1 Vakolindo 12

Muvili umwi ila ugehe na fiwungo fyongofu

12 Muvili va munu yumwi ugehe na fiwungo fyolofu, fiwungo ifyo ndi fya muvili wumwi, nde igehe ndeni kwa muvili va Kilisito. 13 Kwakuva nefwe vonda ndi Vayawudi awu vanu se Vayawudi awu vasutu awu vanu vapekesu, vonda tubatiswe na Muhe yumwi na kugavilwa Muhe umwi neke tuveche muvili umwi.

14 Ila muvili sekiwungo kimwi hela, ila ugehe na fiwungo fyolofu. 15 Ngita ligulu lilonga, "Kwakuva nene seliwoko nene sepono lya muvili," Wuli, kwakuva lya ilyo ligulu sepono lya muvili? 16 Ngita lisigicha ngalilongile, "Kwakuva nene seliho, nene sepono lya muvili," Wuli, kwakuva lya ilyo lisigicha sepono lya muvili? 17 Ngita muvili vonda ngauvechile liho, munu ngaapulike wuli? Ngita muvili vonda ngaugehe lisigicha munu ngaanusile wuli? 18 Ila Nguluvi avikile fiwungo mumvili, kila kimwi ngita peakeliye yumwene. 19 Ngita fiwungo fyonda ngauvechile kiwungo kimwi, muvili ngaugehe kwiya? 20 Undakyene ndi kuva, fiwungo fya muvili ndi fyongofu, ila muvili ndi umwi.

21 Suwe, liho selivesa kulilongela liwoko, "Sendikukela" Vala kituwe sekivesa kugalongela magulu, "Sendikuvakela nyenye." 22 Kuchumba ago fiwungo fya muvili fyefiwoneka kuva nde visosovafu fyefyitakilwa hilo. 23 Kangi, fila fiwungo fyefiwoneka fya kubedwa ifyo nde tukufigavila uginyange, ila fiwungo fya muvili fyefiwoneka fileta nyoni nde tukufigubika unofu. 24 Ila fiwungo sefileta nyoni sefing’ang’wa kugubikwa ngita fiwungo fingi. Ila Nguluvi yumwene awuvikile unofu fiwungo mumvili na akafigavile uginyange hilo fila fiwungo fyefibedilwe, 25 ndena kubihile kuvecha na kwinenga mumvili, fiwungo fyonda fitangane pamwi. 26 Ngita kiwungo kimwi kilemela fiwungo fyonda filemala pamwi na kila kyekilemala. Kiwungo kimwi kikinjumwa fiwungo fyonda fikeduka pamwi na chene.

27 Suwe, nyenye vonda ndi muvili va Kilisito, kila yumwi venu ndi kiwungo kya muvili ugo.