1 ज़ैना गल्‍लां मूसे यरदन दरियारे पूर्वेरे* पासे जंगले मां, मतलब सूफेरे सामने अराबा मां, ते पारान ते तोपेलेरे दरमियाने मां, ते लाबान हसेरोत ते दीजाहाब इन सब नगरन मां, सारे इस्राएली लोकन सेइं ज़ोइ तैना इना आन। 2 होरेबेरे पहाड़ी इलाके करां कादेशबर्ने तगर सेईर पहाड़ेरी बत पैदल* यारहे दिहाड़ां केरि आहे। 3 इस्राएली लोकां केरे मिस्र मुल्खे मरां निसनेरे च़ैलीयोवं सालेरे यारोवं महीनेरे पेइले दिहाड़े ज़ैन किछ यहोवा परमेशरे मूसे, इस्राएली लोकन सेइं ज़ोनेरो हुक्म दित्तोरो थियो, तैसेरे मुताबिक मूसो तैन सेइं इना गल्‍लां ज़ोने लगो। 4 मतलब ज़ैखन मूसे एमोरी लोकां केरो राज़ो हेशबोन नगरेरो रानेबाले सीहोन ते बाशानेरो राज़ो अश्तारोत नगरेरो रानेबालो ओग एद्रेई नगरे मां मारे, 5 तैसेरां बाद यरदनेरे पार मोआब मुल्खे मां मूसो कानूनेरे बारे मां एन्च़रे बियान केरने लगो,

6 मूसे ज़ोवं, "इस्राएली लोकव, इश्शे परमेशर यहोवाए होरेबेरे नेड़े असन सेइं ज़ोवरू थियूं, ‘तुसन लोकन इस पहाड़े पुड़ रहते काई च़िर भोवरूए; 7 एल्हेरेलेइ हुनी इट्ठां च़ला, ते एमोरी लोकां केरे पहाड़ी मुल्खे जो, ते कुन अराबा मां, कुन पहाड़न मां, कुन बुनीयें मुल्खे मां, कुन दक्षिण मुल्खे मां, कुन समुन्दरेरे बन्ने, ज़ेत्रे लोक एमोरी लोकां केरे नेड़े रहतन तैन केरे मुल्खे, मतलब लबानोन पहाड़े तगर ते फरात नंव्वेरे समुन्दरे तगर रानेबाले कनानी लोकां केरे मुल्खे मांजो भी च़ले गाथ। 8 हेरा, अवं ई ज़मीन तुसन देताईं; ज़ैस मुल्खेरे बारे मां यहोवाए तुश्शे पूर्वज, अब्राहम, इसहाक, ते याकूबे सेइं कसम खेइतां ज़ोवरू थियूं कि अवं इस तुसन ते तुश्शे बाद तुश्शे खानदाने देइलो, तैस हुनी गेइतां अपने अधिकारे मां केरा।’"

9 "फिरी तैस्से वक्ते मीं तुसन सेइं ज़ोवं, ‘अवं तुश्शो अग्रोवं नेनेरो भार अकैल्‍लो न छ़ुई सेखी; 10 किजोकि तुश्शे परमेशर यहोवा तुसां बड़े जादे बधाए, एल्हेरेलेइ तुश्शी गिनती अज़ अम्बरेरे तारां केरे बराबर भोइ जेवरीए। 11 तुश्शे पूर्वजां केरो परमेशर तुसन अपने वचनेरे मुताबिक हज़ार गुणा होरो भी बधाए ते तुसन बरकत भी देतो रालो! 12 पन तुश्शी ज़िमेवारी, ते भार, ते लड़ैई अवं अकैल्‍लो कोड़ि तगर झ़ेल्‍ली सकताईं। 13 एल्हेरेलेइ तुस अपने-अपने गोट्लन मरां अक-अक अक्लमन्द ते समझ़दार ते इज़्ज़तदार मड़द च़ुना, ते अवं तैन्न तुसन पुड़ प्रधान ठहरेइलो।’ 14 इसेरे जुवाब मां तुसेईं मीं सेइं ज़ोवं, ‘ज़ैन किछ तू असन सेइं ज़ोतस एन केरनू ठीके।’ 15 एल्हेरेलेइ मीं तुश्शे गोट्लां केरे खास मड़द ज़ैना अक्लमन्द ते इज़्ज़तदार मड़द थिये च़ुनतां तुसन पुड़ प्रधान ठहराए, मतलब हज़ार-हज़ार, शौव-शौव, पज़ा-पज़ा, ते दश-दश लोकन पुड़ प्रधान ते तुश्शे गोट्लां केरे अधिकारी भी ठहराए। 16 ते तैस वक्ते मीं तुश्शे न्याय केरनेबालन हुक्म दित्तो, ‘तुस अपने ढ्लां केरे मुकदमे शुनथ, ते तैन केरे दरमियाने मां ते तैन केरे पड़ोसन ते परदेशी केरे दरमियाने मां भी धार्मिकता सेइं न्याय केरथ। 17 न्याय केरते बार कोन्चेरी तरफदारी न केरथ; ज़ेन्च़रे बड्डेरी तेन्च़रे निकड़े मैन्हेरी भी शुनथ; केन्चेरू तुत्तर हेरतां न डेरथ, किजोकि न्याय परमेशरेरू कम्मे; ते ज़ै मुकदमो तुश्शे लेई मुश्किल भोए, तैस मीं कां ऐनथ, ते अवं तैस शुनेलो।’ 18 ते ज़ैना कम्मां तुसेईं केरनां थियां मीं तैस्से वक्ते तुसन सेइं ज़ोइ छ़डां।"

19 "अस होरेब पहाड़े करां च़ेलतां अपने परमेशर यहोवारे हुक्मेरे मुताबिक तैस सारे बड्डे, ते डराने बाले सुनसान ठैरी मां भोइतां च़ले, ज़ैन तुसेईं एमोरी लोकां केरे पहाड़ी मुल्खेरी बत्ती मां लावं ते अस कादेशबर्ने तगर पुज़्ज़े। 20 तैड़ी मीं तुसन सेइं ज़ोवं, ‘तुस एमोरी लोकां केरे पहाड़ी मुल्खे तगर एवरेथ ज़ै इश्शो परमेशर यहोवा असन देने लगोरोए। 21 हेरा, तैस मुल्खे तुश्शो परमेशर यहोवा तुश्शे सामने केरते, एल्हेरेलेइ अपने सियानां केरे परमेशर यहोवारे वचनेरे मुताबिक तैस पुड़ च़ला, ते तैस अपने अधिकारे मां केरा; न त तुस डरा ते न तुस बेदिल भोथ।’ 22 पन तुस सब मीं कां एइतां ज़ोने लग्गे, ‘अस तैस मुल्खेरो पतो घिन्नेरे लेई एप्पु करां अग्री मड़दन भेज़मेले कि तैना असन ई बिस्तार देन, कि कौस बत्तां असेईं च़लनू भोल्हु ते कोस-कोस नगरे मां दाखल भोनू पेलू?’ 23 इस गल्‍ली सेइं खुश भोइतां मीं तुसन मरां बारहे मड़द, मतलब हर गोट्ल मरां अक मड़द च़ुनो; 24 ते तैना पहाड़ी प्रदेशे मां जे, ते एशकोल नंव्वेरे वैदी कां पुज़तां तैस मुल्खेरो भेद आनो। 25 ते तैस मुल्खेरे फलन मरां किछ हथ्थे मां नेइतां असन कां आए, ते असन ई बिस्तार दित्तो, ‘ज़ै मुल्ख इश्शो परमेशर यहोवा असन देइ राहोरोए तै रोड़ो आहे।’

26 "तांभी तुसेईं तैड़ी गाने करां इन्कार कियो, पन अपने परमेशर यहोवारे हुक्मेरे खलाफ भोइतां, 27 अपने-अपने डेरे मां इन ज़ोइतां शिकायत केरतां ज़ोने लग्गे, ‘यहोवा असन सेइं बैर रखते, एल्हेरेलेइ तैनी अस मिस्र मुल्खे मरां कढोरेम, कि असन एमोरी लोकां केरे कब्ज़े मां केरतां इश्शो सत्यानाश केरि छ़डे। 28 अस कोरहां गाम? इश्शे जासूस ढ्लाएईं इन ज़ोइतां अस डराए कि तैट्ठेरे लोक असन करां बड्डे ते लम्मे कदेरे आन; ते तैट्ठेरे नगर बड्डे-बड्डे आन, ते तैन केरि दिवारां अम्बरे तगर पुज़तिन; ते असेईं तैड़ी अनाक खानदानेरे लोक भी लाहोरेन।’ 29 मीं तुसन सेइं ज़ोवं, ‘तैन केरे वजाई सेइं न डरां ते न घबराथ। 30 तुश्शो परमेशर यहोवा ज़ै तुसन अग्री-अग्री च़लते तै एप्पु तुश्शे तरफां लड़ेलो, ज़ेन्च़रे तैनी मिस्रे मां तुश्शे हेरते तुश्शे लेई कियूं; 31 फिरी तुसेईं सुनसान ठैरी मां भी हेरू कि ज़ैस तरीके कोई मड़द अपने मट्ठे छ़ुइतां च़लते, तैस्से तरीके सेइं इश्शो परमेशर यहोवाए असां इस ठारी पुड़ पुज़ाने तगर छ़ूतो राव, तैस सारे बत्ती मां ज़ैस मरां अस आए।’ 32 पन इस गल्‍ली पुड़ भी तुसेईं अपने तैस परमेशर यहोवा पुड़ विश्वास न कियो, 33 ज़ै तुसन अग्री-अग्री एल्हेरेलेइ च़लतो राव कि डेरे बनानेरी ठार तुश्शे लेई तोप्पे, ते राती अग्गी मां ते दीसां बिदलारी मां बांदो भोइतां च़लतो राव, ताके तुसन तै बत हिराए ज़ैस मां तुस च़लतथ।

34 "पन तुश्शी तैना गल्‍लां शुन्तां यहोवारो कोप भड़को, ते तैनी ई कसम खई, 35 ‘ज़रूर इस बुरी पीढ़रे मैन्हन मरां अक भी तैस रोड़े मुल्खे हेरी न सकेलो, ज़ै मीं तैन केरे सियानन देनेरी कसम खेवरी थी। 36 सिर्फ यपुन्नेरू मट्ठू कालेब तैस हेरी सकेलो, ते ज़ैस ज़मीनी पुड़ तैसेरे पव पेवरेन तैस अवं तैस ते तैसेरे खानदाने भी देइलो; किजोकि तै मीं पत्ती पूरे तरीके सेइं च़लोरोए।’ 37 ते मीं पुड़ भी यहोवा तुश्शे वजाई सेइं सेरकोव, ते इन ज़ोवं, ‘तू भी तैड़ी न गेइ सकेलो; 38 नूनेरू मट्ठू यहोशू ज़ैन तेरे सामने खड़ू रहते, तैन त तैड़ी गेइ बटेलु; एल्हेरेलेइ तू तैस हिम्मत दे, किजोकि तैए तैस मुल्खे इस्राएली लोकां केरे अधिकारे मां केरेलो। 39 फिरी तुश्शां मट्ठां कुइयां ज़ैन केरे बारे मां तुस ज़ोतथ कि इना लूटी मां च़ेलि गालां, ते तुश्शे बच्‍चे ज़ैना हुन्ना खरे-बुरेरो भेद न ज़ानन, तैना तैड़ी दाखल भोल्हां, ते तैन्न अवं तैस मुल्खे देइलो, ते तैना तैसेरे अधिकारी भोल्हे। 40 पन तुस लोक घुमतां च़ला, ते लाल समुन्दरेरे बत्तां सुनसान ठैरारे पासे गाथ।’

41 "तैखन तुसेईं मीं सेइं ज़ोवं, ‘असेईं यहोवारे खलाफ पाप कियोरोए; हुन्ना अस अपने परमेशर यहोवारे हुक्मेरे मुताबिक चढ़ाई केरमेले ते लड़मेले।’ तैखन तुस अपने-अपने हथियार बेन्धतां पहाड़े पुड़ बगैर सोचे समझ़े च़ढ़नेरे लेई तियार भोइ जे। 42 तैखन यहोवा मीं सेइं ज़ोवं, ‘तैन सेइं ज़ो कि तुस न च़ढ़ा, ते न लड़ा; किजोकि अवं तुसन सेइं साथी नईं; कोन्च एरू न भोए कि तुस अपने दुश्मन्न करां हारथ।’ 43 ई गल मीं तुसन सेइं ज़ोवरीए, पन तुसेईं न मन्नी; पन ढीठ भोइतां यहोवारो हुक्म ट्लोड़ो ते पहाड़े पुड़ च़ढ़े। 44 तैखन तैस पहाड़ेरे रानेबाले एमोरी लोकेईं तुश्शो मुकाबलो केरनेरे लेई निस्तां गणेरो ज़ेरो तुश्शो पीछो कियो, ते सेईर मुल्खेरे होर्मा तगर तुसन मारते-मारते च़ले आए। 45 तैखन तुस वापस एइतां यहोवारे सामने लेरां देने लगे; पन यहोवा तुश्शी न शुनी, न तुश्शी गल्‍लन पुड़ ध्यान दित्तू। 46 ते तुस कादेशे मां बड़े च़िरे तगर राए, इड़ी तगर कि अक जुग भोइ जेव।"