Mɛsa 10

Pyɛɛd eedjóoaa pɛ daa Kɔɔdnɛy

1 Pɛ ghaada Sezaale, ye nabɛ ɛ́ nɛ dhiiti mot din ɛ lɛ nabɛ ɛ́ Kɔɔdnɛy, nyɛ nadi ɛ́ kukuma tɔ lɔɔg esodja bot ɛ Lɔm di edjóoaa: «Mwaka esodja bot ɛ Itali» ɔ. 2 Mot tak nabɛ ɛ́ sosoob, dɔɔ nɛ bot ɛ mɛbyel mɛ djas. Nyɛ nadi ezezyɛ zɛɛga mendjaala mɛ bot nadi eduwal Zɛɛb ɛ. Nyɛ nadi ekwye-kwyee bɛdjel ɛ bot ɛ mbyak eYuda nɛ lyem wat, nyɛ naadjedjaala Zɛɛb é mɛwala djas. 3 Bhii kuku dwoo, é ɛwala ɛ elɛl, wɔ gwaa, nyɛ zokazɛbee tɔ sisim. Nyɛ naabee popoopwon fofop ɛ Zɛɛb ngɔt eeni pɛ daa lɛ, nyɛy nɛ nɛ náá: «Kɔɔdnɛy!» 4 Nyɛ eezɛgwyák fofop nɛ lyem bwoo, bhii tak, nyɛ eeke nɛ nɛ náá: «Ɛyé Ghɛŋ?» Fofop eezɛbɔɔza nɛ nɛ náá: «Zɛɛb eegwak mendjaala mɔ, nɛ ghwyikwyee wɔ di ekwyee bɛdjel ɛ bot ɛ, nyɛ ààpadjisa wɔ. 5 Tinaak, kyeeda bot pɛ Zafa bɛ neekɛdjóo dhiiti mot nɛ din ɛ Simɔŋ, di ebaadjóoaa Pyɛɛd ɔ. 6 Nyɛ di ɛ́ pɛ daa dhiiti mot di esa mɛsa mɛ ekwood bɛtit ɔ, din ɛ lɛ ɛ́ Simɔŋ, ndjaŋ’ɛ ɛ́ é ɛboŋ ɛ boo dii mɛsɔn.» 7 Dáa fofop nadi elii nɛ nɛ natɔ́ ɛ, Kɔɔdnɛy eezɛdjóo bot ɛ mɛsa mɛ bɛbá, zɛnɔɔ ngɔt nadi eduwal Zɛɛb tɔ esodja nadi esa mɛsa pɛ daa lɛ ɔ. 8 Nyɛ eezɛbaŋa bɛ etɛp ee nadhaŋ ɛ djas, bhii tak nyɛ eezɛlwom bɛ pɛ Zafa.

9 Djɛmɛn tak, bɔɔ é ze, bɛ moo ekunaa nɛ Zafa, Pyɛɛd eezɛbyet kɔ ɛko ɛ ndjaa, kuku mwos, kɛdjaala Zɛɛb. 10 Tin, za eezɛsa nyɛ. Dáa bɛ nadi edjaab nyɛ edee ɛ, nyɛ eezɛbee etɛp tɔ sisim. 11 Zɛɛb eezɛbɛɛ nyɛ mis, nyɛ kabee ɛ́, gwoo eebɛŋel, dhiiti sonok eesul pɛ kyee nyɛ nadi ɛ: Ye nabɛ ɛ́ dhiiti sonok tyee boo pes lɛmbɛ, mɛta é mɛlɔ mɛ tak ená, esul é bɔs. 12 Tɔ tak, ye nabɛ ɛ́ nɛ bɛtit ɛ di ekɛ nɛ mɛko mɛná ɔ, bɛtit ɛ di nɛ epapa ɔ, nɛ membi me enen djas.

13 Dhiiti gwood eezɛke nɛ nɛ náá: «Wyɛla, Pyɛɛd, góa, da wɔ ɛ́ dɛ!» 14 Tin, Pyɛɛd eezɛbɔɔza náá: «Hooo ààbɛ! Ghɛŋ, etɛɛ náá, mɛ dinaa ààpakodɛ sok sa di tɔ etsi e mbyak eYuda ɛ, nɛ sa di nɛ edhuud ɛ.» 15 Gwood’enek eebaazɛgék-géka sis, eke náá: «Nàbee edhuud kɔ sa Zɛɛb ke náá, yɛ ɛ́ dɛɛ ɛ.» 16 Ye naasael deenek tyee esok elɛl, bhii tak, sonok tak eezɛbyet tɔ gwoo.

17 Tin, Pyɛɛd moo zɛdji sa sisim tak nadi ekwyɛl ɛlɛɛ ɛ. Ghuna, é ɛwala ɛ tak ɛ, bot ɛ Kɔɔdnɛy nalwom ɔ, nadi edji bot étɛp bɛ neegu ndjaa Simɔŋ nadi tɔ tak ɛ. Ye kabela ɛ́ bɛ moo é ɛniel ɛ peeb. 18 Bɛ eezɛdjóo, bhii tak, bɛ eezɛdji náá: «Simɔŋ, mot di baadjóoaa Pyɛɛd ɔ, di ɛ́ wak é?» 19 Ye nabela ɛ́, Pyɛɛd dinaa kuku esiiza dum nɛ sisim nyɛ nabee ɛ. É di’enek Sisim na Dɛɛ eezɛke nɛ nɛ náá: «Gwaka, bot ɛlɛl ɛpesaa wɔ. 20 Wyɛla, sula, da wɔ ɛ́ tɔ́ bi nɛ bɛnɔɔ, sa wɔ ààbem ba, etɛɛ náá, yɛ ɛ́ mam ɛ lwom bɛ.» 21 Pyɛɛd eezɛsul pɛ bot ɛ tak nadi ɛ́, nyɛ eezɛke nɛ nɔɔ náá: «Mot bi di ɛsaŋ ɔ, yɛ ɛ́ mam. Bi zyɛ étɛp yé?» 22 Bɛ eezɛbɔɔza náá: «Yɛ ɛ́ Kɔɔdnɛy, kukuma tɔ lɔɔg esodja bot ɛ Lɔm ɛ lwom bis. Nyɛ ɛ́ mot epiki, nyɛ nɛ duwal Zɛɛb, zɛbela náá, eYuda djas nɛ kwyɛl nyɛ. Fofop ɛ Zɛɛb ngɔt lwom nyɛ ɛ́, nyɛ lɛɛ wɔ náá, wɔ tɔ́ pɛ daa lɛ étɛp wɔ neekɛlɛɛ nyɛ lɛŋ wɔ di nɛ yɛ ɛ.» 23 Tin, Pyɛɛd eezɛniigal bɛ tɔ ndjaa, bhii tak nyɛ eezɛdjɛ bɛ edi e mendjɛk.

Tɔ mɛlem, nyɛ eezɛtɔ́ bɛ nɛ bɛnɔɔ, bɛdhiiti bɔn-nyɛɛg tɔ mendjaala tɔ ghaada Zafa, zokatɔ́ sama wat nɛ nɔɔ. 24 Bhii ɛlu ɛ tak, bɛ eezɛkum pɛ Sezaale. Kɔɔdnɛy nadi ebwood bɛ, nyɛy, bɛ nɛ bot ɛ mɛbyel mɛ, nɛ bɛsɔ bɛ nyɛ nadjóo ɔ. 25 Dáa Pyɛɛd nadi nyɛ moo ekwyɛl ɛni ɛ, Kɔɔdnɛy eezɛboma nɛ nɛ. Tin, nyɛ eezɛmalal, étɛp nyɛ neeswos nyɛ nɛ duu. 26 Tin, Pyɛɛd eezɛwyɛl nyɛ, bhii tak, nyɛ eezɛke nɛ nɛ náá: «Wyɛla, etɛɛ náá, mam pe, mɛ ɛ́ mot dáa wɔy.» 27 Tin, bɔɔ kuku elɛŋ bɛ nɛ Kɔɔdnɛy, nyɛ eezɛni pɛ tɔ ndjaa, é di zukamwaa nɛ mot nazesɛɛga ɔ. 28 É di’enek, nyɛ eezɛke nɛ nɔɔ náá: «Bi nɛ gu náá, mot mbyak eYuda ààgoka nɛ ɛbeya ɛsɔ, nɛghu, ɛtɔ́ tɔ mendjaa mɛ bot ɛ membyak mɛ sis e! Deenek, Zɛɛb eelyaal mɛ náá, yɛ ààgoka náá, mɛ bee mot dáa mot edhuud, nɛghu dáa mot di ààgoka náá, bot tɔ́ pɛ daa lɛ ɔ. 29 Étɛp tak ɛ di náá, dáa bi djóo mɛ ɛ, mɛ ɛ́ boozyɛ ààbyen. Mɛ kwyɛl ɛ́ mɛ gu tɛp bi djóo mɛ kɔ ɛsu ɛ tak ɛ.» 30 Kɔɔdnɛy eezɛbɔɔza náá: «Ye moo mos ɛ́ nɛ mɛlu mɛlɛl, é ɛwala ɛlak wat, é ɛwala elɛl bhii kuku dwoo, mɛ nadi edjaala Zɛɛb pɛ ndjaŋ’am. Kasɛka é di tak wat ɛ, dhiiti mot nɛ ekaad ee na kas-kas eezɛtuula sok bhwoob’am. 31 Tin, nyɛ eezɛke nɛ nam náá: "Kɔɔdnɛy, Zɛɛb eegwak mendjaala mɔ, nyɛ eesiiza ghwyikwyee yɔ dum nɛ bɛdjel ɛ bot. 32 Kyeeda bot pɛ Zafa, étɛp bɛ neekɛdjóo Simɔŋ, di baadjóoaa Pyɛɛd ɔ. Nyɛ di ɛ́ pɛ daa dhiiti mot din ɛ lɛ Simɔŋ, nyɛ sa ɛ́ mɛsa mɛ ekwood bɛtit, ndjaŋ’ɛ é ɛboŋ ɛ boo dii mɛsɔn." 33 É di tak ɛ, mɛ leelwom bot, bɛ kɛ ɛsaa wɔ, tin, wɔ eemyaal ɛzyɛ. Nenak, bisɔ djas bis ɛ́ wak é mis ɛ Zɛɛb, étɛp bis neegwak etɛp ee Ghɛŋ lwom wɔ, wɔ zyɛ zɛlɛɛ bis ɛ.»

Lɛŋ ɛ Pyɛɛd pɛ daa Kɔɔdnɛy

34 Pyɛɛd eezɛkan ɛlii nyɛy náá: «Nenak, mɛ eezegu nɛ tsɛɛtsɛ náá, Zɛɛb kwyɛɛg bot djas ɛ́ tyee wat. 35 Deenek, nyɛ kwyɛl ɛ́ bot djas, ye nakoozodi bot ɛ membyak mɛ sis, zuka nɛ tak ɛ́ náá, mot di eduwal nyɛ, nɛ ɛkɛ tɔ epiki. 36 Tin, Zɛɛb naakyeed bhaadal yɛ pɛ daa bot ɛ mbyak Yisalaɛl. Mbɛɛ Bhaadal tak ɛ́ egwyem nɛ Yezu Klisto mot di Ghɛŋ bot djas ɔ. 37 Bi nɛ gu sa napookodhaa sok pɛ Ghalile ɛ, bhii tak pɛ kɔ kyee dik Yude djas, Zaŋ naatuud náá: "Duwaka Zɛɛb!" 38 Bi nɛ gu dáa nyɛ naasɛ́ɛ Yezu mot Nazalɛt nɛ ghwyil Sisim na Dɛɛ ɛ. Bi nɛ baagu dáa Yezu nadi ekɛ kɔ bɔs é ɛsa enɛm esa, nɛ ɛtsik ɛ bot djas nadi si bhel dim mot mɛkɔŋ ɔ. Etɛɛ náá, Zɛɛb nadi egyee nɛ nɛ lɔɔg wat. 39 Tin, bis ɛ́ bɛtyaasɛs e etɛp ee nyɛ nasa pɛ kyee dik eYuda nɛ pɛ Yeluzalɛm ɛ. Bɛ naagó nyɛ, bem nyɛ kɔ mɛlaaba. 40 Deenek, Zɛɛb eebulal nyɛ tsik é ɛlu ɛ elɛl bhis ɛsyee. Nyɛ eedjɛ nyɛ ghwyil ɛtel bot nyel, 41 ààkabɛ nɛ bot djas, nyɛ nazotel ɛ́ nɛ bisɔ bot ɛ Zɛɛb naloozesɛ́ɛ náá, bis di bɛtyaasɛs ɔ. Bis naadɛ edee nɛ mɛdii é di wat, bhii Zɛɛb nagomal nyɛ bhis ɛsyee ɛ. 42 Nyɛ lwom bis ɛ́, bis goola Mbɛɛ Bhaadal pɛ daa bot, nɛ ɛlyaal náá, yɛ ɛ́ nyɛy ɛ di mot Zɛɛb nasɛ́ɛ étɛp nyɛ neepɛ́ɛ bot ɛ di nɛ tsik nɛ bot ɛ nazegwyɛ ɔ. 43 Bɛngoolel ɛ Mɛkpa ɛ Zɛɛb djas naalii kɔ ɛsu ɛ lɛ, bɔɔ náá, mot aadum koŋ nɛ nɛ ɔ waabela ɛpelak ɛ mesyem mɛ, nɛ ghwyil din ɛ lɛ.»

Bot ɛ di ààbɛ bot ɛ mbyak eYuda ɔ, eebela Sisim na Dɛɛ

44 Bela náá, Pyɛɛd nadi ɛ́, nyɛ dinaa elii, Sisim na Dɛɛ eezɛsul kɔ bot ɛ nadi egwak etɛp ee nyɛ nadi elii ɛ djas. 45 Bot ɛ mbyak eYuda, di dum koŋ nɛ Zɛɛb, nazyɛ bɛ nɛ Pyɛɛd ɔ, naadyeebadjoka ɛbuɛpe. Etɛɛ náá, bɛ nabee náá, Sisim na Dɛɛ Zɛɛb nadjɛ ɛ naasul dɔɔ nɛ kɔ bot ɛ di ààbɛ bot ɛ mbyak eYuda ɔ. 46 Etɛɛ náá, bɛ nadi egwak bɛ elii tɔ elii membyak mɛ sis, nɛ ɛduwal ɛ́ mɛnyɔ ɛ Zɛɛb. Tin, Pyɛɛd ɛ boozɛke náá: 47 «Mena ɛ́ nɛ ghwyil ɛlu bot bak nenak náá, bɛ naduwa Zɛɛb tɔ mɛdii, dáa bɛ di náá, bɛ eebela Sisim na Dɛɛ dáa menabɛlka ɛ?» 48 Tin, wɔ gwaa nyɛ zɛlwom náá, bɛ duu bɛ Zɛɛb nɛ din ɛ Yezu Klisto. Bhii tak, bɛ eezɛke nɛ nɛ náá, nyɛ kwyɛɛg ba mɛlu bɛ nɛ bɛnɔɔ.