2 शमूएल 5

राज़ेरे रूपे मां दाऊदेरू अभिषेक

1 तैन दिहाड़न मां इस्राएलेरे सारे गोट्ल दाऊदे कां गेइतां हेब्रोन नगरे मां एइतां ज़ोने लगे, "शुन, तू ते अस लोक भियालम। 2 फिरी पेइलो ज़ैखन शाऊल इश्शो राज़ो थियो, तैखन भी इस्राएलेरो अगुवो तूए थियो; ते यहोवा तीं सेइं ज़ोवं, ‘मेरे इस्राएली लोकां केरो पुहाल, ते इस्राएलेरो प्रधान तूए भोल्हो।’"✝5:2 भज. 78:71. 3 सारे इस्राएली प्रधान हेब्रोन नगरे मां राज़े कां आए; ते दाऊद राज़े तैन सेइं हेब्रोन नगरे मां यहोवारे सामने करार कियो, ते तैनेईं इस्राएलेरो राज़ो बन्नेरे लेई तैसेरू अभिषेक कियूं।

4 दाऊद 30 सालां केरो भोइतां राज़ केरने लगो, ते 40 सालन तगर राज़ केरतो राव। 5 सड़े सत सालन तगर त तै हेब्रोन नगरे मां यहूदा प्रादेशे पुड़ राज़ केरतो राव, ते 33 सालन तगर यरूशलेम नगरे मां सारे इस्राएले ते यहूदा प्रदेशे पुड़ राज़ केरतो राव।

6 एक्सां राज़े अपने लोक साथी नेइतां यरूशलेम नगरे मां गेइतां यबूसी लोकन पुड़ चढ़ाई की, ज़ैना तैस मुल्खेरे रानेबाले थिये। तैनेईं इन सेमझ़तां, कि दाऊद इड़ी एज्जी न सकेलो, तैस सेइं ज़ोवं, "ज़ांतगर तू काने ते टोन्टे दूर न केरेलो, तांतगर तू इड़ी एज्जी न सकेलो।" 7 फिरी भी दाऊदे सिय्योन नंव्वेरे क़िले पुड़ कब्ज़ो कियो, तैस्से जो दाऊदपुर भी ज़ोतन। 8 तैस दिहाड़े दाऊदे अपने सिपेही सेइं ज़ोवं, "ज़ै कोई यबूसी लोकन मारने चाए, तैस नालेरे बत्तां जेवरू लोड़े, ते काने ते टोन्टे ज़ैन दाऊद दिले सेइं न सुखाए तैन मारे।" एस सेइं ई कहावत च़ली, "काने ते टोन्टे परमेशरेरी आराधना केरनेरी ठारी*5:8 आराधना केरनेरी ठारी इसेरो मतलब मेहल भी भोइ सकते। मां एज्जी न बटन।" 9 ते दाऊद तैस क़िले मां राने लगो, ते तैस क़िलेरू नवं दाऊदपुर रख्खू। ते दाऊदे अपने मेहलेरे च़ेवरे पासन मिल्‍लो करां अन्तर तगर अक दिवार बनाई ज़ैस जो शहरपनाह ज़ोते थिये। 10 ते दाऊद शक्तिशाली भोतो जेव, ते सेना केरो परमेशर यहोवा तैस सेइं साथी रहतो थियो।

11 एक्सां सोर नगरेरे राज़े हीरामे दाऊदे कां बिस्तार देनेबाले, ते गैइड़ेरी लकड़ी, ते ट्लखान, ते चनाई केरनेबाले मिस्त्री भेज़े, ते तैनेईं दाऊदेरे लेई अक मेहल बनाव। 12 ते दाऊदे पक्‍कू याकीन भोइ जेवं कि यहोवा अवं इस्राएलेरो राज़ो बनेवरोइं, ते अपने इस्राएली लोकां केरे लेई मेरू राज़ बधव।

13 ज़ैखन दाऊद हेब्रोन नगरे मरां यरूशलेम नगरे मां एवरो थियो तैखन तैनी यरूशलेमेरी रखैलां रेखोरी थी, ते कौन्शां बनेई; ते दाऊदेरां होरां भी मट्ठां-कुइयां भोआं। 14 तैसेरी ज़ै औलाद यरूशलेम नगरे मां भोइ, तैन केरां नंव्वां इना आन: शम्मू, शोबाब, नातान, सुलैमान,✝5:14 1 इति. 14:4. 15 यिभार, एलीशू, नेपेग, यापी, 16 एलीशामा, एल्यादा ते एलीपेलेत।✝5:16 1 इति. 11:1-9;14:1-7.

पलिश्ती लोकन पुड़ ज़ींत

17 ज़ैखन पलिश्ती सेना एन शुनू कि इस्राएलेरो राज़ो बन्नेरे लेई दाऊदेरू अभिषेक कियोरूए, तैखन सारे पलिश्ती सेना दाऊदे तोपनेरे लेई निस्सी। एन शुन्तां दाऊद क़िले मां च़लो जेव। 18 तैखन पलिश्ती सेना एइतां रपाईम नव्वेंरी वैदी मां फैली जेई। 19 तैखन दाऊदे यहोवा पुछ़ू, "कुन अवं पलिश्तन पुड़ हमलो केरि? कुन तू तैन मेरे हथ्थे मां केरेलो?" यहोवा दाऊदे सेइं ज़ोवं, "हमलो केर; किजोकि अवं ज़रूर तैन तेरे हथ्थे मां केरेलो।" 20 तैखन दाऊद बालपरासीम नगरे जो जेव, ते दाऊदे तैना तैड़ी मारे। तैखन तैनी ज़ोवं, "यहोवा मेरे सामने भोइतां मेरे दुश्मन पुड़ पैनेरी गड्डां केरो ज़ेरो ट्लुटी जेव।" एस वजाई सेइं तैनी तैस ठारारू नवं बालपरासीम रख्खू। 21 तैड़ी पलिश्ती सिपैहेईं अपने देबतां केरि मूरती शैरी, ते दाऊद ते तैसेरे मैन्हु तैन छ़ुइतां घिन्नी*5:21 छ़ुइतां घिन्नी ई अक रुवाज़ थियो ज़ैना सिपाही ज़ींत्ते थिये तैना अपने दुश्मना केरि मूरती छ़ुइतां नेते थिये कि तैन केरो परमेशर तैन केरे देबतन करां महाने। (1 शमू. 5:1-2) जे।

22 फिरी दूइयोवं फेरे पलिश्ती सिपाही हमलो केरतां रपाईम नव्वेंरी वैदी मां फैली जे। 23 ज़ैखन दाऊदे फिरी दुबारां यहोवा पुछ़ू, तैखन तैनी ज़ोवं, "तैन पुड़ इट्ठां हमलो न केर; तैन केरे पुतोरां गेइतां तूतां केरे बुट्टां केरे सामनेरां तैन पुड़ हमलो केर। 24 ते ज़ैखन तूतां केरे बुट्टन पुड़मेइं सेनारी च़लनेरी छ़ेड़ तीं शुनोए, तैखन एन सेमझ़तां जल्दी केरां, कि यहोवा पलिश्ती केरि सेना मारनेरे लेई तीं अग्री-अग्री च़लोरोए।" 25 यहोवारे हुक्मेरे मुताबिक दाऊद गेबा नगरे करां लेइतां गेजेर नगरे तगर पलिश्तन मारतो जेव।