Yohani 15

Yesu ndi msabibu va undakyene

1 Yesu akalongie, "Nene ndi msabibu va undakyene na Daada vangu nde mgima. 2 Mwene edumula kila likwati lyeselibaba manunu na kila likwati lyelibaba akulihengelela neke libabe manunu myolofu. 3 Nyenye muveche suwe vanofu kwakuva lya wula unanzi wendivalongie. 4 Mwikale mugati lyangu na nene ndikale mugati lyenu. Ngita ndeni likwati selivesa weka kubaba manunu mbaka liveche mulibiki lya msabibu. Ndena semuwesa kugita kyeakela Nguluvi ngita semukwikala mugati lyangu.

5 "Nene ndi msabibu na nyenye ndi makwati. Yeakwikala mugati lyangu na nene ndikala mugati lyake, mwene ibaba manunu gyolofu, kwakuva ngajila nene semvesa kugita kyokyonda. 6 Munu yeyonda yeseakwikala mugati lyangu itagwa kwivala ngita likwati pelitagwa kwivala na kugama. Vanu vakulihola likwati lya indena na kulitaga mulyoto lipie. 7 Mukikala mugati lyangu na malichwi gyangu ngagakwikala mugati lyenu, msuke kyokyonda kyemkela na nyenye damwigavilwa. 8 Vanu davachela Daada vangu peagehe mkomi, kwa kugita makani gyegakumkesala Nguluvi na nyenye damwivecha vachulila vangu ndakyene.