1 सुण, बुद्धि ताखे आका पाणे लगी री,

समज जोरे-जोरे की ताखे बुलाणे लगी री।

2 बुद्धि तो बाटा रे चबाटे बीचे ऊच्चिया जगा रे खड़ी ओई;

3 शईरो रे प्रवेश द्वारो रे नेड़े,

ओर दरवाजे पाँदे खड़े ऊई की से जोरे की बोलोई,

4 "ओ माणूंओ, आऊँ तुसा खे आका पाऊँई,

ओर मेरिया गल्ला सबी माणूंआ खेई आ।"

5 जे तुसे पोल़े ए तो उशयार ऊणा सीखो;

ओर जे तुसे नासमज ए, तो समजदार ऊणा सीखो,

6 मेरी गल्ल सुणो, कऊँकि मां तुसा ते खरिया गल्ला बोलणिया,

ओर मेरे मुंए ते सीदिया ई गल्ला निकल़निया;

7 कऊँकि आऊँ जो बोलूँई से सच्च ए;

चूठो रिया गल्ला ते आऊँ कृणा करूँई।

8 आऊँ जो कुछ बी बोलूँई से सच्च ए;

तिना बीचा ते कुछ बी गल़त या पटकाणे वाल़ी गल्ल नि ए।

9 समजदार माणूंए खे सेयो सब सान,

ओर ज्ञान पाणे वाल़ेया रिया तँईं बऊत सीदिया ए।

10 चाँदिए रे बदले मेरिया शिक्षा खेई ग्रईण करी लओ,

ओर खरे सूईने रे बदले मेरे ज्ञानो खे ग्रईण करो।

11 कऊँकि आऊँ बुद्धि, किमती रत्ना ते बी अच्छी ए;

ओर तुसा रे मनो खे अच्छी लगणे वाल़िया सारिया चीजा बीचा ते कोई बी मेरे जेड़ी नि ए।

12 आऊँ जो बुद्धि ए, मांदे बऊत जादा समज ए,

ओर मांगे ज्ञान ओर विवेक बी ए।

13 बुराईया ते कृणा करनी ई यहोवे री पग्ति करने रे बराबर ए;

कमण्ड, गर्व ओर बुरी चाला ते ओर उल्ट फेरो रिया गल्ला ते बी आऊँ बैर राखूँई।

14 आऊँ ई सलाह ओर आऊँ ई खरी बुद्धि ए,

आऊँ तो समज ए ओर तागत बी मेरी ईए।

15 मां बुद्धिया रे जरिए ई राजे लोक राज करोए,

ओर मेरिया मतादा तेई अधिकारी न्याय साथे फैंसला करोए;*

16 मेरे ई जरिए शासक, परदान,

ओर तरतिया रे सब न्यायी ईमानदारिया ते राज करोए।

17 जो मांते प्यार राखोए, आऊँ बी तिना साथे प्यार राखूँई,

ओर जो माखे मईणता साथे तड़के उठी की टोल़ोए, सेयो माखे पाओए।

18 मांगे देणे खे पैसा ओर मान-मर्यादा ए,

ओर सदा रणे वाल़ा पैसा ओर तार्मिकता बी ए।

19 जो तुसा खे मांते मिलणा से शुद्ध सूईने ते बी खरा ए,

ओर खरे चाँदिए ते बी अच्छा ए।

20 आऊँ तार्मिकता रिया बाटा दे,

ओर न्याय रिया बाटा दे चलूँई,

21 जेते कि आऊँ आपणे प्यार करने वाल़ेया खे तअन-दौलता रा इस्सेदार बणाऊँ,

ओर तिना रे पण्डारा खे परी देऊँ।

22 यहोवे आऊँ आपणे सारे सृष्टिया रे काम करने री शुरूआता देई,

बल्कि पुराणे बखतो रे कामा ते बी पईले ई पैदा कित्ती।

23 आऊँ सदा ते बल्कि शुरूए तेई तरतिया री रचना ते पईले ई ठराई राखी।

24 जेबे ना तो डूगा समुद्र बणी रा था,

ओर ना पाणिए रिया सूबल़ा निकल़ी रिया थिया, तदुए तेई आऊँ पैदा ऊई।

25 जेबे पाह्ड़ ओर पाह्ड़िया रा नाओं-नशाण नि था,

तदुए तेई आऊँ पैदा ऊई गी थी।*

26 जेबे यहोवे ना तो तरती

ओर ना मैदान, ना दुनिया री तूड़ा रे कण बणाई राखे थे,

इना ते पईले आऊँ पैदा ऊई गी थी।

27 जेबे परमेशरे सर्ग बणाया, तेबे आऊँ तेती थी,

जेबे तिने डूगे पाणिए पाँदे सर्ग बणाया, तेबे बी आऊँ तेती थी।

28 जेबे तिने सर्ग पाँदे ठराया,

ओर डूगे पाणिए रिया सूबल़ा निकल़ने लगिया,

29 जेबे तिने समुद्रो खे एक बन्ना ठराया,

ताकि पाणी तेसरिया आज्ञा रा उल्लंघन करी की तेस बन्ने खे पार नि करी सको,

ओर जेबे से तरतिया री निऊँआ रे डोरी लगाओ था,

30 तेबे आऊँ एक परदान कारीगरो जेड़ी तेसरे नेड़े ई थी;

ओर हर रोज आऊँ तेसखे खुश करेया करुँ थी,

ओर हर बखत तेस सामणे खुश रऊँ थी।

31 आऊँ तेसरे जरिए बणाई री तरतिया ते खुश थी

ओर मेरा सुख माणूंआ रिया संगतिया ते ओ था।

32 इजी री खातर एबे ओ मेरे पाऊए, मेरी सुणी लओ;

जिंयाँ आऊँ बोलूँई तिंयाँ ई करो, ओर तुसे खुश रणे।

33 शिक्षा रिया गल्ला सुणो ओर अक्लमंद ऊई जाओ,

तिजी खे अणसुणी नि करो।

34 मेरिया गल्ला खे सुणने वाल़ा माणूं बऊत ई भाग्यशाली ए,

बल्कि से मेरिया देऊल़ी पाँदे हर रोज आस लगाई की खड़ेया रा रओआ,

से मेरे इन्तजारो दे दरवाजे गे नजर लगाई की राखोआ।

35 कऊँकि जो माखे पाई लओआ, से जिन्दगिया खे पाओआ;

ओर यहोवे री दया तेस पाँदे सदा बणी री रओई।

36 पर जो माखे पाणे रे चूकी जाओआ, से आपू पाँदे आपू ई मुसीबत ल्याओआ;

जितणे मांते कृणा करोए, सेयो मौता साथे प्यार राखोए।