँ यूसुफे नज्ज समुद्रो रे बालूए जेड़ा बऊत जादा राशि-राशि गिणी की राखेया, एथो तक की तिने तिना खे गिणना छाडीता; कऊँकि से अणगिणत ऊईगा। 50 अकाल़ो रा पईला साल आऊणे ते पईले यूसुफो रे दो पाऊ, ओनो रे पुरोईत पोतीपेरा री बेटी आसनता ते ऊए। 51 ओर यूसुफे आपणे जेठे पाऊए रा नाओं ये बोली की मनश्शे*41:51 मनश्शे मतलब पुलाणे वाल़ा राखेया, "परमेशरे मांते सारा क्ल़ेश ओर मेरे बाओ रा सारा कराना पुलाई ता रा।" 52 दूजे पाऊए रा नाओं तिने ये बोली की एप्रैम*41:52 एप्रैम मतलब फल़वंत करना राखेया कि परमेशरे आऊँ दु:ख पोगणे रिया जगा रे फल़वंत करी राखेया। 53 ओर मिस्र प्रदेशो रे अच्छे साला रे सेयो सात साल खत्म ऊईगे। 54 ओर यूसुफो रे बोले रे मुताबिक सात साला खे अकाल़ शुरू ऊईगा। सारे देशा रे अकाल़ पड़ने लगेया; पर सारे मिस्र प्रदेशो रे नज्ज था।*41:54 प्रेरित 7:11 55 जेबे मिस्रो रा सारा देश पूखा मरने लगेया; तेबे प्रजा फिरौनो ते चींगी-चींगी की रोटी मांगणे लगी ओर से सबी मिस्रिया खे बोलेया करो था, "यूसुफो गे जाओ ओर जो कुछ से तुसा खे बोलो सेई करो।"*41:55 प्रेरित 7:11, यूह. 2:5 56 इजी खे जेबे अकाल़ सारी तरतिया पाँदे फैली गा ओर मिस्र प्रदेशो रे अकाल़ो रा रूप खतरनाक ऊईगा, तेबे यूसुफ सारे पण्डारा खे खोली-खोली की मिस्रिया रे आथे नज्ज बेचणे लगेया। 57 तेबे सारी तरतिया रे लोक मिस्रो रे नज्ज मोले लणे खे यूसुफो गे आऊणे लगे, कऊँकि सारी तरतिया पाँदे अकाल़ बऊत खतरनाक था।