Atos 15

Bot ɛ zɛɛga mendjaala mɛ Antiɔs eezɛboma nɛ bot ɛ lwoma kɔ Yeluzalɛm

1 Bɛdhiiti bot naazɛdus pɛ kyee dik Yude, tɔ́ pɛ Antiɔs, tin, bɛ moo tin elyo bɔn-nyɛɛg náá: «Bi ɛ́ di ààni beka, dáa etsi ɛ Moiiz di elɛɛ ɔ, bi aanàkwaabela tsik*15.1 Msa 12.3.» 2 Pɔl bɛ nɛ Bhaanabhas eezɛtyaa ghiŋ nɛ bot binɔk, bɔɔ zokazɛbela boo zyaala dum nɛ tɛp tak. Bot ɛ zɛɛga mendjaala ɛ́ boozɛgwakel náá, Pɔl bɛ nɛ Bhaanabhas, nɛ bɛdhiiti bot ɛ dɛl ɛ Antiɔs ɛ waatɔ́ pɛ Yeluzalɛm étɛp ɛkɛkoobal etɛp e tak bɛ nɛ bot ɛ lwoma nɛ bɛpaa. 3 Wɔ gwaa, bot ɛ zɛɛga mendjaala mɔɔ zokazɛdjɛ bɛ esa djas nadi egoka étɛp ɛtɔ́ mɛdjoŋ nɛ yɛ ɛ. Bɛ eezɛghɛɛ tɔ́, bɛ eezɛdhaa kyee dik Fenisi nɛ Samaali, bɔɔ é ɛbaŋa bot dáa bot ɛ di ààdi bot ɛ mbyak eYuda ɔ, nazeliig elyem, du Ghɛŋ ɛ. Bhaadal tak naadyeebadjɛ boo mɛmyaala nɛ bɔn-nyɛɛg djas.

4 Dáa bɛ nakakum pɛ Yeluzalɛm ɛ, bɛ eezɛsulal pɛ daa bot ɛ zɛɛga mendjaala, bot ɛ lwoma nɛ bɛpaa naazɛswos bɛ nɛ mɛmyaala. Bɛ ɛ́ boozɛbaŋa bɛ etɛp ee Zɛɛb nadi esa nɛ bot é ze’ɔɔ ɛ. 5 Tin, bɛdhiiti bot tɔ sama ɛdhuu ɛ eFalizyɛ nazedum koŋ nɛ Zɛɛb ɔ, ɛ́ boozɛwyɛl, bɛ eezɛke náá: «Ye goka ɛ́ náá, bot ɛ di ààdi bot ɛ mbyak eYuda nadum koŋ nɛ Zɛɛb ɔ, niigelaa beka. Bhii tak, da bi ɛ́ lɛɛ bɛ náá, bɛ duwal etsi ɛ Moiiz.» 6 Tin, bot ɛ lwoma nɛ bɛpaa zokazɛsɛɛga étɛp ɛdjek ɛ́ tɛp tak. 7 Bhii bɛ nazesɔs tɛp tak ɛbuɛpe ɛ, Pyɛɛd eezɛnɔɔ lii, nyɛy náá: «Bɔn-nyɛɛg, bi nɛ gu náá, Zɛɛb naalootɔ mɛ pak’en étɛp mɛ neegoola Mbɛɛ Bhaadal pɛ daa bot ɛ di ààdi bot ɛ mbyak eYuda ɔ, bɛ neegwak, bhii tak, da bɛ ɛ́ dum koŋ nɛ Zɛɛb. 8 Deenek, Zɛɛb mot di egu elyem e bot ɔ, nyɛ eelyaal náá, nyɛ eemyaal bɛ, nyɛ eedjɛ bɛ Sisim na Dɛɛ dáa menabɛlka. 9 Nyɛ nabɛ ɛ́ ààwa mbɛk pak mena nɛ bɛnɔɔ: Dáa di náá, bɛ eezedum koŋ nɛ Zɛɛb ɛ, nyɛ eezegwyii elyem bɔɔ. 10 Haaa étɛp yé nenak bi di ebe mɛso nɛ Zɛɛb? Tin, bi ɛpewaab-waaba bhel nɛ bot ɛ di dum koŋ nɛ Zɛɛb ɔ náá, bɛ bɛp kɔm etɛp na dil-dil, di náá, ye nakoozodi menabɛlka bɛmet nɛghu bɛbhaab binaka, bɛ nabɛ ɛ́ ààbɛ nɛ ghwyil ɛkobɛp-bɛpak ɛ! 11 Ye goka ɛ́, mena myaalka náá, mena belaka tsik ɛ kɔ ɛsu ɛ enɛm esa ɛ Ghɛŋ Yezu, tyee wat nɛ nɔɔ.»

12 Tin, bot ɛ zɛɛga djas moo tin kup, bhii tak, bɛ moo tin egwak, dáa Bhaanabhas bɛ nɛ Pɔl nadi ebaŋa bɛ endem e mɛbwala ee Zɛɛb nasa nɛ nɔɔ, pɛ daa bot ɛ di ààbɛ bot ɛ mbyak eYuda ɔ. 13 Dáa bɛ nasilal ɛlii ɛ, Zak eezɛwyɛl, bhii tak, nyɛ eezɛke náá: «Bɔn-nyɛɛg, gwakeka mɛ! 14 Simɛyɔŋ eebaŋa mena, dáa Zɛɛb nalookan ɛkwyee bot ɛ di ààbɛ bot ɛ mbyak eYuda é mɛkɛn ɔ, étɛp nyɛ neesɛ́ɛ tɔ lɔɔ mbyak aadi yɛ ɛ́. 15 Deenek, etɛp ee bɛngoolel ɛ Mɛkpa ɛ Zɛɛb djas ɛpenɔŋel nɛ yak, etɛɛ náá, Ekwyala lɛɛ ɛ́ náá:

16 "Ghɛŋ lɛɛ ɛ́ náá, bhis yenek, mɛ waabula,

étɛp ɛ́ baazɛsum ndjaŋ ɛ Dhavid nazebik ɛ,

mɛ waawyɛl bikela epap e tak, mɛ waabulal yɛ piki.

17 Tin, bot ɛ membyak djas ɛ́ waasaa Ghɛŋ,

nɛ tsɛɛtsɛ, bot ɛ membyak djas mɛ nadjóo náá, bɛ di bam ɔ.

Sa Ghɛŋ nalɛɛ ɛ́ yenek:

18 Nyɛy mot naloozesa náá, bot gu egeka bɛ ɔ*15.18 Amɔ 9.11-12."»

19 Wɔ gwaa, Zak baazɛbil náá, mɛ bee ɛ́ náá: «Mena tokeka nɛ ghwyil ɛsaa etɛp nɛ bot ɛ di ààdi bot ɛ mbyak eYuda, di eliig elyem du Zɛɛb ɔ. 20 Deenek, djhookwyalka bɛmɛkana étɛp ɛlɛɛ bɛ náá, bɛ nàdɛ bɛtit ɛ edhuud kaaa étɛp ɛdjɛ bɛzɛɛb ɛ bɛnaghisɛ ebuwa ɔ, bɛ kyee mɛzɔ, bɛ nàdɛ bɛtit ɛ góaa nɛ bhiyo ɔ, bɛ nàdɛ ghiya. 21 Etɛɛ náá, kana é ghɛŋ bɛbhaab, bot ɛpelyo bot etsi ɛ Moiiz pɛ kɔ eghaada nɛ eghaada, yɛ ɛpelaŋaa tɔ mendjaa mɛ mendjaala mɛ eYuda é mɛlu mɛ esaba djas.»

Mɛkana mɛ nakyeedaa pɛ daa bot ɛ membyak mɛ sis

22 Tin, bot ɛ lwoma, nɛ bɛpaa, zɛnɔɔ bot ɛ zɛɛga mendjaala zokagwakel náá, bɛ sɛ́ɛ bɛdhiiti bot pak’ɔɔ, bɛ neelwom bɛ pɛ Antiɔs lɔɔg wat nɛ Pɔl nɛ Bhaanabhas. Tin, wɔ gwaa bɛ zokazɛsɛ́ɛ, Zuud dhiiti din ɛ lɛ nabaadi pe ɛ́ Bhaasabhas, zɛnɔɔ Silas. Bot ɛbá tak nabɛ ɛ́ tɔ sama bot ɛ nadi kɔ elo ee bot ɛ zɛɛga ɔ. 23 Bɛ ɛ́ booke nɛ nɔɔ náá, bɛ tɔ́ nɛ mɛkana di elɛɛ náá:

«Bot ɛ lwoma, nɛ bɛpaa, bɔn-nyɛɛg bin eeswos bɔn-nyɛɛg bɔɔ di ààdi bot ɛ mbyak eYuda ɔ, di kɔ ghaada Antiɔs, pɛ kyee dik Siili, dɔɔ nɛ pɛ Silisi ɛ. 24 Bis eegwak náá, bɛdhiiti bot ɛ dus pɛ dɛl ɛ les ɔ, eezɛm bin nɛ ɛpul ɛ bin esiiza, nɛ etɛp ee bɛ di elɛɛ ɛ. Bisɔ ààpalwom bɛ, bɛ zɛlii nɛ nen dum nɛ etɛp binek. 25 Étɛp tak ɛ, bisɔ djas gwakel náá, bis sɛ́ɛ bot ɛ bis aadhis ɔ. Bot ɛ tak neezɛkyeed Pɔl bɛ nɛ Bhaanabhas bɛsɔ bena, 26 bot ɛ nawaagel mɛnyel kɔ ɛsu ɛ din ɛ Ghɛŋ’enaka Yezu Klisto ɔ. 27 Bis eedhis bin Zuud bɛ nɛ Silas bɛ neezɛlɛɛ bin nɛ enuub bɔɔ bɛmet, etɛp ee bis kwyal wak ɛ. 28 Yɛ ɛ́ náá, bisɔ nɛ Sisim na Dɛɛ nabɛ ɛ́, bis eegwakel náá, bis aanàbaabil bin dhiiti kɔm na dil-dil, bhii mɛsa mak, yɛ ɛ́ di nɛ boo mɛgham ɛ: 29 Nàdɛka bɛtit ɛ kaaa étɛp ɛdjɛ bɛzɛɛb ɛ bɛnaghisɛ ebuwa ɔ, nàdɛka ghiya, ààdɛ epuud é tit góaa nɛ bhiyo ɔ, sa bi ààsa mɛzɔ. Bi ɛ́ sa deenek ɔɔ, yɛ aadi ɛ́ ɛnyɔɛpe. Dika ɛnyɔɛpe!»

30 Deenek, bɛ eezɛbet bot ɛ bɛ nalwom ɔ, bɛ tɔ́ pɛ Antiɔs. Tin, bɛ eezɛsɛɛg bot ɛ zɛɛga mendjaala. Bhii tak, bɛ eezɛdjɛ bɛmɛkana. 31 Wɔ gwaa, bɛ zɛlaa yɛ, mɛkana mɛ tak naadjɛ bɛ mɛghaaz, bɛ moo tin nɛ mɛmyaala. 32 Dáa Zuud bɛ nɛ Silas nadi bɛngoolel ɛ Mɛkpa ɛ Zɛɛb bɔɔ bɛmet ɛ, bɛ naazɛlii nɛ bɔn-nyɛɛg bɔɔ ɛbuɛpe étɛp ɛdjɛ bɛ ghwyil nɛ mɛghaaz tɔ ɛdum ɛ koŋ nɛ Zɛɛb. 33 Bhii bɛ nadhaa ba bim mɛwala é di tak ɛ, bɔn-nyɛɛg bɔɔ eezɛmwana nɛ nɔɔ, bɛ sik tɔ egwyem pɛ daa bot ɛ nalwom bɛ ɔ. [34 Tin, Silas ɛ́ booke yɛ náá, nyɛ lik tinaak.] 35 Bela tin náá, Pɔl bɛ nɛ Bhaanabhas eezɛlik pɛ Antiɔs. Bɛ nɛ bɛdhiiti bot, bɛ nadi elyo bot nɛ ɛgoola mɛkpa ɛ Ghɛŋ.

Pɔl bɛ nɛ Bhalnabas eebɛka

36 Ba mɛwala bhii tak, Pɔl eezɛke nɛ Bhaanabhas náá: «Djhoosikeka, kɛgwyák bɔn-nyɛɛg bina pɛ kɔ eghaada djas mena nagoolaka mɛkpa ɛ Ghɛŋ ɛ, mena neekɛbee dáa bɛ di penek ɛ.» 37 Bhaanabhas nakwyɛl ɛ́, bɛ tɔ́ lɔɔg wat bɛ nɛ Zaŋ, mot di ebaadjóoaa Malak ɔ. 38 Tin, Pɔl nabɛ ɛ́ ààkwyɛl geka tak, etɛɛ náá, ye nabɛ ɛ́, nyɛ naabet bɛ, é sok bɛ nadi pɛ kyee dik Panfili ɛ, nyɛ nabɛ ɛ́ ààtɔ́ bɛ nɛ nɔɔ pɛ ze lwomel. 39 É di’enek, ye nabɛ ɛ́ bɛ naabela boo zyaala, batasa náá, bɛ bɛka. Tin, Bhaanabhas eezɛnɔɔ Malak, bɛ eezɛni tɔ mɛsuwa, tɔ́ bɛ nɛ nɛ pɛ ghola Siipɛlɛ. 40 Pɔl eezɛnɔɔ yɛ Silas, tɔ́ nɛ nɛ, bhii bɔn-nyɛɛg bɔɔ nazewa bɛ é mɛmbɔ mɛ Ghɛŋ tɔ mendjaala ɛ. 41 Pɔl eezɛkpaa kɔ eghaada Siili nɛ Silisi, é ɛdjɛ mɛghaaz nɛ ghwyil nɛ bot tɔ ezɛɛga mendjaala.