1 ሄ ጋላስ ይሁዳ ጋድያን ሀ የይ የጸታና።

ኑዉ ምኖ ካታማይ ደኤ፤

ጾሳይ አቶተ አ ዩሹዋን ግምቢያዳንነ ጌሱዋዳን ኤሴ።

2 አማኑዋ ናግያ ጽሎ ካዉተይ ገላና ማላ፥

ፐንግያ ዶይተ።

3 ባረ ቆፋ ኔናን ዎዳ አሳ

ኔን ፖሎ ሳሮተን ናጋሳ፤

አያዉ ጎፐ፥ እ ኔናን አማነቴ።

4 መና ጎዳን መናዉ አማነትተ፤

አያዉ ጎፐ፥ መና ጎዳይ፥ መና ጎዳይ መና ዛላ።

5 ቃን ደእያዋንታነ፥

ኡንቱንቱ ቃ ካታማ ዝቂ ኦዳ፤

እ አ ካዉሼ።

ዱገ ሳኣ ጋካናዉ ዝቂ ኦ፤

ቢታ ባናን ኦሌ።

6 ማንቁዋ ገዲ፥ መቶታንቻ ገዲ፥ አ የና።

7 ጽሎቱዋ ኦጊ ሳላላ።

አቤት ጽሎ፥ ኔን

ጽሎቱዋ ኦግያ ሳላልሳሳ።

8 ኤ መና ጎዳዉ፥ ነ ህግያ ኦግያን ሀመቲደ፥

ኑን ኔና ናጌቶ።

ኑ ዎዛና አሙ፥

ነ ሱን ቦንቻናዋ ጻላላ።

9 ቃማን ታን ኔና ላሞታይ፤

ዎንታን ታ ግዶን ደእያ ታ አያናይ፥

ቱሙዋፐ ኔና ምንሲደ ኮዬ።

አያዉ ጎፐ፥ ነ ፕርዳይ ሳኣን ደእያ ዎደ፥

ሳኣን ደእያ አሳይ ጽሎተ ታማሬ።

10 ኢታ አሳዉ ኬካተ ኦፐካ፥

እ ጽሎተ ታማረና።

ሱረ አሳቱዋ ጋድያን ኢታባ ኦ፤

መና ጎዳ ግታተካ ኤረና።

11 አቤት መና ጎዳዉ፥ ኔን፥

ነ ኩሽያ ቁ ኦዳ፤

ሽን ኡንቱንቱ በእክኖ።✝26:11 እብራ. 10:27

ነ አሳዉ ኔን ምሸትያ ምሹዋ በኢደ ዬላትኖ።

ኔን ነ ሞርከቶ ዎዳ ታማይ፥

ኡንቱንታ ም ይሶ።

12 አቤት ጾሳዉ፥ ኔን፥

ኑዉ ሳሮተ ምንዳ፤

ኑ ኦሶ ኡባ ኔን ኑዉ ኦዳ።

13 አቤት መና ጎዳዉ፥ ኑ ጾሳዉ፥

ኔፐ ሀራቱ ኑና ሞዴድኖ፤

ሽን ኑን ነ ሱን ጻላላ ቦንቼቶ።

14 ኡንቱንቱ ሀይቄድኖ፤

ስሚደ ፓጻ ደእክኖ።

ኔን ይሰዳ ድራዉ፥

ስሚደ ደንድክኖ።

ኡንቱንቱ ሀሳየትያዋ ኡባ ቁጫ ይሳዳ።

15 አቤት መና ጎዳዉ!

ኔን አሳ ዳርሳዳ።

አሳ ዳርሳደ፥ ኔን ቦንቼታዳ፤

ቢታ ዛዋ ኡባካ አሳዳ።

16 አቤት መና ጎዳዉ!

መቱዋ ዎደ ኡንቱንቱ ኔና ኮዬድኖ።

ኔን ኡንቱንታ ሙሬዳ ዎደ፥

ኡንቱንቱ ኔና ሳሱክ ዎሴድኖ።

17 አቤት መና ጎዳዉ! ሻሃሬዳ ምሽራታ፥

የልያ ዎዲ ጋክና፥

የሉዋ ኡንኤታደ ዋስያዋዳን፥

ኑንካ ነ ስንን ሄዋዳን ሀኔዶ።

18 ኑን ሻሃሬዶ፤ ኦይ ኦይቀቴዶ፤

ሽን ጫርኩዋ የልያዋ ግዴዶ።

ኑን ሳአዉ አቶተ አህበይኮ፤

ሳኣን ደእያ አሳካ የልቦኮ።

19 ሀይቄዳ ነ አሳይ ፓጻና፤✝26:19 ዳኔላ 12:2

ኡንቱንቱ አሃይ ደንዳና።

ህንተኖ፥ ቢታ ባና ግዶን ደእያዋንቶ፥

ህንተ ጻሳይ ዎንታ ከተርሳ ማላ ግድያ ግሻዉነ፥

ሳአይካ ሀይቄዳዋንታ ዛረደ እምያ ድራዉ፥

ቤጎትተነ ናሸቻዉ የጽተ።

20 ታ አሳቶ፥ ሃ ዪተ፤ ህንተ ጎለ ገሊደ፥ ፐንግያ ህንተ ቦላ ጎርድተ። ጾሳ ሀንቁ አና ጋካናዉ፥ ጉ ዎድያ ህንተና ቆስተ። 21 ቢታ ቦላን ደእያ አሳ፥ ኡንቱንቱ ናጋራ ድራዉ ሙራና፥ መና ጎዳይ ባረ ደኢያሳፐ ከሲደ ዬ። ቢታይካ ባረ ቦላን ጉኬዳ ሱ ቆንጭሳና፤ ዎዳዋንታካ ላኤን ገንና።