Apocalipse 16

Ebuku etɛn nɛ ebá ɛbuk ɛ Zɛɛb

1 Bhii tak, mɛ naagwak boo gwood pɛ tɔ Ndjaa-ebuwa eke nɛ efofop etɛn nɛ ebá binɔk náá: «Tɔ́ka, kɛsoka ebuku yii ɛbuk ɛ Zɛɛb kɔ ɛko ɛ bɔs!»

2 Deenek, fofop mɛkɛn naazɛtɔ́ kɛso sa nadi tɔ mɔɔ buku yɛ ɛ kɔ bɔs. Wɔ gwaa, embee mɛpyoŋ nakpaa-kpaa zɛsee é mɛnyel mɛ bot ɛ nadi nɛ geka tit ɔ, nɛ bot ɛ nadi eduwal naghisɛ yɛ ɔ, na kpeeeŋ.

3 Tin, fofop yii bhɔɔba naakɛso sa nadi tɔ mɔɔ buku yɛ ɛ tɔ boo dii mɛsɔn. É di’enek, boo dii mɛsɔn moo tin zoooŋ dáa ghiya mot zegwyɛ ɔ. Tin, edjema djas nadi nɛ tsik tɔ boo dii mɛsɔn ɔ naazɛsi bhɛɛɛ.

4 Fofop yii elɛl naazɛso sa nadi tɔ yɛ mɔɔ buku ɛ tɔ eboo mɛdhii nɛ tɔ esɔɔgɔ. É di’enek, yɛ eezɛliiza ghiya. 5 Tin, mɛ eezɛgwak fofop nadi nɛ ghwyil ɛkɔk kɔ mɛdhii ɔ, eke náá: «Wɔy Mot edɛɛ, wɔy Mot di ɔ, wɔy Mot nadi ɔ, deenek, wɔ eelyaal náá, wɔ pɛ́ɛ ɛ́ tɔ epiki. 6 Dáa ye di náá, bot binɔk naaso ghiya bot ɛ edɛɛ, nɛ yii bɛngoolel ɛ Mɛkpa ɛ Zɛɛb ɛ, nenak, wɔ eedjɛ bɛ ghiya náá, bɛ dɛ, bɔɔ bɛmet ɛ saa yɛ!» 7 Bhii tak, mɛ eezɛgwak dhiiti gwood edus pɛ kyee mesa-ebuwa, eke náá: «Ghɛŋ, Zɛɛb Mɛkaake, mɛ nɛ gu náá, epɛ́ɛ bɔ ɛ́ epɛ́ɛ e tsɛɛtsɛ, yɛ ɛ́ yii epiki!»

8 Deenek, fofop yii ená naaso sa nadi tɔ yɛ mɔɔ buku ɛ, kɔ gwyes. É di’enek, gwyes naabela ze ɛgó ɛ bot ɛ bɔs nɛ du’ɛ. 9 Bot ɛ bɔs naadikaa nɛ mbee mɛgoo mɛ du. Bɛ nabɛ ɛ́, bɛ moo elee din ɛ Zɛɛb, mot di nɛ ghwyil kɔ egum binek ɔ. Tin, bɛ naabyen ɛswoola mɛfulu mɔɔ, bɛ nabɛ ɛ́ ààkwyɛl ɛdjɛ duma nɛ Zɛɛb.

10 Fofop yii etɛn naaso sa nadi tɔ yɛ mɔɔ buku ɛ kɔ bóó mɛkoozi ɛ tit. Wɔ gwaa, mbee mɛghomela zɛni tɔ ɛyoŋ ɛ lɛ. Bot nadi ekwaal mɛtsok, etɛɛ náá, bɛ nadi ezuk. 11 É di’enek, bɛ moo lee din ɛ Zɛɛb mot di pɛ tɔ gwoo ɔ, kɔ ɛsu ɛ mezuk nɛ mɛpyoŋ mɔɔ. Tin, bɛ nabɛ ɛ́ ààkat ɛsa embee mɛsa mɔɔ.

12 Fofop yii etɛn nɛ ngɔt naaso sa nadi tɔ yɛ mɔɔ buku ɛ, tɔ boo dii di edjóoaa Efaalat ɛ. Wɔ gwaa, boo dii tak zɛgel djas, étɛp ɛdjɛ ze nɛ bɛmɛkoozi nadus pɛ kyee ɛdjem ɛ dwoo ɛ. 13 Bhii tak, mɛ eezɛbee embee esisim elɛl enɔŋel nɛ bɛnagba. Tɔ embee esisim e tak, ngɔt nawyis ɛ́ tɔ nuub dhalaghɔŋ*16.13 dhalaghɔŋ ye baabelaa ɛ́ tɔ ɛlaŋel 12.3., dhiiti tɔ nuub tit, zɛnɔɔ nwyak ngɔt tɔ nuub ngoolel-Mɛkpa ɛ Zɛɛb yii mɛkɔŋ. 14 Embee esisim tak nabɛ ɛ́ esisim ɛ Satan nadi esa mɛvyɛkɛlɛ nɛ yɛ ɛ. Embee esisim binɔk bɛlɛl naazɛtɔ́ kɛsɛɛg bɛmɛkoozi mɛ di kɔ ɛko ɛ bɔs djas ɔ, étɛp ɛkɛlumla dɛɛb é boo ɛlu ɛ Zɛɛb Mɛkaake.

15 Ghɛŋ eezɛke: «Gwaka, mɛ aazyɛ ɛ́ dáa mot djii! Mɛmyaala nɛ mot aadi ndjem ɔ, mot aadi nɛ ekaad é nyel ekaab náá, nyɛ ɛzɛkɛtɔ́ syɛɛɛ, da nyɛ ɛ́ gwak sen, etɛɛ náá, bot eebee nyɛ syɛɛɛ ààbɛ nɛ ekaad.»

16 Esisim binek naasɛɛg bɛmɛkoozi é di wat di edjóoaa tɔ lii eBhele «Almaghedɔŋ» ɛ.

17 Fofop yii etɛn nɛ ebá naaso yɛ sa nadi tɔ mɔɔ buku ɛ, tɔ pup. Wɔ gwaa, dhiiti gwood zɛgék ɛlyelɛpe tɔ Ndjaa-ebuwa, edus pɛ kyee bóó mɛkoozi Zɛɛb, eke náá: «Nenak, esa djas eezedjala!» 18 Wɔ gwaa, mengwyes zɛgwyes, boo ebhyeed zɛgék, bham bɛghɛl ɛko zɛbam, bɔs naadheegel ɛlyelɛpe. Tin, ye naadyeebadheegel ɛlyelɛpe, dheegelak wat di náá, kana ɛlu ɛ mot nakusaa kɔ ɛko ɛ bɔs ɛ, nyɛ dinaa ààpabee kwaambi yenek dheegela. 19 Boo ghaada naazɛtsek é esum elɛl. Tin, eghaada e bot ɛ mɛdhik djas naazɛbik. É di’enek, Zɛɛb naazɛtaala boo ghaada Bhabhilɔn, étɛp nyɛ needjɛ nyɛ mɛnyok mɛ vin boo ɛbuk ɛ lɛ, nyɛ dɛ. 20 Eghola djas di tɔ boo dii mɛsɔn ɔ naades, bot nabɛ ɛ́ ààkabee mɛtsok. 21 Eboo mɛkok mɛ mɛtaadak mɛ na dil-dil*16.21 mɛkok mɛ mɛtaadak mɛ na dil-dil Mɛdil mɛ tak nabɛ ɛ́ ekilo mɛkam-mɛná. naazɛdus pɛ tɔ gwoo bila bot kɔ mɛnyel. Tin, bot naazɛlee din ɛ Zɛɛb kɔ ɛsu ɛ gum bhi eboo mɛtaadak menek. Etɛɛ náá, ye nabɛ ɛ́ gum nadi nɛ mbee ghulal ɛ.