1 "हे अम्बर ध्यान दे, कि अवं ज़ोईं;

ते हे धरती, मेरे ज़बानरी गल्‍लां शुन।

2 मेरो उपदेश झ़ेड़रो ज़ेरो बख्खेलो

ते मेरी गल्‍लां ओशरी ज़ेरि पेली,

ज़ेन्च़रे कि सब्ज़ घासे पुड़ झ़ड़ी, ते बुट्टन पुड़ झ़ैल्‍लां।

3 अवं त यहोवारे नंव्वेरो प्रचार केरेलो।

तुस अपने परमेशरेरी महिमा मन्ना!

4 तै चट्टाने, तैसेरू कम सही आहे;

ते तैसेरी सैरी बत्तां न्यायेरी आन।

तै सच़्च़ो परमेशरे, तैस मां बुराई नईं,

तै धर्मी ते सिद्धो आहे।

5 पन इस्राएली लोक वफादार नईं;

इना बिगड़ी जे, इना तैसेरां मट्ठां नईं;

ई तैन केरि बुराई आहे।

6 हे बेवकूफ ते बेअक्ल लोकव,

कुन तुस यहोवा ई बदलो देतथ?

कुन तै तेरो परमेशर बाजी नईं, ज़ैनी तुस घिनोरेथ?

तैनी तू बनेवरोस ते कायम भी कियोरोस।

7 पुराने ज़मानेरे दिहाड़न याद केरा,

पीढ़ी-पीढ़ी केरे सालां केरो खियाल केरा;

अपने बाजी पुछ़ा, ते तैनी तुस बनाए;

अपने बुज़ुर्ग लोकन सेइं सवाल पुछ़ा, ते तैना तुसन सेइं ज़ोले।

8 ज़ैखन परमप्रधान परमेशरे एक्‍की-एक्‍की कौमी अपनो-अपनो हिस्सो बेंटी दित्तो,

ते मैन्हु अलग-अलग बसाए,

तैखन तैनी मुल्ख-मुल्खेरे लोकां केरि हद्दां इस्राएली लोकां केरे गिनतरे मुताबिक ठहराई।

9 किजोकि यहोवारो अंश तैसेरे लोकन;

याकूब तैसेरो नापोरो अपनो हिस्सोए।

10 तैनी तै सुनसान ठैरी मां,

ते गैर आबाद ते गरज़ने बालन ते रेगिस्ताने मां मैल्हो;

तैनी तैसेरे च़ेवरे पासे रेइतां तैसेरी हिफाज़त की,

ते अपने अछ़रे पुतलरो ज़ेरो तै सम्भालोरोए।

11 ज़ेन्च़रे उकाब अपने आले हिलेइ-हिलेइ

अपने बच्‍चां केरे बांमेइं फिरते,

तेन्च़रे तैनी अपना फंघां खिलैरतां तै अपने फंघन पुड़ छ़ुओरोए।

12 यहोवा अकैल्‍लो तैसेरी अगवाई केरतो राव,

ते तैस साथी कोई बखलो देबतो न थियो।

13 तैनी तैस धेरतरी उच्‍ची-उच्‍ची ठारन पुड़ सुवारी कराई,

ते तैस ऊडारां केरि फसल खुवाई;

तैनी तैस चट्टानी मरां माछ़ी

ते चकमक चट्टानी मरां तेल दित्तो।

14 बेछ़ी केरू ज़म्मेरू दुद्ध, ते भैड्डां-छ़ेल्‍ली केरू दुद्ध, गबड़ां केरि चर्भी,

थाव्वे ते बाशानेरे कौमरे हुड़,

ते गेहुं केरू रोड़े करां रोड़ू अट्टू भी खुवाव;

ते तू दाछ़रे रस्सेरू माछ़ी पीतो थियो।

15 पन यशूरून* मोट्टो भोइतां लत मारने लग्गो;

तू मोट्टो ते निगर भोइ जेव, ते चेर्भी सेइं भेरोई जेव;

तैखन तैनी अपने बनानेबालो परमेशर शारो,

ते अपने मुक्तरी चट्टान घटिया समझ़ी।

16 तैनेईं बखले देबते मेनतां तैस मां जलन पैदा की;

ते भिट्टू कम केरतां तैस सरक दुवाई।

17 तैनेईं भूतां केरे लेई ज़ैना परमेशर न थिये बलि च़ाढ़ी,

ते तैन केरे लेई तैना अनज़ाने देबते थिये,

तैना त नंव्वें-नंव्वें देबते थिये ज़ैना थोड़े दिहाड़ना बाद बांदे भोवरे थिये,

ते ज़ैन करां तैन केरे सियाने कधी न डरे।

18 ज़ैस चट्टानी मरां तू पैदा भोव तै तीं बिसरी छ़डी,

ते परमेशर ज़ेसेरे ज़िरिये तू पैदा भोव तै भी तीं बिसरो।

19 इन गल्‍लां हेरतां यहोवाए तैना घटिया समझ़े,

किजोकि तैसेरे मट्ठेईं कुइयेईं तै सरकावरो थियो।

20 तैखन तैनी ज़ोवं, ‘अवं तैन करां अपनु तुत्तर छ़ुपालो,

ते हेरेलो कि तैन केरो अन्त केरहो भोल्हो,

किजोकि इस कौमरे लोक बड़े टारे आन ते धोखो देनेबालां मट्ठा आन।

21 तैनेईं एरी चीज़ मेनतां ज़ै परमेशर नईं,

मीं मां जलन पैदा की;

ते अपनि बेकार चीज़ां केरे ज़िरिये मीं सरक दुवाई।

एल्हेरेलेइ अवं भी तैन केरे ज़िरिये ज़ैना मेरे लोक नईं तैन केरे मने मां जलन पैदा केरेलो;

ते एक्‍की बेवकूफ कौमरे ज़िरिये तैन्न सरक दुवेइलो।

22 किजोकि मेरे सरकरी अग भेड़की जेई,

ज़ै पाताले तगर ज़लती गाली,

ते धरती अपनि फसली समेत भस्म भोइ गाली,

ते पहाड़ां केरि बुनीयादन मां भी अग लग्गेली।

23 अवं तैन पुड़ आफती पुड़ आफत भेज़ेलो;

ते तैन पुड़ अवं अपने सब तीर छ़डेलो।

24 तैना ढ्लुखी सेइं कमज़ोर भोइ गाले, ते भुखारे सेइं

ते मुश्किल बिमैरन मां फसोरे भोल्हे;

ते अवं तैन पुड़ जानबरां केरे दंत लुवेइलो,

ते धूड़ी पुड़ पेटेरे भारे च़लनेबाले सप्पां केरू बिष छ़ेडी देलो।

25 बेइर तैना तलवारी सेइं मरेले,

ते घरे मां अन्तर डरे सेइं;

कुन कुवारे ते कुवैरी, कुन दुद्ध पीते बच्‍चे

कुन छ़ित्ते बालन बाले, सब एन्च़रे सेइं बर्बाद भोल्हे।

26 मीं ज़ोवरू थियूं, कि अवं तैन्न दूर-दूर तगर तितर-बितर केरेलो,

ते मैन्हन मरां तैन केरि याद तगर मिटेइलो;

27 पन मीं दुशमनां केरे छ़ेड़-छ़ाड़ारो डर थियो,

एरू न भोए कि खलाफत केरनेबाले इस उलटू सेमझ़तां इन ज़ोने लग्गन,

अस अपने ज़ोरे सेइं कामयाब भोए,

ते इन सब यहोवा करां न भोवं।’

28 किजोकि इस्राएल कौम ज़ै अक्ली सेइं खालीए,

ते इन मां समझ़ अथ्थी नईं।

29 रोड़ू भोथू कि इना अक्लमन्द भोते, कि इन समझ़ेथे

ते अपने आखरी वक्ते पुड़ खियाल केरेथे!

30 अगर तैन केरि चट्टाने तैन्न न बेच़ेथी,

ते यहोवा तैन्न होरि केरि हथ्थे मां न केरेथो;

त इन केन्च़रे भोइ सकते कि तैन केरे अक मैन्हु हज़ार मैन्हु केरो पीछो केरतो थियो,

ते तैन केरे दश हज़ारन दूई मैन्हु नशानते थिये?

31 किजोकि ज़ेरि इश्शी चट्टाने तेरही तैन केरि चट्टान नईं,

चाहे इश्शे दुश्मन की न भोन।

32 किजोकि तैन केरि दाछ़री बाग सदोमेरे दाछ़ निस्सी,

ते गमोरारे दाछ़री बागी मरांए;

तैन केरि दाछ़ ज़ेहरे सेइं भेरतां ते तैन केरे घोन्छ़ ट्लिठेन;

33 तैन केरो दाछ़रो रस सप्पां केरू ज़ेरू बिष

ते काले नागां केरो ज़ेरो हलाहले।

34 कुन ई गल मेरे मने मां रख्खोरी,

ते मेरे गुदामन मां मोहर लेइतां बन्द नईं?

35 पलटो नेनो ते बदलो देनो मेरू कम्मे,

इन तैन केरे पव घिशकनेरे वक्ते बांदू भोल्हु;

किजोकि तैन केरि मुसीबतरो दिहाड़ो नेड़े एवरोए,

ते ज़ैना दुख, तैन पुड़ पेने बालेन तैना लूशी एज्जी राहोरेन।

36 किजोकि ज़ैखन यहोवा लाहेलो कि मेरे लोकां केरि शक्ति च़ली गातीए,

ते कुन गुलाम ते कुन आज़ाद, तैन मां कोई बच़ोरो राए,

तैखन यहोवा अपने लोकां केरो न्याय केरेलो,

ते अपने दासां केरे बारे मां तरस खाएलो।

37 तैखन तै ज़ोलो, तैन केरे देबते कोड़ि आन,

मतलब तै चट्टान कोड़िए ज़ैस पुड़ तैन केरो भरोसो थियो,

38 ज़ैना तैन केरे बलिदानां केरि चर्भी खातन,

ते तैन केरे पीनेरी च़ढ़तलां केरे दाछ़रो रस पीतन?

तैना उठतां तुश्शी मद्दत केरन,

तैए तुश्शी छ़पनेरी ठार भोए!

39 एल्हेरेलेइ हुनी तुस हेरा कि अवं तैए आईं,

ते मीं साथी कोई देबतो नईं;

अव्वें मारताईं, ते अव्वें ज़ींतो भी केरताईं;

अव्वें ज़खमी केरताईं, ते अव्वें ठीक केरताईं;

ते मेरे हथ्थेरां कोई न छुट्टी सके।

40 किजोकि अवं अपनो हथ सुर्गेरे पासे उबरो केरतां ज़ोताईं,

किजोकि अवं हमेशारे लेई ज़ींतोईं,

41 एल्हेरेलेइ अगर अवं बिजलरे तलवारी पलेइतां चमकेइं,

ते न्याय अपने हथ्थे मां नेही, त अपने बगावत केरनेबालन सेइं बदलो घिन्नेलो,

ते अपने दुश्मन्न बदलो देइलो।

42 अवं अपने तीरन खूने सेइं मसत केरेलो,

ते मेरी तलवार मास खाएली-तै खून,

मारोरे ते कैदी केरो,

ते तैन मास दुशमनां केरे प्रधानां केरे क्रोड़ी केरू भोल्हु।

43 हे गैर कौमां, तैसेरे लोकन सेइं साथी आनन्द मनाथ;

किजोकि तै अपने दासां केरे खूनेरो बदलो नेलो,

ते अपने बगावत केरनेबालन बदलो देलो,

ते अपने मुल्खेरे ते अपने लोकां केरे पापेरे लेई प्रायश्चित देलो।"

44 इस गीतेरे सब वचन मूसे एइतां नूनेरे मट्ठे यहोशू सने लोकन शुनाए।

45 ज़ैखन मूसे इना सब वचन सारे इस्राएली लोकन सेइं ज़ोए, 46 तैखन तैनी तैन सेइं ज़ोवं, "ज़ेत्री गल्‍लां अवं अज़ तीं सेइं समझ़ेइतां ज़ोताईं तैन सेब्भन पुड़ अपनो-अपनो मन लाथ, ते तैन केरो मतलब इस कानूनेरे सैरी गल्‍लां केरे मन्ने मां अमल केरनेरे हुक्म अपने बच्‍चन देइयथ। 47 किजोकि इन तुश्शे लेई बेकार कम नईं, पन तुश्शी ज़िन्दगीए, ते एरू केरने सेइं तैस मुल्खे मां तुश्शे उमरारे दिहाड़े बड़े भोल्हे, ज़ेसेरे अधिकारी भोनेरे लेई तुस यरदने पार गेई राहोरेथ।"

48 फिरी तैस्से दिहाड़े यहोवा मूसे सेइं ज़ोवं, 49 "तैस अबारीम पहाड़ेरे नबो नंव्वेरी च़ोटी पुड़, ज़ै मोआब मुल्खे मां यरीहोएरे सामने, च़ेढ़तां कनान मुल्ख हेरा, ज़ैस अवं इस्राएली लोकां केरि अपनि ज़मीन केरताईं। 50 तैखन ज़ेरो तेरो ढ्ला हारून होर पहाड़े पुड़ मेरतां अपने लोकन मां मिली जेव, तेरहो तू इस पहाड़े पुड़ च़ेढ़तां मेरि गालो, ते अपने लोकन मां मिली गालो। 51 इसेरी वजा ई आहे, कि सीन सुनसान ठैरी मां, कादेशेरे मरीबा नव्वेंरे नागे पुड़, तुसेईं दूइयेईं मेरो पाप कियो, किजोकि तुसेईं इस्राएली लोकां केरे दरमियाने मां पवित्र न ठहराव। 52 एल्हेरेलेइ तै मुल्ख ज़ै अवं इस्राएली लोकन देताईं, तू अपने सामने हेर, पन तैड़ी तू गेइ न सकेलो।"