1 तेबे इस्राएल आपणा सब कुछ लई की तेथा ते बेर्शेबा खे आया ओर तेती आपणे बाओ इसहाको रे परमेशरो खे बलिदान चढ़ाया। 2 तेबे इस्राएले राथिए खे परमेशरो री आवाज सुणी, "ओ याकूब ओ याकूब।" तिने उत्तर दित्तेया "हाँजी! आँऊ एती ए।" 3 परमेशरे बोलेया, "आँऊ परमेशर तेरे बाओ रा परमेशर ए, तूँ मिस्रो रे जाणे ते नि डर; कऊँकि मां तांते तेती एक बड़ी जाति बनाणी। 4 मां तां साथे-साथे मिस्रो खे जाणा ओर मां तूँ तेथा ते फेर पक्का ली आऊणा ओर यूसुफो आपणे आथो साथे तेरिया आखी बन्द करनिया।" 5 तेबे याकूब बेर्शेबा ते चलेया ओर इस्राएलो रे पाऊ आपणे बाओ याकूब ओर आपणे बाल-बच्चे ओर लाड़िया खे तिना गडिया रे, जो फिरौने तिना खे ल्याऊणे खे पेजिया थिया, चढ़ाई की चली पड़े। 6 याकूब ओर तेसरे कअरो रे लोक आपणियां पेडा-बाकरिया, गाय-बल़द ओर कनान प्रदेशो रे आपणा कट्ठा कित्तेया रा सारा तअन आपू साथे लई की मिस्रो रे आईगे। 7 ओर याकूब आपणे माठे-बेटिया, पोते-पोतिया मतलब आपणे सारे वंशो खे आपू साथे मिस्रो खे ली आया।

8 याकूबो साथे जो इस्राएली, मतलब तेसरे पाऊ, पोते बगैरा मिस्रो खे आए, तिना रे नाओं ये ए: याकूबो रा जेठा पाऊ रूबेन था। 9 ओर रूबेनो रे पाऊ हनोक, पल्लू, हेस्रोन ओर कर्मी थे। 10 शिमोनो रे पाऊ, यमूएल, यामीन, ओहद, याकीन, सोहर, ओर एक कनानी जवाणसा ते जम्मेया रा शाऊल बी था। 11 लेविये रे पाऊ गेर्शोन, कहात, ओर मरारी थे। 12 यहूदा रे पाऊ एर, ओनान, शेला, पेरेस, ओर जेरह नाओं रे पाऊ ऊए तो थे, पर एर ओर ओनान कनान प्रदेशो रे मरीगे थे; ओर पेरेसो रे पाऊ, हेस्रोन ओर हामूल थे। 13 इस्साकारो रे पाऊ, तोला, पुव्वा, योब ओर शिम्रोन थे। 14 जबूलूनो रे पाऊ, सेरेद, एलोन, ओर यहलेल थे। 15 लिया रे पाऊ जो याकूबो ते पद्दनरामो रे पैदा ऊए थे, तिना रे माठे ओर पोते येई थे ओर इना ते अलावा तेसा रे एक बेटी दीना बी ऊई। एथो तक तो याकूबो रे सारे टब्बरो वाल़े गिणतिया रे तेती लोक थे। 16 गादो रे पाऊ, सपोन, हाग्गी, शूनी, एसबोन, एरी, अरोदी ओर अरेली थे। 17 आशेरो रे पाऊ, यिम्ना, यिश्वा, यिश्वी, ओर बरीआ थे ओर तिना री बईण सेरह थी ओर बरीआ रे पाऊ हेबेर ओर मल्कीएल थे। 18 जिल्पा, जो लाबाने आपणी बेटी लिआ खे दित्ती थी, तेसा रे पाऊ, पोते येई थे ओर तेसा रे जरीये याकूबो रे सोल़ा लोक ऊए। 19 फेर याकूबो री लाड़ी राहेला रे पाऊ यूसुफ ओर बिन्यामीन थे। 20 ओर मिस्र प्रदेशो रे ओनो रे पुरोईत पोतीपेरा री बेटी आसनता ते यूसुफो रे येई पाऊ पैदा ऊए मतलब मनश्शे ओर एप्रैम। 21 बिन्यामीनो रे पाऊ, बेला, बेकेर, अशबेल, गेरा, नामान, एही, रोश, मुप्पीम, हुप्पीम, ओर अर्द थे। 22 राहेला रे पाऊ जो याकूबो ते ऊए, तिना रे येई पाऊ थे; तेसा रे यो सब पाऊ ओर पोते चौदा लोक ऊए। 23 फेर दानो रा पाऊ हूशीम था। 24 नप्ताली रे पाऊ, येसेर, गूनी, यहसेल, ओर शिल्लेम थे। 25 बिल्हा, जो लाबाने आपणी बेटी राहेला खे दित्ती थी, तेसा रे पाऊ ओर पोते येई ए, तेसा रे जरीये याकूबो रे वंशो रे सात लोक ऊए। 26 याकूबो रे आपणे वंशो रे जो प्राणी मिस्र प्रदेशो रे आए, सेयो तेसरी बऊआ खे छाडी की छयाठ लोक थे। 27 ओर यूसुफो रे पाऊ, जो मिस्रो रे तेसते पैदा ऊए, सेयो दो लोक थे; ईंयाँ याकूबो रे कराने रे जो लोक मिस्र प्रदेशो रे आए सेयो सारे मिलाई की सत्तर ऊए।

28 फेर याकूबे यहूदा खे आपू ते आगे यूसुफो गे पेजेया, कि से तेसखे गोशेनो री बाट बताओ; ओर तेबे सेयो गोशेन प्रदेशो रे आए। 29 तेबे यूसुफ आपणा रथ जुड़वाई की आपणे बाओ इस्राएलो ते मिलणे खे गोशेन प्रदेशो रे गया ओर तेस साथे मिली की तेसरे गल़े रे लिपटेया ओर कुछ देरा तक तेसरे गल़े रे लिपटी की रोंदा रया।

30 तेबे इस्राएले यूसुफो खे बोलेया, "आँऊ एबे मरने ते बी खुश ए, कऊँकि तूँ माखे जिऊँदा मिलेया ओर मैं तेरा मूँ बी देखी ला।"

31 तेबे यूसुफे आपणे पाईया ते ओर आपणे बाओ रे कराने खे बोलेया, "मां जाई की फिरौनो खे ये समाचार देणा, ‘मेरे पाई ओर मेरे बाओ रे सारे कराने रे लोक, जो कनान प्रदेशो रे रओ थे, सेयो मांगे आईगे रे; 32 ओर सेयो लोक गवाल़े ए, कऊँकि सेयो डांगरा खे पाल़दे आई रे; इजी री खातर सेयो आपणी पेडा-बाकरिया, गाय-बल़द ओर जो कुछ तिना राए, सबी खे ली आई रे।’ "

33 जेबे फिरौन तुसा खे बुलाई की पूछो, "तुसा रा काम-काज क्या ए?" 34 तेबे एड़ा बोलणा, "आसे तेरे दास बचपनो ते लई की आजो तक डांगरा खे पाल़दे आई रे, बल्कि म्हारे बुजुर्ग बी एड़ा ई करो थे। इजी ते तुसे गोशेन प्रदेशो रे रई सकोए, कऊँकि सबी ग्वाल़ेया ते मिस्री लोक नफरत करोए।"